كرونيك عشق مخيف 🇩🇿💔❤️

chapter 8

صوتو بليز
دخل سيف للصالة لقاهم مازال كيما راهم ساكتين قعد و شاف في جدو و نطق بصرامة:" جدي من اليوم أنا لي مسؤول على فاطمة ما نحب حتى واحد يتدخل فيها ولا يدخل بيناتنا كل قرار متعلق بيها أنا لي حنديسيديه "
الجد بإستفاهم :" قاعد تعلم فيا ولا تشاور فيا ؟!"
سيف بإبتسامة باردة :" تبانلي جدي فهمتني واش نقصد"
شاف كريم في جدو و نطق:" جدي ماكاله تخليه هو المسؤول عليها رانا كامل عارفين سيف "
هز سيف حاجبو وهو يشوف في خوه و من بعد وقف و قرب عند ودنو وهمس:" تبانلي نتا آخر واحد يهدر على المعاملة سي كريم "
بعد عليه و عيط على زينة (خدامة) لي جات وقفت و هي مهبطة راسها و نطقت:" انعم موسيو سيف "
سيف:" وجدي لعشا لفاطمة في بلاطو و كي تكمليه عيطيلي أنا نطلعو "
نطقت منار:" و الله مليحة هادي حنا من الصباح قاعدين نسناو فيها و درك كي جات يطلعلها لعشا تتعشا و حنا جيعانين "
شاف فيها سيف و نطق وهو مخنزر:" تبانلي واحد ما حتم عليك ما تاكليش "
منار وهي تدبل في عويناتها:" ماشي قصدي سيف ، من الصباح و حنا قلقانين عليها و ما قدرناش ناكلو وهي درك حتاكل كلي ما صرا والو "
شافو فيها كامل بصدمة كيفاه قادرة تكذب كيما هك ؟!!
...........................
في بيت فاطمة كانت متكية تبكي و هديل قدامها هي تاني دموعها هابطين و تمسحلها على راسها و نطقت :" خلاص فاطمة عدات"
فاطمة وهي تبكي:" حابة نروح لدارنا ما نحبهمش"
سكتت هديل وهي تشوف مع خدها لي فيه علامة زرقا من الكف تاع سيف و نطقت وهي حاطة يدها على خد فاطمة:" سيف لي دارلك هك ؟!"
زادت فاطمة في وتيرة البكاء تعها لي خلا هديل تحظنها حتى هدات بعدتها هديل عليها و نطقت:'' نخليك ترتحي و غدوة نهدرو "
هزت فاطمة راسها و هديل طفات ضوء تاع البيت و شعلت ضوء خفيف تعرف فاطمة تخاف من الظلمة و خرجت هبطت لتحت لقاتهم ساكتين كل واحد فاش يخمم راحت قعدت قدام كريم و نطقت بهمس:"ضربها "
هز كريم راسو بإيه و سكت ماحابش يهدر قدام سيف .
جات زينة وقفت فالباب تقلهم بلي لعشا وجد و بلي عشاء فاطمة تاني وجد ، مشاو للطابلة كل واحد في بلاصتو و سيف راح للكوزينة هز لبلاط و طلع عندها طبطب كي ما سمع حتى رد منها حل الباب و دخل حط لبلاط على حافة تاع السرير و شعل الضوء و حط طابلة قدام السرير جيهة فاطمة و حط فوقها السني و نطق:" نوضي تتعشاي "
بقات مسمطتو و هو مسح على وجهو و نطق بهدوء:" استغفر الله.....نوضي تاكلي هدرت معاك علابالي راكي فاطنة "
جاوبتو بصوت مخنوق من لبكا:" ما عينيش ناكل "
سيف ببرود:" مانيش نسقسي فيك قتلك تنوضي معناها تنوضي "
حلت عينيها وشافت فيه و نطقت بعياط:" قتلك ما ناكلش ما تفهمش ؟!"
نحنى عندها و حكمها من كتافها قعدها و نطق من تحت سنيه و وجهو قريب من وجها:" صوتك هدا يا تريڨليه يا نريڨلو علاخاطر مانيش حنصبر عليك كتر من هك "
طلعت يديها و حطتهم فوق ذرعيه و هبطتهملو و نطقت:" ما تزيدش تهدر معايا درك ما تزيدش تسمع صوتي لا عالي لا واطي "
وقف تبسم وحك لحيتو لخفيفة و نطق:" من هنا ورايح تبانلي حتسمعي غير صوتي أنا "
بقات تشوف فيه بعينيها لحمر لي تنفخو بالدموع و هو هبط عينيه يشوف مع خشمها لي حمار و شواربها لي تنفخو وحمارو هوما تاني ، حرك راسو و استغفر من الأفكار لي جاوه و قربلها لبلاط و نطق بصرامة :" كولي"
شافت فيه بعناد و نطقت :" مانيش ماكلة ،............. بالسيف؟؟"
حرك لسانو داخل فمو دليل على أنو وصلت بيه للخر و قعد قدامها فالسرير و هز مغرف من la soupe لي جابلها و حكملها فمها بيدو لخرا تكا على الفك تعها لقاها عيطت و حطت يدها بزربة على صوابعو لي في خدها ليسر ، حط المغرف و دورلها وجها يشوف واش وجعها ، شاف لبلاصة وين ضربها زرقة كور يدو و زير الفك تاعو حتى بانو لعروق تاع رقبتو ، و قف رايح جيهة الباب و نطق بلا ما يشوف فيها :" نجي نلقاك كملتي ماكلتك!"
خرج و هي بدات تعوج في فمها تعكي عليه:" نجي نلقاك كملتي ني ني ني"
د

ورت للماكلة و بدات تاكل و هي تتبسم هي أصلا كانت جيعانة بصح حبت تعاندو برك .
أما سيف فهبط للكوزينة هز ڨلاص و رجع عندها دخل لقاها مازالت تاكل قعد فالكرسي ساكت وهي طلعت راسها شافت فيه و كملت الماكلة كي شغل ماهوش قدامها رغم التوتر لي حكمها ، بعد مدة قليلة حطت المغرف وشافت فيه :" حتبقا هكا تشوف فيا ؟! ما عندكش خدمة خلاف تديرها ؟! "
شاف فيها ببرود و نطق:" كملي ماكلتك "
نسفت فاطمة و بعدت عليها الطابلة عدلت رحها و نطقت:" شبعت"
وقف سيف و قعد قدامها و حكملها الفك تاعها هي غمضت عينيها خايفة كاشما يديرلها و هو حطلها الثلج على خدها و ما حملش نظرة الخوف لي فيعينيها ، باقي يشوف في وجها عينيها لي لونهم خاطفو من نهار شافها فالتصاور و وجها الصافي كي السماء و شواربها لي حاسهم أكبر لعنة عليه بدا يقرب بوجهو ليها بلعقل و هي بدات تتنفس بالقوة خايفة منو و ما علابالهاش علاه يشوف فيها هكاك أما سيف فتخمامو كامل في شفايفها ، فاق من تخمامو كي هي حطت يدها على يدو لي حاكم بيها الثلج و نطقت بتوتر:" أأأنا أنا درك ندير وحدي" بعد يدو عليها و رجع بلاصتو و هو يمسح على وجهو و يتنفس بالجهد بقا ساكت واحد التلت دقائق و نطق بصرامة :" من اليوم و رايح أي حاجة تديريها تشاوريني عليها قبل لبسة خرجة هدرة ما يهمش واش هي ولا مع من ، كلش يتقالي و أنا نديسيدي "
بقات تشوف فيه و ابتاسمت بسخرية:" ههه سقسيتك من قبل و ما جاوبتنيش، مريض ؟؟ "
شاف فيها ببرود و نطق:" مازلتي ما شفتي مني والو لي يخليك تقولي بلي مريض، و كيما قتلك منا و رايح كلش بإذني "
فاطمة:"كذب عليك لي قالك بلي راني هنا esclave عندك "
وقف سيف و نطق بلا مبالاة وهو يقرب عندها بالشوية:" و الله أفهميها كيما تحبي بصح لي لازمك تحطيه في بالك بلي منا و رايح كلشي تشاوريني فيه "و هبط عند و دنها و همس:" و أي غطلة تندار حتتحاسبي عليها و أنا لي حنحاسبك "
و وقف حيبعد عليها بصح هي عاودت حكمتو من الشوميز و هدرت بنفس النبرة تاعو قدام وذنو:" تحلم "
سيف أصلا ما سمعش واش هدرت قربها منو وانفاسها في رقبتو خلاتو ما فاهم والو ، بعد عليها يمسح على وجهو و يدو في لحيتو و راح خارج وقف قدام الباب و دور عندها نطق :" ماكانش خروج من بيتك سمانة و واحد ما يدخل عندك "
قبل ما يخرج سمع فاطمة تهدر:" علابالك هادي أجمل حاجة قلتهالي من نهار شفتك "
سيف:" على الستار نسمع ما كليتيش ولا ما شربتيش دواك "
شافت فيه بصدمة هي فاش تحكي وهو فاش يحكي ما خلالهاش الفرصة تجاوبو و خرج هابط للجاردة يتنفس حاس روحو مخنوق ، بزاف حوايج تخلطو عليه وصل قدام la salle à manger حبسو صوت جدو لي يعيط عليه تنهد ماهوش حاب يسمع نفس الأسطوانة تاع كل مرة دخل سمع مو تهدر بصوت حنين:" أرواح تتعشا وليدي"
سيف:" لالا شبعان يما "و دور عند جدو:" حتجتني جدي؟!"
الجد :" واش درت مع فاطمة ؟؟"
سيف :" ما درت والو غير ما تخرجش من البيت سمانة و واحد ما يدخل عندها " قال هدرتو اللخرة و هو يشوف في هديل و مو.
الجد:" سيف ما تقساش عليها"
سيف بإستهزاء:" جدي نظن علابالك بلي هكا راني نسايس فيها على اللخر و كون نعاملها على أساس واش قاعدة تدير راهي ماهيش راقدة لفوق " و جا خارج حبسو صوت مو:" وين رايح سيف راهو راح الحال"
سيف وهو خارج:"غير هنا فالجاردة يما "
منار همست في ودن مها:" تبانلي سيف حيضيع من يديا "
تخنزرت فيها سلمى و نطقت :" الهدرة ماشي هنا "
..............................................
نتمنا يعجبكم البارت ❤️❤️❤️❤️❤️