كرونيك عشق مخيف 🇩🇿💔❤️

Chapter 9

صوتو بليز
خرج سيف للجاردة قاعد في واحد من لكراسة لي محطوطين لتم في يدو قارو يتكيف و عينيه للسما يخمم علاه ما حملش يشوف الخوف في عينيها و هو يشوفو كل يوم في عينين الناس علاه في كل مرة دموعها يوجعوه علاه حاب واحد يجي يخلف الضربة لي ضربهالها علاه ما قدرش يعاقبها كيما كان يخمم علاه هي الوحيدة لي يحس بالتوتر هداك قدامها و علاه تضعف حصونو قدام أصغر أحفاد عايلتو، خرج الدخان من فمو و وجهو للسماء و من بعد هبطو بين يديه و نطق: "سيف افطن ما تخممش فيها ماتضعفش قدامها بيناتكم حداش سنة سيف فيق ماشي وقتو تلغي عقلك."
باقي في بلاصتو يتكيف ڨارو ورا التاني حتى سمع خطوات جايين عندو دور لقاه خوه، رجع لقعدتو يتكيف حتى وقف كريم عند راسو يشوف فالدخان لي مالي الطابلة قعد مقابلو و هو ساكت و جبد قارو شعلو شاف فيه سيف مخنزر و نطق: "تبانلي عدت ما تحتارمني ما والو تتكيف قدامي و تعلق على القرارات لي نديهم و زيد تدخل روحك في حوايج يخصوني."
تبسم كريم و هو يخرج الدخان من فمو و تكا بدرعيه على رجليه و نطق: " بيناتنا تلت سنين يعني ما تزيدش عليها فالدخان و علابالي كون ما قتليش الزوج هدرات الباقيين راك طرطڨت " و ضحك و كمل يتكيف
سيف: " كريم حنقولهالك آخر مرة، فاطمة درك راهي مسؤوليتي انا، ما نحبش نزيد نشوف ظلك معاها"
بقا كريم ساكت حتى كمل القارو تاعو و نطق: " علاه حبيت تدي مسؤليتها و انا و نتا علابالنا بلي راهي طفلة صعيبة ماهيش كيما هديل عاقلة ولا كيما منار لي همها كيفاه ترضيك علاه حاب تتحمل مسؤوليتها و نتا علابالك بلي الطفلة هديك تستفزك؟! "
باقي سيف ساكت يشوف في خوه واحد الربع دقايق و من بعد نطق: " كريم واش تحس كي تضرب هديل؟! "
شاف فيه كريم بنظرة لوم و نطق: " تهدر فيها كي شغل انا كل ما نشوفها نضربها"
هز سيف براسو بلا مبالاة و نطق: " ما يهمش وكتاه ولا قداه من مرة المهم ضربتها "
كريم:" هي لي تستفزني و تدير حوايج يخليوني نخرج على شعوري بصح كي نفيق مع روحي واش درت نندم و نتمنا يدي تكون تكسرت ولا نمدت عليها، نكره الشوفة لي تعود تشوفهالي خوف و لوم و عتاب"
باقي سيف يشوف فيه ساكت حس روحو ضاع كتر كي سقساه، واش معناها هادي؟! معناها هو يحب فاطمة!!!، كي وصل للنقطة هادي تبسم بسخرية و هز راسو، كريم باقي يشوف معاه و من بعد نطق: " ماحملتش دموعها؟! "
سيف: " شكون؟! "
كريم: " زعما شكون! فاطمة "
بدل سيف الموضوع و نطق : "ليوم الصباح كي جات عندي هديل للبيرو كانو الدموع في عينيها"
تنهد كريم و سيف كمل: " وكتاه آخر مرة شفتها تضحك كي تشوفك؟! النظرة لي كانت تشوف معاك بيها بدات تروح كريم عادت كل ما تشوف معاك نحسها تجرف و خايفة منك، حاول تصلح علاقتكم علاخاطر بدات تضيع من بين يديك، و أنا جامي دخلت بيناتكم و مانيش حنتدخل بصح كون نهار تجي عندي هديل و تشكيلي منك و لا تحب تبعد عليك تأكد بلي خيالها ما نخليكش تزيد تشوفو "
كريم: " هدرتك كامل مليحة و حنخدم بيها مي البارت اللخر هداك ندير روحي ما سمعتوش "
كان سيف حيجاوبو حتى شافو ياسر قرب عندهم و قعد: " ولاد خالي مدايرين قعدة و ما قالوليش؟! "
شافو فيه في زوج ببرود و نطق سيف: " شحنة تاع الدواء لي كنت حتخرجها بلا ما نعرفو راهي خرجت و بلا ما تعرف نتا" وقف و طابس عليه و كمل: "و المرة الجاية نفيق بيك تلعب تحت الطابلة نقلبها عليك " و طبطب على كتفو و شاف في خوه لي كان يتبسم بسخرية: " انا داخل "
هز طيليفونو و دخانو و مشا و لحقو كريم، أما ياسر فضرب الطابلة بيدو و نطلق: " يجي نهار لي نيطحكم فيه و تندمو "
(جماعة هوما عندهم شركة تاع الدواء ماشي يبيعو الكاشيات ههه)
.......................................