دارت هديل تشوف في يد كريم لي محطوطة على ذراعها حاولت تجبدها منو بصح هو كان شاد عليها و هدر بنبرة تعب: "لوكتاه حنبقاو هكا؟!"
هديل ببرود: "كيفاه هكا"
كريم: "نتي تتهربي و تتعاملي كأني مانيش في حياتك و انا نقلق و المشكل لي بيناتنا يكبر"
هديل بسخرية : "تقلق!!! سامحني موسيو كريم ماشي قصدي" و كملت بإنفعال بعد ما جبدت يدها من يدو: "تتمهبل كريم؟! قولي وكتاه انا زعفت و نتا راضيتني وكتاه حزنت و جيت واسيتني اه قولي كريم وكتاه؟! انا لي ديما نراضي روحي كي نتا تزعفني و انا نواسي روحي كي نتا تحزني بصح نتا بالعكس جامي خليتك تزعف مني و ديما نديرلك حساب و اذا زعفت مني ما ناكل ما نشرب حتى ترضى عليا و كي جا النهار لي زعفت فيه جاتك كبيرة؟! جاتك صعيبة تتحمل زعافي و تحاول تراضيني؟!"
كريم: " واش تحبيني نديرلك و نتي تعصي فيا نجي نطلب منك السماح علاخاطر درت ردة فعل؟"
هديل و الدموع في عينيها: " ههه ردة فعل؟! ردة فعل مليح، ما خممتش بلي لي درتو انا تاني كان ردة فعل على طريقة تعاملك معايا ما خممتش بلي درت لي درتو باش تفهم بلي مانيش عبدة عندك راني مرتك؟! و لاكان حاب نكملو مع بعضانا لازمك تفهم بلي لحياة لي حنعيشوها مع بعضانا ماناش حنعيشوها على حسابي وحدي، يا عليا و عليك يا ماكاله ".
حك كريم لحيتو و هدر بين سنيه:" قتلك ما تجبديش الطلاق و ما تلمحيلوش و انا مانيش معتابرك كيما راكي تشوفي في روحك نتي مرتي و بنت عمي و علابالك بلي حبك في قلبي ماكانش حاجة توازيه و كلشي درتو من غيرتي "
هديل: "ما تبررش تجبرك و تسلطك بغيرتك الغيرة ماشي هك" و قربت عندو كتر و هدرت بهمس حاد: "و خلي نصارحك مانيش نادمة على الشي لي درتو ولا على الهدرة لي هدرتها لا درك ولا من قبل و كون يرجع بيا الزمان نعاود ندير كلشي درتو و نهدر كلشي هدرتو"
كريم ببرود: " شوفي هديل انا هنا قاعد نحاول على قد ما نقدر نتحكم في روحي و نكون هادي باش نوصلو لحل و نتمنا تعاونيني "
هديل: " هههه و واش هو الحل لي تحبنا نوصلولو كريم "
كريم: " واش الحل لي يرضيك "
هديل: " انك تحبس من اعطاء الأوامر و تجرب تتناقش معايا "
كريم: " فاش تحبيني نتناقش معاك في انك تلبسي لمعري ولا تتزيني و نتي خارجة ولا في انك تخرجي مع كليكة فيها دكورة كتر من بنات؟! فاش تحبينا نتناقشو هديل "
هديل: " لالا نتناقشو كي نحب نخرج مع بنات نتناقشو كي نحب نخرج وحدي ولا كي نحب نسوق الطونوبيل تاعي نتناقشو فالحوايج لي انا نورمالمون نقررهم وحدي و نتا قاعد تمنعني عليهم "
كريم ببرود: " هيا نروحو "
تنهدت هديل بيأس و هزت ساكها و خرجت سبقتو.
..........................................................
كانت فاطمةو سيف و عادل قاعدين و السكات بيناتهم حتى وقفت فاطمة و هدرت: "نروح ندير حاجة ناكلوها"
سيف بسخرية: "علاه تعرفي تطيبي؟!"
فاطمة وهي تعوج في وجها: " لالا حنتعلم فيك "
عادل: " اقعدي فاطمة اني دومونديت بيتزا درك توصل "
فاطمة: " اووووف درك يطولو "
عادل: " بلعقل اصبري شوية "
فاطمة: " مالا اني فالبيت حنرتح شوية كي توصل لبيتزا عيطلي "
وقفت رايحة لبيتها حتى سمعت الباب بدلت وجهتها وحلتو تحت نظرات سيف الساخطة على تصرفها.
ما فاقتش فاطمة غير ببنت خالتها تترما في حضنها بادلتها الحضن لي تخلط بالدموع و كلمات ماهيش مفهومة، بعدت اية عليها و هدرت بتساؤل بعد ما شافت رجلها: "واش صرالك؟! واش دارولك؟! المتوحشين ما كملتي...."
قاطعتها فاطمة بإبتسامة بلهاء و هي تطلع في جواجبها جيهة سيف: "واحد ما قاسني انا طحت"
بلعت آية ريقها بتوتر من نظرات سيف و هدرت بتوتر: "جبتلك لعشا"
فاطمة وهي تشوف في عادل بإمتنان: " هادي هي البيتزا؟! هه "
تبسملها و هي جبدت بنت خالتها و راحو للكوزينة فاطمة قاعدة على كرسي فالطابلة و اية توجد فيها و تطرح فالأسئلة تعها لي ما خلصتش حتى هدرت فاطمة بملل: "آية صدعتيني و نتي تسقسي على سيف، قتلك السيد خاطب خلاص"
عوجت اية فمها و هدرت: " ما فهمتش وشبيك شعلتي سقسيت برك "
فاطنة: " روحي برك عيطيلهم ياكلو حنموت بالجوع"
راحت اية عيطتلهم و عينيها ما نزلوش من على سيف، تلمو على الطابلة سيف مقابل فاطمة و اية مقابلة عادل كل واحد لاهي في سحنو حتى نطقت اية بصوت فيه دلع: " كول سيف علاه ماكش تاكل؟! "
هزت فاطمة حاحبها و هدرت بين شواربها بدهشة: " سيف!!! "
أما سيف لي تبع حركتها هدر بإبتسامة: " اني ناكل يا.. كيفاه اسمك "
اية بإبتسامة: " اية اسمي اية "
سيف بخبث: " و نتي لي طيبتي الماكلة يا اية"
فاطمة بتسرع: " خاطيها اية ما تعرفش تطيب "
سيف: "خليها هي تجاوب فاطمة"
عضت فاطمة على شاربها و هي تبع فالحوار الداير بيناتهم بغيض و قررت تتجاهلهم و دورت عند عادل لي كان يتبع غير بعينيه و هدرت بتساؤل: " عادل حنسقسيك وينو طيليفوني كي رحت ما ديتوش معايا "
قبل ما يجاوبها نطق سيف : " واش حتديري بيه؟! "
فاطمة بسخرية: " نفس لحوايج لي تديرهم نتا بطيليفونك مثلا "
جاوبها عادل متجاهل سيف: " او في بيتك مع قشك "
مسحت فاطمة فمها و وقفت: " بصحتكم "
سيف بحاجب مرفوع: " ماكملتيش ماكلتك "
طلعتو فاطمة و هبطتو بعينيها و هدرت بسخرية: " كليت وقت لي كنت نتا لاهي "
تبسم سيف بخبث و ما جاوبهاش و هي راحت لبيتها و حطت طيليفونها يتشارجا و رمات رحها على السرير و بدات تخمم: " وشبيا يهدر معاها ولا يندب واش دخلني فيه اووووف "
دخلت يديها في شعرها و حركتو بطيرقة فوضوية و هي تنسف حتى تحل الباب و دخلت منو آية: " وشبيها بنت خالتي هبلت؟! "
فاطمة بإنفعال: " علاه لي يشوفني يسقسيني لاكان مهبولة تشوفو فيا نقطع في قشي؟! "
آية بدهشة: " لالا حشا "
تنهدت فاطمة و هدرت بغصة: " ما علاباليش واش بيا وليت هكا عدت ما نحمل حتى واحد، ديزولي ماشي قصدي "
قعدت اية قدامها و هي تمسحلها على شعرها و هدرت: " ما تلوميش روحك أصلا لي قاعدة تعدي بيه ماهوش ساهل "
سكتو في زوج كل وحدة فاش تخمم حتى نطقت آية بتردد: " فاطمة علابالك بلي ماشي بيدي كي خبيت عليك، خفت على ماما علاخاطر هي اللولة لي تروح فيها كون نقلك "
عقدت فاطمة حواجبها بإسبغراب و هدرت بإبتسامة: " كيفاش؟! قصدك كنتي علابالك؟! "
بلعت آية ريقها و هبطت راسها تشوف فالأرض، هبطو دموع فاطمة و هي تضرب فيها في كتافها و تعيط: " شوفي فيا و جاوبيني، انا كنت ما نخبي عليك حتى حاجة كلشي نحكيهولك كنتي كتر من ختي، و نتي كنتي حياتك كامل تشوفي فيا عايشة في كذبة و مخبية عليا!!! "
اية ببكاء: " كنت خايفة على ماما "
وقفت فاطمة و هدرت بعياط: " و كنتي في بالك انا حنأذيها ولا حنتخلا على عايلتي؟! كنت في بالي بلي نتي تعرفيني بصح كنت غالطة.... "
سكتت كي لقات الباب تحل و دخل منو عادل و هدر: " وشبيكم تعيطو؟! علاه تبكيو واش صرا؟! "
شافت فاطمة فيه و في آية بخذلان و هدرت: " ما فهمتش علاه نلوم فيك و خويا ولا لي كنت معتابرتو خويا كذب عليا....... تقدرو تخليوني وحدي؟؟ "
وقفت اية و قربت ليها: " فاطمة... "
قاطعتها بيدها و هي تشير لباب: "خليني وحدي تعيشي"
خرجو في زوج و قفلو الباب و اية بلا ما تزيد حتى كلمة راحت جيهة الباب حلتو و قابلها سيف لي شاف فيها بإستغراب و قبل ما يهدر معاها لقاها راحت تجري طلع حواجبو بإستغراب و دخل شاف عادل حاط راسو بين يديه تجاهلو و راح جيهة بيت فاطمة و طبطب جاه صوتها: "قتلكم حابة نبقا وحدي"
حل الباب و دخل و هي شافت فيه و الدموع في عينيها و هدرت بسخرية: " و انا نقول شكون هدا لي ما فهمش العربية "
وقف قدامها و هي تمسح في دموعها و هدر: " وشبيك؟! "
فاطمة: " ما بيا والو "
سيف: "شفت بنت خالتك تاني خارجة تبكي واش صرا؟؟"
وقفت فاطمة وهدرت بعياط: " كون سقسيتها مدامها غايضتك "
قدم عندها سيف حتى لسق فيها و هدر بهمس: " شششش صوتك نقصي فيهم "
تنهدت فاطمة و غمضت عينيها و هدرت: " سيف اخرج مانيش حابة نحكي "
حكملها يدها و حطلها فيها دواها و هدر: " اشربي دواك "
فاطمة: " وكتاه جبتو؟! "
قبل ما يجاوبها سونا طيليفونو جبدو و شاف فيه بإستغراب و جاوب: " الو هديل! "
هديل بهدوء: " اهلا سيف "
سيف: " علاه تعيطي كشما صرا "
هديل: " لالا حبيت نحكي مع فاطمة برك لاكان اي قدامك "
شاف سيف في فاطمة و مدلها الطيليفون: " اهلا هديل "
هديل: " توحشتك "
فاطمة: " ههه ليه ليه؟! الصباح و انا قدامك "
هديل بنبرة فيها لبكا: " كون غير ما رحتيش ليوم "
فاطمة بتوتر من نظرات سيف: " علاه؟! "
بدات هديل تحكيلها واش صرا معاها و هي تجاوب غير ب: اممممم و هيه و لالا.
هديل: " فاطمة وشبيك ماكيش تحكي آليز سيف حداك؟! "
فاطمة: " هيه "
هديل: " ما تبينيش قدامو مانيش حابة يكبر المشكل كتر تعيشي "
فاطمة: " علابالي "
هديل: " وكتاه ترجعو؟! "
فاطمة: " غدوة نشاله تدير ماما العملية و نرجعو "
هديل: " نشاله طريق السلامة "
فاطمة: " الله يسلمك "
كملت و مدت لسيف الطيليفون بلا ما تهدر حتى كلمة و هو بقا يشوف فيها بنظرات متفحصة و هدر بجدية: " واش قاتلك "
فاطمة: " واش حتقولي قاتلي توحشتك و وكتاه مروحين "
سيف: " هادي اول حاجة و اخر حاجة قالتها، و لي بيناتهم واش "
فاطمة: " كون جات عينها تعرف كون اي قالتهملك ليك ماشي ليا"
تبسم سيف و هدر ببرود: " اشربي دواك و ارڨدي غدوة تبكري و عندنا طريق "
فاطمة بنفس الإبتسامة: " اقفل الباب معاك "
.................................
نهار جديد حل سيف عينيه شاف عادل راقد مقابلو هز طيليفونو يشوف فالساعة و من بعد وقف حيلبس طريكوه لقا فاطمة داخل من الباب تاع الدار رما طريكوه و قرب عندها و هدر بصوت مبحوح: " وين كنتي؟! "
بلعت فاطمة ريقها بتوتر من الموقف لي راها فيه وهو واقف قدامها بلا طريكوه و هدرت بتلعثم و هي تتجاوز فيه: " كنت نشري باش نفطرو "
حكمها من دراعها و رجعها بلاصتها و هدر: " قتلك من قبل كي نعود نهدر معاك ما تروحيش حتى نكمل، وعلاه ما نوضتينيش كي عدتي خارجة "
فاطمة: " علاخاطر نعرف الدنيا هنا خير منك نتا، لي كي تحب تخرج قولي تعود تهمل و بعد من طريقي و البس حاجة ماكش في بيتك "
و مشات رايحة لكوزينة حتى حبسها صوتو:" هنا ولا في اي بلاصة قبل ما تتحركي لحتى بلاصة تقوليلي "
دورت شافت فيه من لفوق لتحت و هدرت:" كي تبوس عينك نولي نقولك "
و راحت توجد فالفطور و هي واقفة على رجل وحدة، لحقها سيف بعد ما لبس طريكوه و هدر بعدما حكملها يدها و جبدها للطابلة: " اقعدي انا درك نكمل "
فاطمة بحاجب مرفوع: " سبحان الله منين جاك التواضع "
سيف ببرود وهو متجاهلها: " ويني القهوة و فاش نطيبها "
فاطمة: " القهوة الفوق و لبراس قدامك "
كمل سيف يوجد و فاطمة ساهية فيه كيفاه يقدر انسان يكون بهاد الكمال حتى شخصيتو بدات تعجبها اصغر حركة منو تأثر فيها حتى صوتو ، فاقت من سهوتها على صوابعو لي طرشقهم قدام وجها و هدر بإبتسامة جانبية وهو يغمزلها: " وين رحتي؟! "
فاطمة بتوتر: " وين حنروح اني هنا "
سيف بنفس الإبتسامة: " انا قلت سهيتي فيا "
فاطمة: " علاه هدا شكون نتا براد بيت؟!.... "
قاطعهم عادل لي دخل و لقا عليهم تحية الصباح و قعدو يفطرو في جو هادي
.......................................
فالفيلا في بيت منار كانت هازة طيليفونها و تهدر بدلع: " ما نقدروش نتلاقاو اليومين هادو قاعدين نوجدو للحفلة تاع بنت عمي لعزيزة ههه"
الطرف الآخر: " بصح توحشتك "
منار بدلال: " البارح برك و انا معاك "
الطرف الآخر بخبث: " انا كي تكوني معايا نتوحشك و زيد واحد يكون عندو الزين كيما نتي و يشبع منو "
منار: " اممممم نحاول لاكان قدرت "
الطرف الآخر: " علابالي تقدري"
ضحكت منار و ردت: " اممم تعرفني بلي كي نحب حاجة نديها "
الطرف الآخر: " بصح بنت عمك تبانلي داتلك بلاصتك عند جدك على حساب الشوفة "
منار: " هههه ماكان حتى واحد يديلي بلاصتي و لابروف الشي لي تفاهمنا عليه "
الطرف الآخر: " انا لي تقوليلي عليها نديرها حبي"
عدلت منار رحها و هدرت بزربة: " انا نخليك ما عرف شكون جاي من بعد "
و زربت قفلت طيليفونها و دارت لمرايتها بعد ما سمعت الباب يطبطب: " ادخل "
دخلت سلمى و راحت عند بنتها باستها: " صباح الخير بنتي "
منار: " منين يجي الخير و انا نشوف في جدي موقف الدنيا و ما مقعدهاش و هدا كامل على جال الإحتفال بحفيدتو الغالية تقول غير هي حفيدتو "
سلمى: " انا ما فهمتش علاه قلقانة قتلك هادي فرصتنا باش نكرهو سيف فيها و نزرعو فيه الشك، الحفلة هادي في مصلاحتنا بصح غيرتك هادي هي لي ماشي في مصلاحتنا قتلك خممي بعقلك "
منار: " و لوكان ما تصلحش و لوكان هي تفيق و ما تمشيش كيما خططنا"
سلمى بخبث: " لازم ديما تكون عندك خطة B"
.................................................................
🙃🙃🙃🙃🙃🙃🙃ابشع بارت 🙃🙃🙃🙃🙃🙃🙃
أنت تقرأ
كرونيك عشق مخيف 🇩🇿💔❤️
عاطفيةكرونيك باللهجة الجزائرية 🇩🇿 تحكي على طفلة تربات و كبرت في عائلة تحبها قدهم قد رحهم أهم حاجة في حياتها عايلتها إنسانة طموحة تحب تخدم و تدير دراهم و توصل لأعلى المراتب بجهدها الدنيا سرقت منها باباها لي كان صديق و أخ ليها ماشي غير أب ، و يجي نهار لي...
