كرونيك عشق مخيف 🇩🇿💔❤️

Chapter 13

فاليل تلمت العايلة كي العادة على طابلة لعشا كل واحد غارق في ديوانو، كانت هديل تلعب بالمغرف في سحنها و تهز في رجلها ما حاملاش تقعد قدام كريم حاكمة بكيتها بالسيف، أما هو فكان متبع كل تحريكة تجي منها، قلقتو حركة رجلها حط مغرفتو و هبط يدو حطها على فخضها و زير عليها عضت شاربها و حطت يدها فوق يدو تحاول تنحيها وهو زير عليها كتر و هدر في وذنها: " لي قاعدة تديري فيه كامل زايد ناقص كولي و اطلعي لبيتك بسكات " بعد يدو و رجع ياكل وهي شافت فيه بنظرة لوم و وقفت استئذنت منهم و طلعت لبيتها تجري، الأنظار كامل توجهت لكريم لي مزال ياكل و كأنو وضع عادي و ما يخصوش حتى سقساه بباه بجدية: "واش درتلها هاد المرة تاني؟! "
تبسم كريم بسخرية و جاوب باباه: "سامحني بابا بصح من وكتاه نحكي واش يصرى بيني و بين مرتي؟!"
ضرب محمد الطابلة و هدر بعصبية: "و الله مليحة هادي كبرتو و عادت الكلمة كلمتكم و الشورة شورتكم و أنا ما ندخلش في حياتكم و قراراتكم"
وقف كريم و هدر وهو يهز في طيليفونو و مفاتحو من فوق الطابلة: "أنا خارج صحا عشاكم"
خرج و خلا باباه يعيط بأسمو، وقف محمد طالع لبيتو بصح حبستو هدرة ختو المسمامة: "هدا واش ربيت نتا و مرتك"
هز راسو محمد بيأس و طلع لبيتو، أما حنان ردت عليها و هي تشوف مع ياسر و منار لي كانو يبتاسمو بتشفي : "رانا نشوفو في تربيتك نتي"
سلمى: " ولادي متربي........ "
ضرب الجد الطابلة و هدر بعياط: " نوضو اضربو بعضاكم خير و أنا قاعد " دور عند حنان و كمل "اطلعي شوفي راجلك" وشاف في سلمى وهدر"و نتي احكمي لسانك و اسكتي و ما تدخليش في حوايج خاطيينك"
سكتو كامل و كملو ماكلتهم و سيف وقف راح للكوزينة
سيف بصرامة: "وجدو عشاء فاطمة و انا نطلعو"
صليحة: " حاضر وليدي درك زوج دقايق و يوجد "
هز راسو و قعد فالكرسي قدامها و هي توجد كي كملت طلعو لبيت فاطمة طبطب زوج مرات ما سمعش منها رد حل الباب و دخل لقاها راقدة في سريرها حط الماكلة قدامو و وقف عند راسها وهدر ببرود: "علابالي بلي ماكيش راقدة نوضي"
مالقا منها حتى جواب تنهد و نحا عليها لغطا بالقوة و هي حلت عينيها و قعدت فالسرير و عيطت: "وشبيك مريض؟!"
جاوبها سيف ببرود و هو يجيب فالبلاطو يحطو قدامها: "وكتاه تتعلمي بلي ماشي هادي هي النبرة لي يهدرو بيها الناس"
فاطمة بنفس برودو: "نهار لى تتعلم نتا بلي ماشي هادي هي الطريقة لي يتعاملو بيها الناس"
باقي يشوف فيها ساكت علابالو بلي كاش نهار يفزدها بسبة لسانها، هز لبلاطو حطو فوق رجليها و هدر بصرامة: "كولي"
عاودت هزتو و حطتو فوق الطابلة لي قدامها و هدرت: " قلت مانيش راهجة، واش الصعيب فيها؟! ماناكلش"
مسح سيف على وجهو أكثر حاجة تقلقو هي واحد يعاندو، شاف فيها بهدوء و هدر: "ماكيش حتاكلي؟!"
هزت فاطمة راسها ب لالا و جاوبت: " مانيش ماكلة، تقدر تخرج "
قعد قدامها و هو يشوف في عينيها و سقساها: "متأكدة؟!"
فاطمة: " حاسة روحي مع جورج قرداحي من سيربح المليون، قتلك لالا ما تفهمش؟! "
هز راسو و هو يحرك لسانو داخل فمو و قرب منها حتى تخلعت و رجعلها يديها في زوج ورا ظهرها و حكمهم بيد وحدة و باليد لخرا هز المغرف و قربها لفمها "حلي فمك"
تصدمت منو واش قاعد يدير بقات تتحرك بين يديه باش يطلقا و هو كل ما تتحرك يزير عليها كتر حتى نطقت بعياط: " اطقني بع..... "
استغل الفرصة كي حلت فمها و حطلها المغرف ما حبتش تبلع وهو بدا يقلق حط المغرف و قفللها خشمها و فمها باش تاكل، كي شافها بلعت بعد يدو و عاود هز المغرف قربها لفمها
فاطمة و الدموع في عينيها: " حرام عليك خليني مانيش حابة ناكل "
سيف بجمود: " حلي فمك "
هزت راسها بلالا وهو زير على يديها كتر حتى حلت فمها وهو وكلها.
فاطمة بإستسلام: " خلاص اطلقني درك ناكل وحدي "
ماجاوبهاش وباقي يشوف فيها حاب يعرف اذا تكذب عليه و لا لالا.
تحركت فاطمة و هدرت بصدق: "و الله ناكل خليني"
طلقها و حطلها لبلاط فوق رجليها و قعد فوق الكرسي مقابها متكي بظهرو عليه و يخمم كيفاه حيتعامل معاها و كيفاه حيقدر ينحي الشعور لي يحكمو كي يشوفها، علاه هي لي تشد ليها هكا تنهد و حط رجل فوق رجل و هدر وهو يشوف فيها ببرود: "لمن كنتي حتعيطي؟!"
شرقت و بدات تسعل من الصدمة، وقف صبلها الماء و مدلها الكاس و رجع بلاصتو يشوف فيها بنفس اىنظرات يسنا فيها تجاوبو
فاطمة بتوتر: " لمن نعيط؟! واش تقصد؟! "
ميل سيف راسو بملل و هدر: " ما تبقايش تدي فيا و تجيبي علابالك مليح علاواش نهدر مالا جاوبي "
بلعت فاطمة ريقها و لمت شاجاعتها و نطقت و هي تشوف في عينيه: " كنت حنعيط لعايلتي "
وقف سيف بعصبية و هدر بعياط: " هاديك ماشي عايلتك هادوك عباد خطفوك ما خلاوكش تعيشي حياتك لي تسحقيها عباد حرموك من عايلتك علاه ما تفهميش "
ضربت فاطمة لبلاط لي في حجرها طاح و بدات تعيط: " هادوك لي تقول عليهم خطفوني رباوني و مدولي شي لي ما تقدروش....... "
سكتت كي حط سيف يدو على فمها و هدر بهمس و عينيه في عينيها: "آخر مرة نقلك صوتك يزيد يعلا حسك نقطعو"
بقات تشوف فيه و دموعها هابطين على يدو بعد عليها يمسح في شعرو
فاطمة و هي تمسح في دموعها: " نحمد ربي ألف مرة لي عايلتي خطفوني علاخاطر العيشة معاهم أحسن ألف مرة من العيشة مع ناس مراض كيفكم "
تبسم و هدر: " مازلتي ما شفتي والو اصبري باش تشوفي المرض تاع الصح "
و خرج و خلاها تبكي.
..................................................
بعد ساعات الكل في بيتو راقد غير كريم لي طلع لبيت هديل دخل لقاها راقدة و آثار الدموع مازالو في عينيه قعد قدامها يشوف فيها قلبو وجعو من الحالة لي كل مرة يوصلولها هو ما يقدرش يتكم في أعصابو و هي تستفزو، حط يدو على شعرها وهي تخلعت و بعدت عليه تنهد و هز يديه في زوج فالهواء و هدر: " ما تخافيش، أنا "
تبسمت بسخرية وهدرت: " كملت عشاك؟! "
حرك راسو حتى طرشقت رقبتو و هدر: " هديل غلبان ماكاله نحكيو فالحكاية هادي و ما تكبريهاش و هي صغيرة "
حلت عينيها و طلعت حواجبها و هدرت بصدمة: " نكبر الموضوع؟! شكون قاعد يهدر؟! سي كريم لي في كل مرة يدير من الحبة قبة و كل حكاية يفسرها على هواه و كتر من مرة يمد يدو عليا و أنا في كل مرة نسامحو بلا ما يطلب السماح، لي يمد أوامر و حنا لازم نفذو بصح هو يدير واش يحب ، يهدر مع لي يحب يروح وين يحب ولازم واحد ما يسقسيه ولا يهدر معاه، نتا لي جامي تغلط ، هممم سي كريم جاوبني، هديل ما تلبسش ما تخرجش ما تدخلش ما تهدرش ما تسقسيش و تغلط تخلص خدمتها في هاد الدنيا تسمعك نتا واش تهدر و تنفذ، أنا غلبت كريم عييت من أني نعيش حياتي عبدة عندك بلا ما تديرلي حتى قيما و تعاملني على أني وحدة جايبها من برة باش تسمع لأوامرك " كانت تهدر و دموعها يهبطو و شهقاتها يعلاو
قرب عندها باش يمسحلها دموعها بصح هي طلعت يديها و حبستو، كريم بصوت مترجي: " هديل أنا..... "
هديل: " نتا ما تحبنيش كريم كلشي يهمك اني نكون ملكك بصح هادا ماشي حب "
هز كريم راسو بلالا و هدر: " و الله نحبك هديل تعرفيني نموت عليك بصح نغير عليك الله غالب "
هدرت هديل بعياط و هي تضرب فيه في كتفو: " علاه نتا تغير و أنا لالا؟! علاه نتا تحس و أنا لالا؟! علاه أنا نتقبل غيرتك و نعذرك و نتا لالا؟! "
حكملها كريم يديها و هدر بأسف : " سامحيني هديل حقك تغيري آخر مرة..... "
قاطعتو و هي تعيط بعد ما نحاتلو يديه : " هههه آخر مرة، آخرة مرة، قداه من مرة قتلي آخر مرة و أنا كنت ديما نأمنك و نقول هاد المرة يتبدل بصح نتا جامي تبدلت "
كريم و عينيه فيهم الدموع: " هاد المرة صح حتكون آخر مرة هديل نوعدك"
هزت هديل راسها بلالا و عدلت رحها في بلاصتها و هدرت بهدوء: " روح كريم "
كريم: " هديل اسمع.... "
قاطعتو هديل بصوت مخنوق: " كريم تعيش حابة نرقد "
تنهدر و خرج من بيتها و خرج من الدار كامل حاب يروح لبلاصة يفرغ فيها الضيق لي حس بيه.
################################
نشاله يعجبك البارت +ما تنساوش تصوتو بليز