كرونيك عشق مخيف 🇩🇿💔❤️

Chapter 27

فالفيلا تلمو على الطابلة وقت لغدا كل واحد عينو في سحنو حتى نطق كريم: "ويني هديل؟!"
حنان: " من الصباح ما خرجتش من بيتها حتى لفطور ما نزلتش تفطر"
وقف كريم و هدر: " علاه ما قتوليش، حتى نسقسي باش تقولولي حاجة كيما هك؟! "
ما سناش جواب و طلع لبيتها حل الباب بلا ما يطبطب لقاها راقدة في سريرها ظهرها للباب قفلو بلعقل و راح قعد قدامها و يحرك في يدو على شعرها: " علاه ما نزلتيش "
هديل: " شبعانة "
كريم: " هيا نوضي تاكلي باش تروحي تشري حوايج للحفلة لي حنديروها "
دارت هديل عندو و تعدلت في قعدتها و هدرت بملل: " مانيش حابة نخرج معاك "
هز كريم حواجبو بصدمة و هدر: " صدمتيني ما لقيتش واش نقول؟! "
عاودت هديل رقدت و هدرت: " مالا اخرج و اقفل الباب "
وقف كريم و حط يديه في جيبو : " انا اصلا ماكنتش خارج معاك عندي خدمة و ما نقدرش نخلي الشركة وحدها، قلت بلاك حابة تخرجي وحدك تشري و تولي "
تعدلت هديل و هدرت بفرحة: " صح؟! حتخليني نخرج وحدي؟! "
كريم بخبث: " تؤ كنت، مادام ماكيش حابة تخرجي معايا تفرت فيك"
هديل برجاء: " خليني برك "
تبسم كريم بحنان و قدم عندها و حط وجها بين يديه و هدر: " ندير كلش المهم تكوني فرحانة تحبي عينيا نمدهملك ما تزعفيش برك "
تبسمت هديل و حظنتو و هدرت بهمس قدام ودنو: " ابقا هكا ما تتبدلش "
بعدها عليه و باسها من راسها و هدر: " روحي بدلي قشك و تهبطي نتغداو و من بعد تروحي و ما تطوليش قبل ما نرجع انا للدار نلقاك هنا "
هزت هديل راسها و هي تضحك و راحت تبدل قشها و هو تبسم و خرج
....................................................
فالسبيطار كانو مازالهم يسناو حتى خرج الطبيب من غرفة العمليات جراو عندو و هدر عادل بلهفة: " طمنا دوكتور نجحت العملية مَّا لاباس؟! "
تبسم الدكتوى و هدر بعملية: " العملية كانت شوي صعيبة بصح الحمد لله نجحت و درك نخرجوها من غرفة العمليات "
فاطمة: " نقدر نشوفها دوكتور؟! "
الطبيب: " ما تزيديش كتر على خمس دقايق هي اصلا مازال ما فطنتش "
سناتها حتى بدلولها البيت و دخلت عندها بقات واقفة تشوف فيها و راحت قعدت قدامها و بدات تهدر: " كنت حابة نجي هنا باش نعاود نحس نفس لحوايج لي كنت نحسهم من قبل نحس، باش نحس بالإنتماء و بلي راني مع عايليتي و مع الناس لي تعرفني و نقدر نكون مرتاحة معاهم، جيت باش نرجع ندخل لدارنا و باش نحس بلي رجعت لبلاصتي، بصح لالا ما صراش هكا مانيش حاسة بلي راني مع عايلتي و لبارح ما قدرتش نرقد فالدار لي نقول عليها دار، زدت تهت كتر و ما علاباليش واش ندير" سكتت تمسح فالدمعة لي طاحت و كملت: " مانيش قادرة نتقبلهم هوما و مانيش قادرة نحس معاكم كيما كنت نحس من قبل، بلاك كون من اللول صارحتيني كنت ناقبل الجيهتين و ما نبقاش هكا ضايعة " تنهدت و وقفت طابست على راسها باستو و هدرت بهمس: " نتمنى تسامحيني على كلش درتو علاخاطر هادي آخر مرة حنتلاقاو فيها "
و خرجت راحت عند عادل حضنتو و هدرت بهمس: " حنتوحشكم سامحوني على كلش و قول لماما بلي بنتها تحبها " و بعدت عليه مشات عند سيف و هدرت بهمس: " هيا نروحو "
خرجو و كي وصلو للطونوبيل وقفت فاطمة و دارت شافت فالسبيطار: " هنا خلصت حياتي لقديمة و درك تبدا حياتي لجديدة "
............................................................
في بلاصة خلاف في واحد الريسطو شيك كانت منار قاعدة و مقابلها واحد حاكملها يدها و يهدر: " كنت علابالي بلي حتجي "
منار بغرور: " ماجيتش على جالك، جيت باش نتفاهمو "
جبد يدو من يدها و تكا على الكرسي و هدر: " ما نتافهمو على حتى حاحة حتى 😉" و غمزلها و تسبم بخبث
منار بملل : " خالد ماشي ليوم و اصلا علابالك ما عنديش الوقت ولازمنا نتفاهمو الحفلة بقالها يومين "
خالد: " اوك بصح مورا الحفلة نحب نهار كامل ليا "
منار: " اوك اوك، المهم لازمك تخرج قدام فاطمة قبل الحفلة باش فالحفلة تبانو بلي تعرفو بعضاكم "
خالد: " و هادي كيفاه نديروها و نتي قاعدة تقوليلي بلي سيف ديما معاها و اصلا الحفلة مورا يومين "
منار بخبث: " هديك خليها عليا المهم نتا كي نقلك نتلاقاو فالبلاصة الفلانية تكون لتم "
خالد: " تفاهمنا، و فالحفلة واش يصرا؟! "
منار: "......
...........................................................
و الله كملتو الصباح و نسيت ما حطيتوش 🙂🙃
bouheraouatasnim