حبيبتي نـجَـد

Part 41

-
بيـت ابـو نـاصـر :

دخل ناصر ببدلته وهو توه راجع من الدوام وجهه احمر و فايّر من العصبيه دخل الصاله ولقى الكل متجمع وبكل عصبية الدنيا صرخ بوجهه امه : يييييممممه انا طلعععت خاطططب و ما اددرري الا الييييوم بالدداووم العععالمم تباررككك لييي !!
قامت ام ناصر : ايه نعم خاطب حنان بنت الشيخ ، لا يكون بس عندك مانع ما يصير ازوج اسامه وانا ما زوجتك !
ناصر بعصبيه : يممممه كيف ليييش كذا طيب ليش ، بدون لا حتى تاخذين رايي ولا تقولين اسمعي الخطبه بتفركش الان تكلمينهم وتقولين مافيه نصيب ولا قسم اقلب ابو هالديره قلب
ام ناصر ببرود : ماني ملغيه شي وبتزوج حنان يا ناصر تفهم ولا لا ؟
ناصر بحده وعصبيه : يييمممممممه يييييممممممممهههه !
قام اسامه وهو يمسكه : اكسر الشر يا ناصر خلاص امش معاي الحين خلنا نطلع ، لاتسوي شي تندم عليه خلاص !
ناصر نفض نفسه من يد اسامه وطلع علطول و حرك سيارته
ابو ناصر تنهد : ييااا غزلان ليش ليش كذا تخطبين بدون لا حتى تقولين خبر لاحد ولا كلمتيني ولا قلتي لي ابد حتى
ام ناصر تنهدت : وشوله اقول طيب ، خطبت البنت لاني اشوفها مناسبه جداً لـ ناصر و تعرف له
تنهد ابو ناصر : بس تعرفين ان ناصر ما راح يتقبل اي بنت غير بنت مسعود داليا ، ما اذكر شفت ناصر يضحك من كل قلبه و يبتسم بكل قوته ، بس شفته يوم يجي طاريها ولا تمر من قدامه يتحول ناصر الحجر لـ الين واحد بالدنيا ، وانتي كيف كذا غزلان رجاءً كلمي الحرمه و قولي لها كل شي تفركش حرام تظلمين الولد و تظلمين البنت معاه !
تنهد اسامه : يمه اقسم بالله العلي العظيم ان ناصر يبي داليا مره و لو تجيبين له ازين البنات واحلاهن ما راح ياخذ الا داليا صدقيني ، تكفين يمه لا تظلمينه و تخربين مستقبله يمممه الى متى وانتي تصرفين من راستس لناصر وتعاملينه كانه طفل ولا حتى تاخذين رايه و تمدين يدتس و ترفعين صوتس على ناصر وبعدين تجين تشكين منه ، وانتي تدرين بشخصية ناصر زين خلاص يا يمه تكفييين فكينا من المشاكل ذي الي كل يوم وهي تنعاد والله كلنا تعبنا منها !
قامت ام ناصر وهي تنهد بعصبيه ورقت فوق بدون اي رد
و جت لمياء وهي تدف شنطتها و دخلو عيالها يركضون لابو ناصر يحضنونه : السلام عليكم ياقوم
ضحك اسامه بقوه : اسم الله ، ياويلي العمالقه الثلاث وش جايبكم انتو عوذا ياربي دخيلك الظهيره الناس تقيل تستريح وانتي جايتني زاره شنطتس وعيالتس ، ياغبرا لا يكون تطلقتي بس يامصخمه الحين تجلسين على تسبدنا !
ضحك ابو ناصر وهي يمسك نعلته و يطشها عليه : وجع ان شاء الله وقص لسان فال الله ولا فالك !
ضحكت لمياء وهي تشوف اسامه افلت يدينه لها وهي تحضنه بقوه : كللببب بس احبببكك
ضحك اسامه وهي يشد عليها : اعششقتسس ياروحي والله
ابتسمت لمياء وهي تفك عبايتها وتعلقها : الماما وينها ؟
ابتسم اسامه بضيقه : لا يطوفتس قبل شوي صار اعصار بالبيت ، وما يحتاج اقول بين مين ومين يعني !
ضحكت وتنهدت بضيق : ياربي يا امي الله يهديها ما ادري متى تفك ناصر وتتركه بحاله الا وتغير اطباعه الولد مستحيل يتغير وهي غصب تبي تغيره ، وش صار بعد ؟
اسامه بعصبيه وضيقه : تخيلي امتس الفالحه ، رايحه تخطب له لحالها بدون لا تعلم احد وفوق ذا اهل البنت موافقين وهو كيف درا اليوم خويانه الي بالدوام يباركون له تخيلي ياويلي وبعد ما ابيه يعصب و تبيه بعد يتغير مدري كيف وهي كذا تصرفاتها معاه ، والله ان الغزاله ما تنفهم ابد ابد !
شهقت لمياء بصدمه : ياووولدد اسالك بالله ، انت تقوله صادق ، لا لا امي مره انهبلت وربي مو لهدرجه عاد !
ابو ناصر بحده : اقول انتي وياه انتبهو لكلامكم تراها مرتي الي تكلمون عنها وش الي انهبلت عيب تراها امكم بعد
ابتسم اسامه وضحك : اسم الله ما درينا انا الغزاله عندها حراس بعد معليش نعتذر اسفين
ضحك ابو ناصر وهو يفز : تعال بعلمك الحراس وقلة الادب زين يالسلوقي صاير تمادي كثير والله اعقب صدق !
شهق اسامه بصدمه وهو يركض للدرج علطول وطلعت بوجهه ملاك وهو يتخبى ورا ظهرها : انا فوجهتس ياوخيتي
ضحكت ملاك : احتتززم بسس وش صاير يبن الحلال !
جاء ابو ناصر وراه عيال لمياء يدافعون معاه : ماشاءالله متخبي ورا اختك يعني هالحين بتنفخ تعقب اطلع الان !
ضحك متعب : انت مو رجال عيب عليك اطلع و واجهه الرجال يلا لا تخبى ورا الحريم !
ضحك ابو ناصر وهو يبوسه بقوه : يسلم منطوقك يالسميي
ضحكت لمياء بصدمه : ياويلي متعب يا ماما من معلمك هالسوالف ، اخسس !
ضحك زيد : جدي شكلنا نربطه هو و خاله ملاك ونضربهم
ضحك ابو ناصر وهو يتقدم : والله شكلنا
ضحك اسامه : متعبوه سد حلقك واعقب ، ملاك تكفين انا بوجهتس ياخي شوفي من علي العملاقه و الرئيس حقهم !
ضحكت ملاك : ياغبرتي وش نسوي طيب انا مانيب كفو افزع لك لاني بنطق معاك حبيبي ، مالنا الا الاستسلام !
ام ناصر من الدور الفوقي : متعب تعال ابيك بموضوع الان
ضحك ابو ناصر : فككم ربكم ما يحتاج تستلمون ، يلا ولو عن وجهي بروح اشوف الغزاله وش تبي مني !
ضحك اسامه وهو يبوس راس ابوه : يالبيه يالقائد بس
ضربه بخفه ابو ناصر : اقول جنب عني غاد ماني فاضي لك
راحو وهم ميتين ضحك على اسامه و جلسو بالصاله
ابتسمت ملاك : وراك انتي جايبه شنطتك معاك ؟
تنهدت لمياء : عشان اليوم تلبيسة فيصل ولد عمي مسعود ، ومرام مبلشتني تبيني اجي وقلت مره وحده اجيكم واتجهز عندكم و اروح عاد مع امي ، وانتي بتجين ؟
ابتسمت ملاك وتنهدت : والله انا مالي خلق وتعرفيني زين ما احب العزايم والجمعات ، انا جوي بس طلعات و كوفيهات و اعششق جلسة البيت ما احب الجمعات وبالذات الديره افييه !
لمياء بعصبيه : ملوكه مو من جدتس عاد ، تراتس مره انطوائيه اصلاً بعض حريم الديره يحسبون ان عند امي بس بنتين انا وفايزه ما يدرون عنتس لين ما تقول امي انها عندها انتي بعد ، بيصيبتس توحد من كثر ما تجلسين بالبيت !
تنهدت ملاك والتفت على اسامه : اقول يالحب توديني اشتري قهوه خلصت قهوتي ، و اعزمك على قهوه بكوفي
ضحك اسامه : ياويلي و محاضرة لمو وش صار عليها ؟
ضحكت لمياء وهي تطقها بخفه : تققهررر بارده حيييل !
ضحكت ملاك : وش اسوي ياخي هذي لمياء ما تغير من قبل لا تزوج ، الزبده بروح البس زين !
لمياء تاففت : خير لا تروحين ابيتس تسوين شعري ياخي
ضحكت ملاك وهي تنهد : ياربيييه انك ترحم حالي ، خلاص سمسم اسمع بعطيك صرافتي و اشتر لي قهوتي ، وجب 4 قهوه وجب الحلى ذاك الي فوق ايسكريم فانيلا اللذيذ جب الحجم الكبير ، وانت عاد اشتر الي يعجبك زين !
لمياء باستغراب : ليش 4 قهوه حجيه ؟
ابتسمت ملاك : لي ولك ولاسامه و نصوره وبس سلامتس و
ابتسمت لمياء بقوه وهي تعطيها بوسه : احبتسس رغم اني اكره القهوه بس بشربها عشانتس يالحب !
ضحك اسامه بقوه وهو ياخذ صرافة ملاك : ياويلي ياتسذبتس تكرهينها اجل و ذاك المره يوم سوت ملاك قهوه شفطتيها كلها ما خليتي بالكوب جغمه يالتسذوبه !
ضحكت ملاك بقوه ، و ضحكت لمياء وهي تضربه : وجع فضحتني يالحبيب عمى !
ضحك اسامه وهو يطلع ويحرك سيارته وشاف ناصر جاي وقال مع نفسه : يارب انك تستر علينا لا ننفضح بس !
و رقو ملاك ولمياء فوق لغرفة ملاك ، دخلو الغرفه
شهقت لمياء : ياويلي يالجرببه وش هالوصاخه ؟
ضحكت ملاك وهي تنادي العامله : فريييددده ، معليتس بنظفها والله لا تخافين !
ابتسمت لمياء وهي تجلس على المنبه وتطلع اغراضها : بساع طيب بساع انفداتس !
ابتسمت ملاك وهي تشيل اغراضها ، وجت العامله تساعدها