حبيبتي نـجَـد

Part 43

الـسـاعـه ٠٠ : ٩ صَ :

قامت مرام من اجمل نومه بحياتها ، وشافت مطلق مو جنبها قامت وصلت الفجر وبعدها لبست فستان احمر ساتر و ناعم و طويل كمّ طويل ، و رفعت نص شعرها وحطت مكياج خفيف وطلعت تسوي الفطور وبعد ما سوته جت تدق على مطلق بس قاطعها دخوله وهو شايل فطور بيدينه
ابتسمت مرام بحياء : اهلييين
ابتسم مطلق : صباح الخير يالخير كله انتي
ابتسمت مرام : صباح النور والسرور ، وينك غطيت ؟
ابتسم مطلق : ابد والله رحت اجيب فطور لكنتس يحلوتي سبقتيني جعل يدينتس بالجنه ان شاء الله
ابتسمت مرام وبنفسها : يدينتس فالجنه ياويلي وش هالتغزل ياغبصتس يا مرام فتى الديره ففعلاً قلبً و قالباً
ابتسم مطلق وهو يجلس جنبها : شلون النومه ؟
ابتسمت مرام بحياء : حلوه الحمدلله نمت زين
ابتسم مطلق : عساه دايم ياروحي انتي
ابتسمت مرام : تسلم
ابتسم مطلق وهو يفطر : وش رايتس اوكلتس ؟
ضحكت مرام بصدمه : وش الي توكلني وشوله !
مطلق عقد حواجبه : ليش ما تبيني اوكلتس يعني ؟
ابتسمت مرام : لا يعني بس ما يحتاج توكلني ماني بزر عندي يدين توكلني الحمدلله !
قام مطلق بدون لا يقول شي وطلع من الغرفه بكبرها
تحت صدمة مرام الي نشبت الاكله بحلقها : بسم الله ذا شبلاه وش يعني زعل عشاني ما خليته يوكلني ياويلي !
ضحكت بصدمه وهي تكمل اكلها : ياوييلي لا مرام عيب عليتس ترا ماهو واحد من اخوانتس يمكن صدق والله زعل ولا يتقبل الرفض و المزح بسم الله مطلقوه يخرع وربي يبي كل شي تم و زين ، يالله وش اسوي الحيين !
ابتسمت مرام و تنهدت وهي تاخذ جوالها و طلعت رقمه ودقت عليه و جواله مسكر ، و زفرت بضيق وهي تترك جوالها وقامت و اخذت المواعين على دخول مطلق ..
مطلق بضيق : ماشاءالله حتى الفطور شلتيه ماتبيني افطر يعني ولا شلون ؟
مرام بصدمه : فجرت جوالك اتصالات بس انت ما ترد وفجاه كذا طلعت بدون لا حتى تقولي شي وش تبيني اسوي مثلاً !
مطلق بعصبيه : لا ياشيخه ماشاءالله عليتس من يوم زفتس امس ما خليتيني اقربتس ولا حتى المستس و كل ما قلت شي قمتي تطقطقين علي وعلى لهجتي خوش والله واليوم بعد كذلك جالس احاول اني اكون لطيف و اعاملتس بدلع بس انتي يا تبعدين يا تجلسين تحلطميين
مرام ابتسمت بضحك : مطلق طيب ليش معصب ؟
مطلق بعصبيه صرخ : ممممررراممممم !
عبست مرام : وراك نعم هاه وش تبي ياخي وش اسوي ؟
مطلق وهو يعض على اسنانه : نزلي الفطور خلينن اتسمم
ابتسمت مرام بضحك : يافدييت اللهجه و راعيها والله
مطلق بعصبيه : مرام والله لو ما سكتي ..
مرام ضحكت وبصوت عالي : هيييه انت تراني ما عرفت لك مره تبيني اكلمك باسلوب زين ولا اطقطق على لهجتك هذاني مدحتها و تغزلت بك وش تبي بعد اكثر ؟
تنهد مطلق بعصبيه : عبالي متزوج بنت عاقله بس يا للاسف شكلي ..
مرام بعصبيه : شكللك وشششوووو هاااههه وششووو ؟
ضحك مطلق غصبً عنه من شافها تخصرت بعصبيه : تزوجت حب حياتي و اعقل البنات كلهم والي اعشقها
ابتسمت مرام وهي تصغر عيونها : ايوه ادب كذا !
ضحك مطلق : تعالي اجلسي جنبي وراتس واقفه
مرام ضحكت : ما ابي اجي اجلس جنبك هذا اولاً لاني زعلانه عليك وانت تهاوشني وتصارخ علي يالوصخ وبعدين ما ابي اخليك لحالك !
ابتسم مطلق وهو يقوم ويغسل يدينه وشال المواعين مع مرام وداها المطبخ : والله يمال العافيه يابعد حيي انتي
ابتسمت مرام بالغصب : يعافييك
راح مطلق وهو يجلس بالصاله على التلفزيون ، و شطفته مرام وهي ترقص ورافعه الثوب لين فوق ركبها وما قدر يمسك نفسه وهو يفطس ضحك : ياووييلييي يامررام !
مرام ضحكت : وقسم بالله كف اص لا تطقطق بس انا
ضحك مطلق بقوه : وش هالرقص بس صراحه عجبني عيديها عيديها بالله !
ابتسمت مرام وهي توقف على التلفزيون تحجب الرؤيه عنه : اعتذر الان ولا اقسم بالله لا اشخصنها ذلحين زيك
ضحك مطلق : اقول جنبي غادّ خلينن اشوف هالتلفاز
مرام ضحكت : اقول بس اعتذر وانت ساكت لا اصفقك
فز مطلق بضحك : تصفقين مين مررامموه ؟
هجت مرام بضحك يمّ الصاله وما فطنت الا ومطلق جاي من وراها ومحاوط خصرها بيدينها وشالها : اعلمتس مين مطلق حبيبتي انا تفهمين !
ابتسمت مرام : طيب خلاص فكني بروح اخلص شغلي
ابتسم مطلق بخبث : لا ابي رضاوه الان ، عطيني بوسه !
ضحكت مرام بقوه : ياغبصه والله مانت بصاحي صدق
ابتسم مطلق : مروومميي يلا يلا ياخي
تنهدت مرام وضحكت بقوه وهي ترفع نفسها لمستواه وتشوفه معطيها خده لكن لفت وباست شفايفه بقوه : هاه كذا زين و تمام رضيت يحلو ؟
ضحك مطلق بقوه وهو يرجعلها البوسه دبل ، ما وقفه الا مرام تطلبه النفس بتعب : والله انك صدق مانت بصاحي بس حلوه حلوه !
ابتسم مطلق بقوه وفز : يلا لعيونتس نعيدها !
فزت مرام وهي تهج للمطبخ بسرعه ، وضحك مطلق بكل قوته على ركضتها : ياربييي يححلووتسس يياخخي اهخخ
راحت مرام وهي تخلص شغلها وبعدها طلعت وتنهدت
ابتسم مطلق : اسمعي ؟
مرام التفت عليه بدون لا تقول شي
مطلق : بعد صلاة العصر بنروح لاهلي زين ؟
تنهدت مرام بتعب : شرايك بكرا اليوم بروح لاهلي والله وتعبانه وقسم مالي خلق شي !
مطلق توسعت عيونه : ماشاءالله يعني عادي اهلتس ما تتعبين بس اهلي ما يصير تتعبين عندهم ؟
ضحكت مرام : ايه مطلق وربي هناك لازم اسولف و اضحك معاهم ماني برايحه لهم وانا كذا اببد !
مطلق بعصبيه : اجل لا اهلي ولا اهلتس زين كذا ؟
مرام بهدوء : مطلق حبيبي وقسم بالله مالي خلق الرسميات ذي وبعدين خلها بكرا ازين تكفى !
ابتسم مطلق وحاوط خصرها من ورا : طيب قلبي تكفين خن نروح لاهلي عيب والله ما نروح وش رايتس عشاني عالاقل يا بنت ان كان لي شان عندتس ؟
ابتسمت مرام : من عييوني والله خلاص
ابتسم مطلق وهو يبوس عنقها من ورا بقوه : اعشقتس
ابتسمت مرام وراحت تروش ، وطلعت ولبست فستان اسود مخمل مفتوح فتحه بسيطه من عند الصدر و استشورت شعرها و فيرته من تحت و لبست ذهبها وتعطرت ، ودخل مطلق وابتسم بقوه من منظرها
ضحكت مرام : لا لا ياولد لا تقرب لا تقرب يلا البس ترا الحين بياذن العصر وعلى ما نوصل الديره يلا يلا !
ضحك مطلق وهو يقاوم نفسه و يروح يلبس ثوبه ابتسم بكل قوته من شاف مرام جايته وهي ماسكه جزماته و شماغه و نزلتها على السرير وهي تعطر الشماغ : هاه يلا بروح البس عبايتي اجل !
ابتسم مطلق وهو ياخذ اغراضه : ياتبارك الله هذا حتى عند اهلي ما تدلعت كذا تصدقين ؟
ضحكت مرام : شدعوه عليك بس زينت لك لبسك !
ابتسم مطلق : يلا نروح ؟
ابتسمت مرام وهي تربط نقابها : توكلنا على الله
نزلو و ركبو السياره و حرك مطلق السياره يمّ الديره وهم جالسين يسولفون ومطلق يعرفها على اهله و طبايعهم
ابتسم مطلق : يووه يا مرام ترا حنا مررره غير عاداتكم !
ضحكت مرام : ايه ايه اذكر امي كانت تقول ان عاداتكم مو مثلنا ولا هم يحزنون و تختلفون عنا باشياء كثيره
ابتسم مطلق وتنهد : اسمعي خليني اقولتس كم عاده من عوايدنا ، بالاول تدرين ليش صريت عليتس تجين معاي لاني اليوم الصباح كلمت امي وقلت لها بجيتس و قالت زين و ظني انتس بتوافقين بس يوم جيتس قلتي لا وانا قالي لامي اني بجيها وهذا ما يصير اقولها بجي وبعدها اقولها لا ماني بجايتس تدرين وش بيسوي بي ابوي اقسم بالله غير يغسل شراعي غسل الله وكيلتس ، ما يحب تقوله كلمه وبعدها تسوي عكسها ينهبل والله وبعد هو و امي تجيهم فجاه كذا وانت متزوج لازم تكلمهم قبل و تعطيهم خبر ولا بعد اذا ما يبونك يقولون لك لا تجي ما حنا فاضيين امسك ارضك تخيلي ، ييوه تعيشين و تشوفين عوايدنا ترانا شددين مره على فكره !
ابتسمت مرام وضحكت : معليه معليه بتعود مع الايام عادي ، وما تدري يمكن اغيرهم ترا
ضحك مطلق : ان شاء الله نقول بس ما ابي تفاجئين يوم تشوفين اطباعهم و عاداتهم زين ياقلبي ؟
ضحكت مرام : ان شاء الله باذن الله ، مطلق ليش تتكلم كذا ياخي تكلم بـ لهجتك والله ما اطقطق عليك بس ابيك تكلم عشان ليّا رحت لاهلك ما استنكر اللهجه ولا اضحك
ابتسم مطلق : من عيوني ابشري زين ، بس ترا محد يتكلم بلهجتنا بالبيت نادر يمكن شوي بس مو دايم
ابتسمت مرام : ايه امي واهلي بيكونون هناك صح ؟
ابتسم مطلق : ايه اميمتي كلمتن وقالت لي بيكونون هناتّس و بعد بوه من حريم الديره بيجن
ابتسمت مرام : ايه زين اجل
وصلو الديره و دخلو و شاف عبدالملك سيارة مطلق وهو يوقف قدامها ويتخصر و يصغر عيونه وهو يناظرهم
ضحك مطلق وهو يفتح الدريشه : ودك تموت انت ؟
عبدالملك ضحك : مالي كلام معك انت يالخنفس ابي وخيتي بس ، وخذ سيارتك و تقلع يلا !
ضحك مطلق : اععققب يالتسسلب وش تبي بـ مرتي ؟
ضحك عبدالملك : ما صارلك امس زافها علطول مرتي !
ضحك مطلق وهو ويحرك السياره على ورا وبعدها دعس دعسه قويه وحرك يمّ بيتهم و نثر التراب على عبدالملك
عبدالملك بعصبيه : ييممال الوججع يالقصمنجي !
ضحك عبدالله وهو يطلع : وانت وشوله تحرش به ؟
ضحك عبدالعزيز : اقول اتركك من هالفاضي يلا ترانا تاخرنا على بيت عمي خلف يلا مشينا !
عبدالملك وهو ينفض ثوبه : يمال الجنان الي يجنك ان شاء الله وجع وصخني بالتراب ولا بعد ماخذ اختي !
ضحك عبدالله : ياويلي ذليته ذل على مرام خلاص اسكت
عبدالملك بضيق : اهععع بصصصييح ياربييي !
استقبلهم اسامه وهو طالع من البيت مع ناصر يمّ بيت ابو مطلق : شببلاك كوكه ؟
عبدالملك شهق : وقصصص لسسان فشلتني قدام الناس و بهالشارع تناديني كوكه يالوصصخ ياوييلي وش بسوي بنفسي انا اليوم من كل جهه القاها ياربي !
ضحك عبدالله : خلاص يبن الحلال معليه معليه
ضحك اسامه وهو يحاوطه : وراك يابعد الدنيا ؟
ابتسم عبدالملك : الكلب مطلقوه نثر علي التراب يرضيك يرضيك يا اسامه بالله تكفى يرضيك يسوي بي كذا ؟
شهق اسامه بعصبيه : اعنببوه لا والله ما يرضيني معليك والله ما اخلي حقك يروح غير اخذه و اطلعه من عيونه !
ضحك عبدالملك وهو يحاوطه : عززز يالخوي البطل يلا يلا اجل خلنا نعجل لاجل الانتقام !
ضحك اسامه بقوه : لتس قو هيا لنقلب حياة مطلقوه الشايب جحيم ونقلب ابو ابو الديره عليه بعد !
ضحك عبدالله و جنبه ناصر : الله يشفيكم يارب بس
ضحك ناصر بخفه : امين يالله
ابتسم عبدالله : اخبارك و علومك ؟
ناصر : زين معلي
تنهد عبدالله : بعد العشاء تعال يمّ الديوان ابيك زين ؟
ناصر تنهد : ودي والله ، بس عندي استلام بكرا ولازم احرك بس عشان عمي خلف بحرك بعد العشاء علطول
ابتسم عبدالله : معليه فيه وقت تعال شوي ابيك بكلام وبعدها اطلع لستلامك ربي يحفظك !
دخلو العيال بالمجلس و سلمو على الرياجيل وجلسو