النحرير

النحرير 50

اسية:(تمات داخلة عليهم كضحك)خليو ليا شوية دلحنان نتوما فرقتوه كامل

دهاء:(شافت فيها)ياله جيتي اسليعفانة حتي سالينا

اسية:(سلمات عليهم وكضحك)والله حتي قلت نتغدا ونجي تغديت وتقلت قلت نعس شوية ملي فقت لقيت التمنية وجيت كنجري

دهاء:(ضحكات)نتي وجوليا مقابلين غير نعاس غير تحطو راسكم تغيبو

اسية:(وصلات لجوليا فالسلام)هي حتي نتي حاملة الموصيبة اءء درتيها

دهاء:(كضحك)مشيتي بعيد ابنتي هههه

جوليا:(بابتسامة حزينة)مالقيتي ماتقولي بحال الي ماعرفاش للي كاين

اسية:(كتشوف فجوليا)مالك بنتي ليا ماشي نورمال اشنو عندك واش مريضة جلستي حتي بغينا نحيحو فالسبوع عاد جاك لمرض

دهاء:(كضحك)علاه المرض كيشاور مامريضة والو بيخير غير لقليب لي مريض مدابزة مع العمر ديالها ههه

اسية:(بصدمة ممزوجة بابتسامة)هالعار داغر مسكيين داك دريويش يدابزو معاه الناس انتوما دازت ليكم النعمة غاتخرجوها من رجال العمراني

الحاجة:(ابتسمات)اوي شوفي لييك ولادي مسااكن علاش صابرين غير يفكها واحد ونقولو بيخير تخرج لينا لخرا من الجنب يحسن عواانهم(شافت فدهاء)شوفي هاد ديكور لدبيحة بالخضر الملكي والذهبي ملكي نييت كيجاك انور

نور:(كتشوف)غزاال وشييك

دهاء:(بتعجب)اشمن دبيحة كيفاش(بدات كتشوف فالتصاور)ويلي لا اش هادشي لالالالا بالنااقص منو اش هدا !!!

اسية:(كضحك)هداك هو العمدة دسبوع الحبيبة خاص دبيحة باش تسميو لبنيتة شي خرووف نيت ولا جوج... الله ياختي تشهيت بولفاف

نور:(جات جلسات حدا اسية)واش كتوحمي عليه نطلبوه ليك

اسية:(كضحك وشدت فيديها)لا غير ملي دكرنا دبيحة تفكرتو حتال غدا وناكلو هههه

الحاجة:(موجها كلامها لدهاء)اشنو لي بالناقص منو انتي اش كتقولي هداك هو السبوع هو علاش غانصبحو مع صباح الالة دهاء

دهاء:(كتشوف فيهم باستغراب )واشنو دنب لخروف فسمية البنت

اسية:(كضحك)شحال فيك ديال تبعكيك وراه هادو هما تقاليدنا الحبيبة بغيتي سبوع مغربي 100% خلينا نديرو شغلنا ماتحرفيش لينا فالتقاليد الفيجيتاريانة

دهاء:(تنهدات)مسكين الخروف... راه ماشي ضروري ديرو بالناقص حنا لبنت راه سميناها انا راه ماغانحضرش لهادشي غير باش تكون فبالكم

اريب ومستعين جاو مع ديك الكلمة

اريب؛(بتعجب جلس حدا دهاء وعنقها بيديه)اشنو لي ماغاتحضريش لييه!!

الحاجة:(كضحك)جابك الله تشوف هاد لبعكاكة خلاتها اسية قالت ليك ماندبحوش لبلقيس بقا فيها الخروف اسيدي ههه لهبال