حبيبتي نـجَـد

Part 40

-

الـسـاعـه ٤ الـعصر ، الكل قايم ببيت ابو عبدالله و جالسين يتقهوون و السوالف تاخذهم و تجيبهم ، وداليا نايمه بحكم انها سهرت امس ولا قامت ، دخلو البنات على غرفة داليا و مرام كلهم دفعه وحده من الباب و هم مصدومين
مرام وهي تقوم داليا بصراخ وتهزها بقوه : ددلللووو دلوو
داليا قامت مصدومه و مفجوعه : وش فيييه شبلاكمممم ؟
ابتسمت نوير وهي تقدم وتهديها : اهدي يابنت مافيه شي ، بس قومي هالحين و غسلي وجهتس و توضي و صلي و ثمً تعالي الصاله في موضوع نبي نكلمتس به زين ؟
داليا قامت وهي تعتدل و تمسح وجها وتوضت ، وصلت الصلوات الي فاتتها بعدين غيرت بجامتها ولبست دشداشه سماويه بابيض و مشطت شعرها و رفعت نصه وطلعت للمطبخ و سوت فطورها ، وطلعت للبنات بعدين
نوير وهي تكلم عبدالله تنهدت : طيب عبود وش نسوي تونا صحيناها ، اصبر ذلحين نكلمها يا ابوي !
عبدالله بعصبيه : ياويلي والله انكن فاطسات ، حجيه الرجال من اليوم هنا ينتظر الرد اخلصي علي يلا ، و اذا رفضت خليها تستخير و تراجع نفسها مية مره ولا والله ياوييلها !
جت داليا وجلست وهي تحط فطورها : وش عندكم هاه ؟
ابتسمت نوير وهي تنهد : اسمعي ياحب ، ناصر ولد ابو ناصر متقدم لك ويبيك وش ردك ، مع العلم لازم تستخيرين
ضحكت داليا بقوه : ياويلي ويلاه ، ورب الكعبه ما عنده كرامه ابد امس امه خطبتني و رفضته والحين بعد جاي يخطبني وش ذا ياراسسسي ، نونه قولي لعبدالله انا رافضته رفض تام ولا ممكن اني اتزوجه وش فيه حجيه مهبوله ولا مجنونه انا اذا جينا بالعقل يعني بنات بالاول اكبر مني باكثر من ١٠ سنوات مره كبييير شايب ذا و انا اصلاً توني بزر عمري ١٧ اخذلي واحد عمره ٣٢ ، وبعدين معليش مرام انتي بنفسك لمياء قد قالت لتس عن تفكيره وكيف كذا تفكيره متحجر و كانه من شيبان الديره ، وبعد تبوني اخذه والله لو اموت ما اخذته عوذا ياربي دخيلك !
ابتسمت مرام وتنهدت : والله على هذي صدقتي ، ناصر مره صعب بالتعامل و تخيلو ليمو قبل لا تزوج حاشرها ما تطلع ما تروح ما تجي الا نادر ولا تجي عندنا كنت انا اجيها ، وبعد اذكر قبل كان يتهاوش مع امه دايم و ابوه ، و بعد هو مرابط دايم بالحد الجنوبي يعني لا سمح الله يمكن دلو ترمّل وهي توها ، وبعدين احس لازم ياخذ وحده كبيره و عاقله وتفهم كيف تعامل معاه داليا والله غير تطلق من اول يوم
ضحكت داليا بقوه و طقتها بخفه : وجع ان شاء الله بس حقيقي انا ما اتحمل الشخصيه الي كذا ، فيصل وهو فيصل كذا باط كبدي مره كيف ذا بنجن وقسم بالله !
ابتسمت نوير بحزن : يووه ، خلاص والله الله يرزقه بنت الحلال معليه ، ببلغ عبدالله انا اجل
تنهدت داليا بضيق ومع نفسها : مدري شلون بكابر واقول ما ابيه وانا والله ابيه ولا الود ودي يصير زوجي وحلالي ، بس وش بينفعني به الحُب و اعجاب المراهقين ذا ما راح ينفعني بشي ليّا تطلقت وانا بزر دامني اعرف شخصيته واعرف شخصيتي و مافي توافق بينا ابد ليش يوم اخرب مستقبلي عشانه حلو و جميل ، صدق انه مزيون بالحيل و يشلع القلب والله بس الزين ماهو بكل شي ، انسان متملك غيور وعصبي كيف بتزوجه وانا كل هالصفات اكرها اشد الكره ، خلاص داليا لا تفكرين فيه وشوله تفكرين حتى ولو انه مزيون انتي ركزي على اخلاقه و تصرفاته تشوفين انه انسان مواصفاته هي المواصفات الي تحبينها وتحسين انك بترتاحين اكيد لا و طبعاً لا ما يسوا عليك تعيشين بعلاقه كلها سموم عشان بس اعجاب مراهقين خلاص عاد اعقلي و اتركي السوالف ذي !
عبدالله بصوت عالي : دددللللووووو
تنهدت داليا وقامت : ياربي ما راح يتركوني بحالي والله
ضحكت مرام : حسي بالي حسيت به يلا يلا !
ضحكت داليا وغمزت لها : بس انا ماني خفيفه واخضع بسرعه يالحبيبه !
رمتها مرام بعلبة المنديل وضحكت : وجععع يالكللبببببه !
ضحكت نوير بقوه : والله بهاذي صدقت صراحه
ابتسمت ارياف وتنهدت وهي ماسكه جوالها : والله مالومها ، الحب يسوي هوايل كثيره يابنت الحلال !
نوير توسعت عيونها بصدمه وطقتها : ياوييلييي يالخفيفه انتي ، مره مو من جدك مدري كيف وافقتي اصلاً عليه والله
ضحكت ارياف وتنهدت : زي ما وافقتي انتي على عبدالله ، انا كذا وافقت عليه ياحبيبتي
ضحكت مرام : طيب جهزتو فساتين ؟
ارياف وهي تعتدل وتضحك بقوه : من كثر ما طول عرستس جهزنا كل شيّن حبيبتي ما بقى غير تعرسين ونخلص !
ضحكت مرام بقوه : وييين تخلص باقي عروس كثيره حبيبتي خلاص مافيه العالم كلها تزوجت الله يسلمتس باقي عرستس و عرس دلو و عرس الجوهره و عرس عبدالملك و عرس عيال خالي طلال باقي عروس كثيييره اوووه !
ابتسمت ارياف وتنهدت : انا عرسي بيكون ازين عرس بالكوره الارضيه كلها باذن الله
ابتسمت نوير بقوه : ان شاء الله ياحياتي انتي
عـنـد داليا طلعت لعبدالله وابتسمت : لبيه
ابتسم عبدالله : ناصر متقدم لتس مره ثانيه
داليا عقدت حواجبها باستغراب : شلون تقدم لي مره ثانيه ؟
ضحك عبدالله : يعني مو رفضتيه قال زين بتقدم مره ثانيه
ضحكت داليا بقوه وصفقت كتف عبدالله بخفه : ياويييلييي وش ذا ، وش يحس فيه بالله يعني كيف يتقدم لي مره ثانيه ما عنده كرامه ما عنده عزة نفس خلاص عاد رفضتك اف ياربي ، الزبده قله مرفوض مرفوض مرفوض ديور
عبدالله تخصر : ابي اعرف بس وش الي يخيلتس ترفضين ؟
ابتسمت داليا : ما ابيه بكل اختصار
تنهد عبدالله : طيب بكيفتس ، بس ياخي خلاص والله تفشلنا منتس انتي و اختس فشلتونا كل شوي رافضين الرجال عيب
داليا تخصرت و عقدت حواجبها بعصبيه : ياسسلام لا والله حبيبي خوش والله ، حجي استوعب ترا ذا زواج زواج يعني مسؤوليه جداً كبيره كيف تبيني يعني ، اوافق علي اي شخص يجيني وبعدين انا وش اسوي هو ما عنده كرامه يرجع يخطبني خله يولي بس عوذا ياربي دخيلك !
ضحك عبدالله وهو يتنهد ويطلع ويمسح وجهه ودخل المجلس وابتسم وناظر بوجه ناصر الي بينفجر عصبيه وعيونه حمر و الضيق والهدوء مكتسح المكان : مالك بنت عندنا يا ناصر ، البنت رافضه اشد الرفض بعد الله يرزقك بالبنت الصالحه الي ترضيك يارب و يعوضك ان شاء الله
تنهد ناصر بعصبيه وبلع ريقه بدون لا يقول شي
ابتسم ابو ناصر : معليه ، اللهم امين ويرزقها بالولد الصالح
ابتسم ابو عبدالله : يبو ناصر تكفى لا تزعل مني ..
ما كمل كلامه ابو عبدالله الا وابو ناصر قاطعه : لا يبو عبدالله والله ان غلاك باجفى القلب ما يتغير ياخوك ، ما يفرقنا اشياء تافهه مثل كذا وبعدين الزواج قسمه ونصيب و معليه النصيب يجي يجي ، ويمكن خيره لهم ، يلا حنا نستاذنكم نبي نسري تجلسون بالعافيه يارب !
ابتسم ابو عبدالله بامتنان كبير : فمان الله يارب
طلع ابو ناصر و وراه ناصر وهو باخر مراحل العصبيه ، جوو اسامه و عبدالملك و فيصل وصقر ما يدرون وش الي صاير بس ابو عبدالله متضايق و معصب و عبدالله مثله
ابتسم فيصل : وش بكم ؟
ابو عبدالله بعصبيه : لا اسمع حس انت وياه اص !
ضحك عبدالملك بداخله : بسم الله ابوي وش جاه ، يمه قلنا ان ابوي شكله طّخ وترك اطباعه بس للاسف ما اتوقع
اسامه ابتسم : انا خايف بس يطلع الابلم ياويلي ويلاه بس
ضحك صقر بقوه : حتى انت يا اسامه ياويلي واضح عمي مسعود له صيت ما ينضاع والله
ابتسم فيصل كتغيير جو : وش رايكم نروح اليوم العزبه اليل
ابو عبدالله قام وهو يتنهد : تم ، اسمعو الجمعه بنطلع مقناص
ابتسم فيصل بقوه : الله يا يبه بيرجع روتين كل يوم جمعه نطلع المقناص يالبيييييه !
ابتسم عبدالله وضحك : اهخ و البراد والشتاء ياربيييييي !
عبدالملك تنهد بضيق : ياغبرتي غبراه تكفون سدو حلوقكم
ضحك الخال علي : وراك انت ياعبدالملك اشوفك ما تحب المقناص ابد ولا العزبه حتى ليش ؟
ابتسم عبدالملك : والله ياخالي ..
ما كمل كلامه عبدالملك وابو عبدالله قاطعه : لانه مب رجال
ضحك اسامه بقوه : ايييييه عطططييييه
ابو عبدالله بعصبيه : وانت تحسب نفسك بعيد عنه ، تراك مثله و كلكم رديّن ولا انتم برجال !
ضحك اسامه وابتسم : تمون ياخالي تمون
ابو عبدالله بعصبيه : تخلخلت عظامك بلى ، كم مره اقولك لا تناديني خالي قلي عمي مسعود تفهم ؟
ابتسم اسامه وهو يقرص عبدالملك الي جنبه : ابشر ابشر
طلع ابو عبدالله ووراه عبدالله علطول ..
ضحك عبدالملك بقوه : ايييه الكوبرا علطول ورا ابوي مستحيل ينطق بمكانه ابد !
ضحك ابو نجد : ياربي عبدالملك اعقب عاد خلاص الا عبدالله قلنا طقطق بس مب على عبدالله يالتسلب !
ضحك عبدالملك : لا والله ياعم انا ما اعرف اخصص ، انا اعمم عالاكل و اطقطق عليهم كلهم
ابتسم الخال علي : والله ياوليدي روحك حلوه تبارك الله
ابتسم عبدالملك : ياحبيبي ياخالي ، والله تخلوني استحي ياخي
ضحك فيصل : وعييييه من زينك عاد ياربي !
اسامه شمق لفيصل وهو يحضن عبدالملك : مو على العشير عاد مو على سّديقيي !
عبدالملك حاوطه وهو يطقطق عليه : سسديييقييييي
ضحك اسامه وهو يبعده عنه : كل تبن يالكلب هذا جزاي ادافع عنك يالجربيّع !
ابتسم ابو نجد : اوف طلع اثنين من عبدالملك ، لا تكفون حنا يلا نستحمل عبدالملك يجينا واحدً مثله
ضحك اسامه بقوه : افا يبو نجد ما هقيتها منك والله ياخي
ابتسم ابو نجد : والله يا اسامه انك عسل ، خلاص اعذرني
ضحك اسامه وهو يدخل عبدالملك بصدره : محششوم يبو نجد انفداك ما يحتاج تعذر !
عبدالملك بضحك : اعنبو بليسك ابي اتنفس فكني يالتسلب
قاطعهم دخول الخال طلال و الفهد : السلام عليكم
ابتسم الرجال و فزو يسلمون عليهم ، و السواليف والاخبار اخذت الجو ، وفيصل من شافهم دخلو فز للداخل علطول
ابتسم اسامه : يلا انا استاذنكم بروح
ابتسم الفهد وهو عجبته شخصية اسامه : اذنك معاك ، انت ولد ابو ناصر صح ؟
ابتسم اسامه : اي نعم ولده العنقود انا السكر المعقود نسمنسم
عبس عبدالملك بقرف وضحك : وعيييه سنقر انت و زلفك المربع ، اقول بس توكل يلا طس !
ضحك اسامه بقوه وهو يسلم عالكل وعطا عبدالملك بوسه من بعيد وراح وهو ميت ضحك على ردود عبدالملك
عبدالملك ضحك : ياويلي وشعندها المراهقه ترسل بوسات ، تقلع بس يلا فارق ماني خفيف انا !
ضحك عبدالله وغمز له : اييييه مبييين مره انك مو خفيف
عـنـد البنات ، فزو على دخول ام الفهد و الجوهره و سلمو عليهم وجلسو يسولفون ويضحكون مع الجوهره
ام الفهد بدون نفس : ام عبدالله متى التلبيسه ؟
ابتسمت ام عبدالله : ان شاء الله نحددها بعد عرس مرام
ام الفهد  : ومتى عرس مرام ان شاء الله ؟
مرام توسعت عيونها وضحكت بداخلها وهمست للبنات : شوفو الاسلوب حلالاه صدق من داس ببطنها والله !
ضحكت داليا : وربي وجع ، ياكرهي يارب ياكرهي عاد
ام عبدالله : بعد اسبوعين ان شاء الله
ام الفهد بصدمه : وشو بعد اسبوعين مره طويل الاسبوع الجاي الخميس يناسبكم ؟
ام عبدالله ابتسمت وتنهدت : على خير ان شاء الله
ابتسمت الجوهره : عمه ياقلبي ترا اذا ما يناسبك عادي !
ابتسمت ام عبدالله : لا ياوليدي يناسبنا عادي
داليا بصدمه : بس يمه عرس مرام طيب ؟
ام الفهد عقدت حواجبها : واذا يعني عادي ، في اسبوع كامل تجهزون فيه وانا ابيه بسرعه لان بنرجع الرياض
الجوهره ابتسمت : عمه ترا الزواج بيكون بالرياض عادي ؟
ابتسمت ام عبدالله : ايه ياحياتي انتي عادي براحتس انتي
ابتسمت الجوهره : ياقلبي انا
ضحكت داليا وبهمس لمرام : اسم الله ذولا جالسين يقررون كانهم اهل المعرس حشى ، وشش فيييه !
ضحكت مرام بصدمه : لا و شوفي يوم تقول عادي فيه اسبوع تجهزون فيه ياويلي بتجلطني هالحجيه هي والعبايه الصفراء الي لابستها
ضحكت ارياف وهي تهمس لهم : وش جاب الشمس عندنا ؟
مرام ضحكت وشرقت بالقهوه وهي تشربها : ياوويللي اهخخ
ارياف وهي تضرب ظهرها : عجبتك هذي عجبتك ، وناسه في احد يضحك على ذباتي يالبيييه !
قامت ام الفهد : نستاذنكم
الجوهره ابتسمت : ماما بضل عند البنات
ام الفهد : طيب براحتك
راحت ام الفهد مع الخال طلال للفندق ، والجوهره ضلت عند البنات يسولفون و يضحكون مع بعض
قامت داليا من عندهم وطلعت لبست سماعتها و سوت لها شاهي و طلعت بالحوش وهي تدري مافي احد و قامت تمشى وهي لابسه جلاله ، فتحت جوالها ولقت صديقتها ميار منخطبه و البنات اليوم مسوين لها عزيمه و مفاجاه بعد صلاة العشاء و عازمين داليا تجي
راحت داليا لـ مرام طيران وهي منصدمه : مرررراممم
ضحكت مرام : ايييه ايه شفت ، ياحياتي ميرو الله يوفقها يارب و يسعدها بس صراحه انصدمت صغيره توها
ابتسمت داليا بقوه : فعععلاً ياويسي عاد ميرو ميرو ، ماني متخيله وقسم انها بتزوج ولد خالها ياحيياتي
ضحكت مرام : الا اسمعي عازميني وانا والله مالي خلق ابد اروح روحي عني وتعذري زين ؟
ابتسمت داليا بقوه : بدون لا تقولين بروح ، عيون قلبي انا وحياتي بتزوج ياويييل قلبييي صدق !
ارياف ساكته وتسمع داليا و حزت بخاطرها ان داليا ما فرحت لها مثل ما فرحت لصديقتها ذي وهمست لـ نوير بضيق و حزن : شوفي كيف فرحانه لها وانا يوم انخطبت ما فرحت لي كذا ، احس ييحزن خييير !
ابتسمت نوير : معليك يابنت اهم شي انك انتي مستانسه وبعدين وش عليك اذا فرحت ولا ما فرحت عادي ترا
راحت داليا تجهز بفرحه كبيره وصديقة عمرها و الي كانت توقف معاها بالمره قبل الحلوه بتزوج ، كيف ما راح تطير من الفرحه وتستانس وهي كانت لها سند و ذخر و صندوق اسرارها و هي وياها دايم مع بعض
ابتسمت نوير : مين ميار اشوف دلو مره تحبها ؟
مرام ابتسمت بقوه : ميرو ذي اخت داليا مو صديقتها وبس ، مره تحبها داليا مره لدرجة خلت العائله كلها تحبها معاها مو تحبها وبس تعشقها جداً لدرجة تخيلي يوم كانت بالمتوسط تسولف على عبدالملك تبيه يتزوجها عشان تسكن عندنا ، لدرجة ان لما تروح المدرسه مع عبدالله تمر ميات وتاخذها معاها ، دلو مره تحبها مره
ابتسمت نوير : ماشاءالله ياحليلها حليلاه
جاء عبدالله وهو مبتسم بقوه : ادخل ؟
ابتسمت مرام : ايه ايه ادخل حياك
دخل عبدالله وهو يدور داليا : وييين دلوو ؟
ضحكت مرام : ليش شبلاك ؟
عبدالله ابتسم بقوه : ميرو ملكت تخيلي !
ضحكت مرام : يالله يا ميار كيف لو تدري بفرحتنا كلها ، ايه ايه درينا لا تطوفك فرحة دلو كيف فرحت مره !
ابتسم عبدالله بقوه : ياحيياتي هي الله يوفقها ويسعدها سعاده ما بعدها سعاده يارب والله اني اغليها بالحيييل !
طلع عبدالله يروح لداليا وهو طاير من الفرحه ، و البنات منصدمين و مرام ماسكه ضحكتها باعجوبه على ملامح نوير المنصدمه من كلام عبدالله ، الجوهره كانت عند فيصل طبعاً من زمان ، طلعت داليا وهي شايله الاكياس والهدايا قدام ارياف الي تناظرها بضيق وراحت لصديقاتها