النحرير

النحرير 25

بعدما جات لماكلة كانو بغاو يبززو عليها تاكل واخا فيها جوع شهية عندها مسدودة وماقدروش يزيدو يضغطو عليها كثر من هكاك نوضاتها لحاجة تمشي لبيتها باش ترتاح حيت الخدم خاصهم يجمعو ديك روينة لي دارت فالبيت واخا كانت فاشلة كانت بحال جثة هامدة ..وعطاتها لحاجة مهدئ ديالها تشربو باش تهدن.. خدااتو دهاء وخلاتو فيديها

لحاجة:(كتشوف فيها بحسرة ..ماعرفاش اش بيها واش مرضها سكوتها خلاها تهول عليها)انا غانخليك ترتاحي علي لله حالتك تحسن ..نطفي ضو ولا نخليه

لا رد منها ..خلاتها لحاجة طفات ضو وسدات لباب ..تكمشات دهاء وجمعات رجليها زيرات علي يديها لي شادة بيها دواء ديالها ..كتفكر وتخمم وضرب اسداس فأخماس ..كتحس بالدنيا كدور بيها وكحالت فعينيها ماقدراش تركز كلشي تخلط عليها ..فلحظة حسات بقلبها حرقها وبغات تبكي ..سمحات لدموعها ياخدو راحتهم وطلقات لعنان لراسها بدون قيود ..علي لله غير تبرد نارها وتفاجي علي قلبها لي قتلاتو الفقصة ..حسات براسها فكابوس خايب ومحال تفيق منو .. جلسات مدة وهي علي نفس لحالة ..حتي سمعات لحس حدا لباب وغمضات عينيها حيت مافيها لي يشوف شي حد ولا يهضر ماحملاش حتي راسها كانت لحاجة جات طل عليها ملي بانت ليها ناعسة غطاتها وباستها فراسها وخرجات .. ملي سمعات لباب تقفل رجعات فتحات عينيها ..وجاوها دموع مباشرة ..وحسات بالضيق حتي سمعات صوت مازن وهو كيفتح لباب دخل وسدو وراه جا حداها كيشوف فيها بانو ليه دموع فعينيها ومسحهم ..وتحنى حداها باس عويناتها بجوج ..حط وجهو علي وجهها وعنقها ونعس حداها ..حتي هي حسات براحة غريبة وهي حداه عنقاتو بيديها وغمضات عينيها حتي غفات

فهاد الاثناء كانو لخدم كيجمعو فالروينة لي فيبت اريب ومجمعين

الاولى(فرح):(كتجمع لفراش باش تبدلو بواحد اخر)ياختي سي اريب ديما منظم ماعرفت اش جاه هاد لمرة

الثانية(نادية):( كتجمع فالزاج)راه ماشي هو ..هادي لالة دهاء واقيلة دابزو مهم هي لي دارت هادشي سمعت دادا ياقوت كتهضر مع عيشة وقالتها ليها

فرح:(بانزعاج)حكٌلني ..ياختي شحال ماكنحملها ..متكبرة واش كيقول ليها راسها ..هي ملكة جمال لكون ..هادشي غير مربية ودايرة هاد لحالة كون نيت شي حاجة محاال تشارك معانا الاوكسيجين

نادية:(كدور راسها جيهت لباب)سكتي سكتي يسمعك شي حد ..انا بعدا كتجيني ضريفة مامسوقاش ومافيهاش نكٌير ..هي بعدا حسن من ميساء نهار ومطال وهي تغوت

فرح:(كتفرج كوفرلي اخر)اجي عاونيني باش يجي مسرح... فكرتني فميساء .. سي اريب غير جات لالة دهاء لدار وهو يجري علي ميساء من هنا

نادية:(كضحك)داكشي لي بان ليا واحد نهار حضرت ليهم دارو واحد شوها ..عجباتني فديك ميسااء

فرح:(ضرها راسها)ياختي هاد ناس لي لاباس عليهم حافية ليهم جرية ..مالاقيين مايديرو ..داك نهار نيت كانت مدابزة مع لالة شيرين ..راه قلت ليك عاجبها راسها ..لواعرة هي سي اريب ديما جاي من جيهتها ..حتي سمح فمراتو علي قبلها ..منهار حطات رجليها هنا وهو فالمغرب كنا نشوفوه من لعام لعام ولا يجي جوج دلمرات فالشهر ..ايطاليا عندو بحال رباط