صوتو بليز
نهار جديد على أبطالنا ناض سيف لي أصلا ما رقدش دوش و راح للبيرو تاعو يلم فالدواصا لي يحتاج كي خرج شاف في بيت فاطمة كاينة حاجة قاعدة تدفع فيه باش يروح يشوفها بصح هو قرر يبعد عليها لا هو رايح يستفاد ولا هي، كان هابط فالدروج قابلتو منار: "صباح الخير سيف"
طلعهاو هبطها و هدر: "بباك و خوك شافوك اليوم؟!"
تبسمت و جاوبتو بدلع: "درك ورن شفت papa بصح ياسر مزال علاه كاشما حتجتهم؟! نروح نعيطلهم؟!"
هز سيف راسو: "ما نحتاجهمش"
و هبط و خلاها وافقة لحقتو تجري و تهدر: " اممم سيف خممت نخرجو أنا وياك لكاش بلاصة نتعشاو واش رايك؟! "
سيف: "من وكتاه كنت نخرج انا و نتي؟! "
دخل للصال آمونجي لقاهم كامل قاعدين غير كريم و عمتو و ولدها، قعد في بلاصتو بعد ما باس راس جدو و شاف في بلاصة كريم الفارغة و نطق: " وينو كريم مزال راقد؟؟ "
جاوبتو هديل بحماس: "لالا راح للخدمة بكري باش نروحو نتغداو"
تبسم سيف كي شاف الفرحة في عينيها، و هديل شقرت كي فاقت بلي تحمست زيادة شافت مرت عمها تشوف معاها و تتبسملها بحنان، علابالها بلي العلاقة بين كريم و هديل فيها مشاكل بصح ما تحبش تدخل علابالها في زوج يحبو بعضاهم و فاللخر يتصالحو
منار بغيرة: "و علاه حتى تتغداو برا يخي كاينة الماكلة هنا؟!"
سمطتها هديل ما حبتش تجاوبها و واحد ما قيمها.
بقاو ساكتين حتى نطقت هديل برجاء وهي تشوف في سيف: "سيف نقدر نروح عند فاطمة بين ما جا كريم؟!"
سيف ببرود: "سمعتيني واش قلت البارح هديل"
شافت هديل في جدها باش يهدر معاه هو
الجد: "سيف خليها تدخل عندها خمس دقايق و تخرج الطفلة أصلا مريضة"
سيف: "جدي مدام هدا هو عقابها لازم تتعاقبو أصلا تحمد ربي لي رجلها تكسرت كون أنا لي كسرتهالها و كون هاد المرة نتساهل معاها فالعقاب حتتمادا كتر"
نطق كمال: "تدير واش تدير يا سيف ما تقدرش تبدل حقيقة انها ما ترباتش في هاد العايلة و أكيد حيجي نهار لي توطي فيه راس العايلة"
خبط الجد الطابلة و سليم عقد حواجبو و قبل ما يجابوبو حتى واحد فيهم نطق سيف ببرود: "كون جا كل واحد يتربا فالدار هادي مربي كون ولادك راهم هكاك، و قبل ما تهدر على فاطمة شوف بنتك المتربية واش لابسة"وقف عيط لزينة و كمل: "وجدي لفطور لفاطمة و طلعهولها و مديلها دواها و لازم تشربو"
زينة: "حاضر ميسيو سيف"
هز طيليفونو و مفاتحو و شاف بسخرية في منار لي بدات تهبط فالجيب تعها لي واصل لنص فخضها و قبل ما يخرج مد مفتاح البيت تاع فاطمة لزينة و وصاها ما تمدو لحتى واحد.
دخلت سلمى و ياسر وهو يتبسم وحدو قعدو في بلايصهم و كل واحد فيهم يخمم في أفكار يضيعو بيها فاطمة.
.....................................
ناضت فاطمة من رقادها تشوف فالبيت ما قدرتش تنوض من بلاصتها بسبة رجلها حتى سمعت مفتاح يدور فالباب استغربت وكتاه قفلو عليها و سمعت صوت زينة من برة تسقسيها اذا تقدر تدخل، عدلت فاطمة رحها في سريرها متكية على ظهرو، دخلت زينة هازة في يدها بلاطو حطتو فالطابلة و قدمتها ليها و نطقت: "مادموازال فاطمة موسيو سيف بعتلك لفطور و الدواء تاني معاه"
مع سيرة سيف قلبت فاطمة عينيها و هدرت: " ادي الدواء على روحك ما نشربوش "
زبنة بشوية خوف: " بصح مادموازال موسيو سيف قال لازم تشربيه "
فاطمة بملل: " أوك خليه برك" و كملت بإبتسامة" و اسمي فاطمة ماشي مادموازال "
زينة: " بصح مادم..... "
قاطعتها فاطمة بإبتسامة: " ما نحبش واحد يعيطلي هكاك نقلق"
زينة بنفس الإبتسامة: "كيما تحبي فاطمة، كاشما تحتاجب نديرلك؟! "
فاطمة ببعض الحرج: " ما قدرتش نروح وحدي للدوش لاكان تقدري تعاونيني "
تبسمت زينة و قربت عندها وقفتها داتها للدوش و راحت جبدتلها واش تلبس باش تخليها على راحتها، خرجت فاطمة و عاونتها زينة و بدلت قشها و بقات تاكل بعد ما هبطت زينة و عاودت قفلت عليها الباب، كملت فطورها وشافت فالدواء لي قدامها و هزتو رماتو قدام سريرها فاللرض و هي تهدر مع رحها: "قال لازم تشربيه زعما خايف عليا وهو لبارح ضربني شوية و فزدلي وجهي"
بعد نص ساعة رجعت زينة هزت لبلاطو و عاونت فاطمة تقعد قدام الطاقة خير من قعدتها فالسرير
.............................................
فالشركة دخل سيف و الموضفين كامل يشوفو فيه بخوف و غيرة و إعجاب، دخل للسانسور (المصعد) طلع ديراكط لبيروه دخل و دخلت موراه السكريطيرة تاعو تمشي و تتمايل هدفها كيما هدف كل وحدة تشوف سيف و دراهمو تلفت انتباهو و تغريه، قعد في كرسيه و هي بدات تملي عليه فالجدول تاعو تاع اليوم و تدير في لقطات يبينو مفاتنها.
سيف ببرود و عينيه في وراقيه: "قولي لكريم يجيني"
السكرتيرة: "حاضر ميسيو سيف"
و خرجت بنفس الطريقة لي دخلت بيها، و بعد مدة قصيرة تحل الباب و دخل كريم، شاف فيه سيف و نطق بملل: " وكتاه تتعلم بلي البيبان خدموهم باش يطبطبو عليهم؟! "
قعد كريم فالكرسي و جاوبو بإبتسامة:"يخي هدا البيرو تاعك باينة كي ندخل حنلقاك تخدم ماكش تبدل في قشك، غيرلاكان خايف نحكمك في وضع مخل للآداب هديك هكاية خلاف "
سيف: " كريم اتربا "
كريم بنفس الإبتسامة: " علاه عيطتلي؟! "
سيف: " حندخلو في صفقة مع شركة قصي بن سليمان "
كريم بجدية: " بصح رانا أصلا قاعدين نجيبو فالمحاليل من شركة M. F CHIMIQUE "
سيف: " العقد تاعنا معاهم يخلص مورا شهرين "
كريم: " بصح علاه ما نجددوش العقد معاهم كيما كل مرة، رانا كتر على خمس سنين نتعاملو معاهم و جامي صرالنا مشكل "
حط سيف يديه فوق البيرو و هدر: " تعرف بلي باباهم مات عندو شهر و درك يبداو يتنافسو شكون يدي إدارة الشركة و حنا ما علابالناش في يد شكون حتطيه على هديك خليهم يحلو مشاكلهم بعيد علينا هادي راهي خدمة ما يدخل فيها لا مشاعر لا صديق لا والو "
وقف كريم و هدر وهو يعدل فالشوميز تاعو و لافيسط كلاسيك لي لابس: " و الله أنا معاك في كل قرار تديه راك تعرف مصلحة الشركة خير منا "
تبسم سيف و هدر: " كملت خدمتك؟! "
هز كريم راسو بإيه و حاوبو: " كملت و درك راني خارج حنتغدا أنا و هديل برا اليوم "
سيف: " بلا ما نوصيك كريم راهي أمانة عندك"
تبسم كريم و هز راسو و خرج أما سيف فبقا يشوف فالدواصا لي قدامو و تخمامو كامل عند فاطمة، هز طيليفونو و عيط عند زينة
زينة: " ألو مسيو سيف "
سيف بجدية: " ناضت فاطمة؟! "
زينة بعملية: " هيه ناضت و طلعتلهت لفطور و الدواء "
سيف: " ساعة ساعة روحي شوفيها كاشما تحتاج "
زينة: " حاضر موسيو سيف "
.................................................
كانت هديل واقفة قدام مرايتها تشوف مع رحها باش تتأكد من طلتها حتى شافت الباب تحل و دخل كريم لي تبسم من تبسيمتها و قرب عندها هبط باسها من خدها، دارت هديل على رحها تنعتلو في لبستها لي كانت عبارة على غوب صيفية بيضة طويلة لتحت ركبتها واسعة مع صوندال بيضة عالية شوية
أنت تقرأ
كرونيك عشق مخيف 🇩🇿💔❤️
Roman d'amourكرونيك باللهجة الجزائرية 🇩🇿 تحكي على طفلة تربات و كبرت في عائلة تحبها قدهم قد رحهم أهم حاجة في حياتها عايلتها إنسانة طموحة تحب تخدم و تدير دراهم و توصل لأعلى المراتب بجهدها الدنيا سرقت منها باباها لي كان صديق و أخ ليها ماشي غير أب ، و يجي نهار لي...
