كرونيك عشق مخيف 🇩🇿💔❤️

Chapter 21

كانت فاطمة قاعدة مع سيف و الغصة حاكمتها حابة تبكي بصح ماشي قدامو، وقفت وهو شاف معاها بحاجب مرفوع و هدر: " وين؟! "
فاطمة بحدة: " حنغسل ولا ممنوع تاني"
حرك الفك تاعو جيهة ليسار و وقف و هدر وهو يشوف في رجلها: " رجلك ما تقدريش تمشي بيها مليح هيا نوصلك "
فاطمة بسخرية: " اممممم درك تفكرت بلي رجلي ما نقدرش نمشي بيها بصح قبيل تجر فيا موراك نورمال!!! "
سيف: " كنت قلقان ما تولهتش"
هزت فاطمة راسها و هدرت ببرود: " و درك تاني ما تتولهش خير بعدلي خليني رايحة "
تنهد سيف و هو يشوف فيها تعرج برجلها بقا يعس فيها حتى دخلت، باقيين عينيه معلقين مع الباب يسنا فيها تخرج حتى جاب السارفور الماكلة و بدا يحطها قدامو.
سيف: "كاين باب يخرج من ليفيسيير؟!"
السارفور وهو يشوف في سيف بشك: " لالا موسيو ماكانش "
هز سيف راسو و وقف راح جيهة الباب سمع صوتها تبكي زير على يدو و الفك تاعو علاه كل ما يحب يقرب منها يصرا العكس تنهدر و رجع بلاصتو أما عند فاطمة كانت واقفة قدام لمراية و دموعها يهبطو حاسة بلي كلشي ضدها و ماهيش قادرة تتأقلم ما وضعها لجديد كيفاه حتقدر تتعايش معاهم و هوما واحد فيهم ما مقدر انها جديدة في عايلتهم تنهدت و مسحت وجها و خرجت.
....................................................
لعشية فالفيلا كان الجد قاعد فالحديقة و معاه حفادو في تلاتة و بنتو و مرت ولدو، حيث هديل و مرت عمها متاقبلين يحكيو على أمور الحفلة و سلمى و منار يشوفو و ماش عاجبهم الحال.
دخل كريم لقى عليهم السلام و دار باش يدخل لداخل.
حنان: " وين رايح كريم اقعد معانا شوي "
كريم و عينيه على هديل: " عندي عشاء تاع خدمة طالع ندوش و نبدل قشي"
منار بخبث: "معامن مع سيليا؟!"
هز كريم راسو و عينيه مازالو على هديل يشوف في وجها لي عبس.
ياسر: " بصحتك ولد خالي عشاء مع وحدة زلة كيما هديك "
الجد بعياط: " ياسر احترم روحك و اتربا "
حط ياسر راسو و ما هدر والو و هديل وقفت و ستأذنت و عدات قدام كريم بلا ما تشوف فيه اما هو تنهد وهو يشوف معاها طالعة لبيتها و علابالو بلي زعفت.
الجد: " واش مداير لبنت عمك "
كريم: " ماكان والو جدي مشكل صغير و نحلوه "
حنان: " ولدي راهي أمانة عندك "
هز كريم راسو و طلع لبيت هديل حل الباب لقاها واقفة قدام طاقتها و دموعها على خدها و كي شافتو مسحت دمعتها بزربة و بقات تشوف مع طاقتها.
كريم: "وجدي روحك تروحي معايا للعشاء"
هديل بسخرية: "أمر هدا ولا كيما نحب"
كريم.: " كيما تحبي "
هديل: " مالا مانيش راحية، enjoy your time "
تنهد كريم و خرج خبط الباب موراه علاه قاعدة تبعد عليه هكا و هديل بقات تشوف فالأثر تاعو و تخمم اذا تروح ولا لالا
..............................................
وصل سيف و فاطمة للسبيطار ڨارا الطونوبيل تاعو و شاف في فاطمة شاف التررد في عينيها حط يدو على يدها و زير عليها و هدر بتشجيع: " هيا ننزلو "
هزت براسها و نزل هو و نزلها مدلها ليبيكيل و مشا قبلها وقف فالإستقبال شافت فيه الفرملية و عينيها ڨلوب.
سيف بجدية: "نحوسو على مدام سامية......... "
الفرملية بصوت مايع : "وي موسيو تفضل اقعد درك نشوفلك"
فاطمة بإندفاع: " لالا فرشيلو يشرب قهوة خير "
تبسم سيف و هو يشوف فالفرملية تبدل وجها و هدرت بجدية: " بلعقل مادموازال راني ندير في خدمتي "
فاطمة: " ديري خدمتك مالا ڨدڨد "
سيف بهدوء: " بلعقل فاطمة، مادموازال شوفيلنا وين نقدرو نلقاوها "
تبسمت الفرميلة و شافت فالميكرو ڨدامها و هدرت بنفس النبرة المايعة: " الطاج التاني فالعناية موسيو "
سيف بإبتسامة: " ميرسي هيا فاطمة "
شافت فاطمة فالفرملية و هدرت بحدة: " المرة الجاية كوليه "
ضحك سيف و هز راسو و هو يدز فيها بلعقل باش تمشي و هدر بهمس قدام ودنها: " بنت عمي الصغيرة تغير؟! "
فاطنة بتوتر من همسو و قىبو كتر من سؤالو : " علاه نغير؟! قلقتني وهي تتعوج و نتا تضحكلها "
تبسم و كمل طريق معاها حتى وصلو ڨدام الباب تاع غرفة العناية جبست فاطمة و حبست النفو تعها في صدرها و تنهدت بقوة قربت للطاقة تاع السجاج لي بعرض الحيط و حطت يدها عليها و دموعها بداو ينزلو على خدها.
.....................................................
فالفيلا خرج كريم من بيتو وهو لابس سروال كلاسيك و شوميز فلكحل مع صباط بكلاسيك في نفس اللون