عدا النهار على هديل و فاطمة فالحديقة تاع لقصر قاعدين يشايخو حتى تحلت البوابة و دخلت طونوبيل كحلة عرفتها فاطمة مليح طونوبيل تاع سيف لي حبت تهرب منها قداه من مرة تبسمت بسخرية و كملت تحكي مع هديل حتى وقف عندهم سيف بلسروال جين كحل و وشوميز بيضة و فيسط كلاسيك كحلة.
سيف بجدية: " واش قاعدين تديرو هنا؟! "
فاطمة ما شافتش فيه حتى و هديل جاوبتو: " قاعدين برك "
سيف و عينيه في فاطمة : " علاه ما قعدتوش لداخل؟! "
طلعت فاطمة راسها شافت فيه و جاوبت ببرود: " وعلاه ما نڨعدوش هنا؟! "
طابس سيف و هدر بين سنيه: " علاخاطر الحراس واقفين منهيه يتفرجو فيكم "
شافت فيه فاطمة بنظرة تحدي: "رانا لابسين قشنا و قاعدين ماشي واقفين نشطحو"
باقي سيف يشوف فيها بنظرات غضب و هي تاني و هديل في وسطهم حايرة واش تدير حتى هدرت بلطف: " ما تولهناش المرة الجاية ان شاء الله "
عدل سيف وقفتو و قبل ما يهدر صونا طيليفون هديل استئذنت منهم باش تجاوب و بقا سيف يشوف في فاطمة حتى هدرت هي باش تستفزو: " غدوة نتا لي حتديني لدارنا!! "
تبسم سيف ببرود علاخاطر علابالو مليح وين حابة توصل و هدر بجدية: " أنا ماشي مديك علاخاطر جدي حب نديك، لالا، "
طبقت فاطمة يديها وشافت فيه بسخرية و هدرت: " وعلاه مالا مديني ما تقوليش قلبك حنين وما حملتش "
طابس سيف حتى ولاو يتنفسو في نفس لهوا و هدر: "مديك باش كي توصلي و تشوفيهم تفهمي بلي ما ولاوش يعنيولك كيما قبل و بلي الشي لي راكي حاستو درك راهو غير تأنيب ضمير"
بلعت فاطمة ريقها و بعدت عينيها من عينيه علاخاطر هادي هي النقطة لي قاعدة تهرب منها و سيف تبسم بثقة و بعد عليها و مدلها يدو: " هيا ندخلو "
شافت فاطمة فيدو و حكمت فيه و وقفت و كانت حتهز ليبيكيل تعها بصح سيف سبقها و هزهم.
.....................................
فالدار كانت العايلة ملمومة على الطابلة يسناو في فاطمة و هديل باش يدخلو حتى نطقت منار: "اووف هديل وحدها تقيلة و زادولها هديك"
هز كريم راسو و خزر فيها: " خيري الكلمات لي تخرجيهم من فمك كي تهدري على هديل "
منار بسخرية: " و كون ما نخيرش سي كريم واش يصرا؟! "
تبسملها كريم ابتسامة باردة و هدر: " تحبي تجربي؟! "
طارق بعصبية: " كريم احتارم روحك و اعرف بلي راك تهدر مع بنتي بالطريقة هادي و أنا قاعد"
الجد: "طارق ربي بنتك و علمها كيفاه تهدر على بنات خوالها و مع ولاد خوالها و من بعد لي يغلط فيها أنا نحاسبو"
منار بتمسكين: "ماشي قصدي جدي هدرت هك..."
هز الجد يدو و قاطعها: " انا قلت لي عندي خلاص "
سكتت و هبطت راسها تلعن فيهم كامل كانت مهما تدير جدها ما يهدرش معاها بصح بدا يتبدل عليها ملي دخلت فاطمة لحياتهم.
هوما هكاك و دخلت هديل لي كانت سمعت كلش من اللول و فرحت انو كريم مهما يكونو بينهم مشاكل ما يبينش قدام العايلة و ما يخلي حتى واحد يغلط فيها .
محمد: " ويني بنت عمك هديل؟! "
هديل بإبتسامة و هي تقعد في بلاصتها: " أم جايين "
حنان بإستفهام: " جايين؟! "
قبل ما تجاوب هديل دخل سيف و فاطمة مكروشيا فيه و يديها في زوج في يدو، الجد تبسم بإمتنان و هكاك باقي العايلة أما سلمى و عايلتها كانو يشوفو فيهم بنظرات حاقدة و خاصة منار لي حبت تقتلها في هديك اللحظة كي شافت سيف جبدها الكرسي و قعد قدامها، أما فاطمة وجها حمار من الموقف لي هيا فيه و العينين كامل عليهم بصح ما قدرتش تنكر حقيقة انو قربو يأثر فيها و يخلي قلبها يضرب بقوة.
الجد بإبتسامة: " كي ترجعو نشاله و تنحي فاطمة لجبيرة قررت نحتافلو ونعرضو العايلة و الناس لي قراب لينا و الصحافة باش العالم كامل يعرف بلي حفيدتي رجعتلي "
كور سيف قبضتو و زير الفك تاعو و دار شاف في جدو: " و من وكتاه حنا بناتنا نعتوهم للناس و للصحافة "
الجد: " هادي حفيدتي و فرحان كي رجعتلي و حاب الناس كامل يعرفو بلي كاين فرد خلاف فالعيلة و لازم يديرولو حساب "
سيف بتذمر و رفض: " جدي"
الجد: " أنا قتلكم باش توجدو أموركم على هاد الأساس "
دار ياسر عند ختو لقاها مهبطة راسها و هازة الموس و تتكا عليه حط يدو فوق يدها و هدر: " ماشي وقتك "
منار بهمس: " ماكش تشوف في جدك واش قاعد يدير على جالها و سيف غاير عليها؟! "
ياسر: "كلشي حيكون في يدنا خليني أنا و مك نخممو و نوعدك كلشي حيكون كيما تحبي و كتر"
و كملو عشاهم كل واحد فاش يخمم و كان سيف أول واحد يوقف و قبل ما يخرج حبسو الجد: " سيف اسبقني للبيرو حاب نحكي معاك "
هز سيف راسو بإيه و خرج و الجد دار شاف في فاطمة و وقف مسحلها على شعرها و هدر بحنان: " ما تسهريش بزاف بنتي غدوة عندك طريق طويلة "
فاطمة: " حاضر جدي تصبح بخير"
.......................................................
فالبيرو دخل الجد لقا سيف قاعد و يتكيف
الجد: " طفي علينا الرهج لي تشرب فيه "
طفاه سيف و هدر بسخرية: " تحب نفكرك يا جدي منين تعلمت نشرب الرهج هدا؟! "
الجد: " خلاص فهمنا بصح راك عندك عقل تخمم بيه ماشي لازم كلشي كنت نديرو أنا لازم تديرو نتا "
مسح سيف على وجهو بملل و هدر: " جدي ما جبتنيش هنا باش تقولي حبس الدخان "
الجد بتلميح: " ما نهدرش غير على الدخان حتى تعاملي أنا مع جداتك ما نحبكش تتعامل بيه نتا تاني "
رجع سيف راسو لورا و تكا بظهرو و هدر: " جدي تعرفني مليح و نعرفك مليح اهدرلي واش حاب تهدر ديراكط بلا مقدمات "
الجد بإشمئزاز: " علمتك كلش غير كيفاه تهدر ما علمتكش "
تبسم سيف و هدر: " و الله كنت حنقولك حاجة و من بعد تفكرت بلي راك جدي "
الجد بسخرية: " كتر خيرك فيك الخير "
سيف: " جدي حاب نرقد غدوة حندي حفيدتك لعزيزة عندي طريق طويلة قولي واش حاب تقول "
الجد: " نحبك كيما تديها تجيبها سيف ما نحبش كل مرة تخرج معاك فيها ترجعهالي تبكي و مضروبة "
سيف: " المرة لي فاتت هي حبت تهرب من الطونوبيل و تكسرت هي لي مهبولة واش نديرلها؟! و لاكان على الكف ندمت عليه "
الجد: " سيف كيما قلتها انا نعرفك مليح و علابالي علاه راك تتعامل معاها هكا"
سيف: " علاه؟! "
الجد: " علاخاطر تحبها و ماحب حتى واحد يكون ڨريب منها حابها ليك وحدك و غير نتا تشوفها و غير نتا تسمعها و غير نتا تهدر معاها نعرف مليح هاد الشعور و نعرف مليح وين يوصّل و كيفاه هي حتعيش معاك بهاد الإحساس لي راك تعيش بيه بصح "
سيف: " بصح واش؟! "
الجد: " أنا موحال نخليك تأذيها ولا تحرمها من حاجة تحبها "
تبسم سيف و هز راسو وقف باش يخرج بصح الجد كمل: " و لوكان هي ما تقبلش تكون معاك ولا ما تحبكش سامحني سيف بصح أنا أول واحد حيوقفلك "
سيف: "و أنا مدامني نحبها نديها نديها و لوكان ما نديهاش أنا موحال نخليها تكون لواحد خلاف"
و خرج خلى الجد يتمتم: " نشاله ما تكونش كيما أنا و تندم فاللخر "
........................................
في بيت فاطمة كانت قاعدة و هديل قدامها تخيرلها باش تروح غدوة، هزت هديل سروال و ليكاط نواغ نعتتهملها: " هادو باهيين و مستورين ولد عمك ما يديرلكش عليهم حكاية "
فاطمة: " هيه خليهم غدوة نلبسهم، اسناي اسناي السروال ما نقدرش نلبسو رجلي مجبسة "
هديل بغباء: " بصح اكي لابسة سروال"
فاطمة: " فيه سانسور على لجناب ، نورمال شوفيلي تعيشي كاش jupe ولا غوب "
هديل: " أوك، اممممم شوفي هادي طويلة و مليحة "
فاطمة: " المهم تكون مستورة رايحة مع المختل تاع ولد عمك "
تبسمت هديل و هدرت بخبث:" اهيه مالا واش حكاية داخلة مكروشيتو و يدك في يدو؟!"
فاطمة بتوتر: "ما كان والو نتي دخلتي قصدي كي رحتي هو حكا معايا و من بعد دخلنا و هو هز ليبيكيل و حب يعاوني" و كملت بشرود: "بصح كل مرة نقول بلي هو انسان عادي و حنين و يتصرف كيما الناس الطبيعيين يخرج خرجة جديدة"
هديل: " واشمن خرجة؟! "
فاطمة: " ما شفتيهش قبيل غير جدي قال بلي حاب يحتافل كي تلمينا هو بدا يعيط "
هديل: "يعني ماكيش حاسة بلي هادي غيرة؟!"
فاطمة: "وعلاه حتى يغير مني؟!"
ضربتها هديل في راسها و هدرت: "يا لحمارة قصدي يغير عليك"
فاطمة قلبها بدا يخبط بالقوي و وجها حمار: "كيفاه هادي يغير عليا؟! اصلا واحد يحب وحدة يغير عليها" و عبست بوجها و كملت: "وهو خاطب منار"
هديل: "لالالالالا هادي التكشيرة لي درتيها كي قلتي مخطوبين تبين بزاف حوايج احكي احكي"
فاطنة بتهرب: "نتي اكي تطعزي و انا نعاند فيك خلينا منو احكيلي واش ناوية تديري مع كريم"
ضيقت هديل عينيها و هدرت: "ندير روحي مأمنتك و خلاص بصح يجي نهار لي تجي فيه وحدك و تحكيلي"
و كملو سهرتهم وراحت هديل لبيتها و فاطمة تاني حكمت بلاصتها و رقدت و بعد ساعة دخل عندها سيف، قرب عندها و بعدلها شعرها على وجها و بقا يشوف فيها، قرب شعرها ليه يشم فيه و هدر بهمس: " موحال نخليك لواحد خلاف نموت و ما نخليش عبد خلاف يشوف واش راني نشوف درك "
و باسها من جبينها و خرج راح لبيتو.
#######################
خلصتلي كونكسيون 🥲🥲🥲 علاهاديك ما حطيتش لعشية LinaYasmine360
و كلش مبروك لي داو الباك و لي ما داوش العام الجاي نشاله
أنت تقرأ
كرونيك عشق مخيف 🇩🇿💔❤️
Romanceكرونيك باللهجة الجزائرية 🇩🇿 تحكي على طفلة تربات و كبرت في عائلة تحبها قدهم قد رحهم أهم حاجة في حياتها عايلتها إنسانة طموحة تحب تخدم و تدير دراهم و توصل لأعلى المراتب بجهدها الدنيا سرقت منها باباها لي كان صديق و أخ ليها ماشي غير أب ، و يجي نهار لي...
