دولــوريــس "فـي عـشـقـك سـأفـنـى

سقوط من القمة

❌لا أحلل النقل بدون اذن مني❌
➰دولوريس"في عشقكَ سأفنى"➰
📌بقلم:ميلو ✍🏻
🖇الفصل الثالث: سقوط من القمة 🖇
#الحلقة_67
حلت عينيها كالعادة مع الفجر المنبه البيولوجي...كان مزير عليها بين يديه و راقد في سابع نومة...طلعت راسها تشوف فيه مشي مامنة بلي راه حداهاا و تاعها راجلهااا و حلالها...دخلت يديها في لحيته و تبسمت...كان يبان شباب بزاف وهو راقد...اودي هي يبانلها شباب فقاع الحالات تعشق فيييه عشيييق...بعدت يديه عليها و ناضت لبست لبينوار تاعها و ناضت دخلت للدوش وقفت حدا لمرايا تشوف فروحها...جات فراسها ديراكت بلي نسااو الصلاة بيهاا بيه اا ربي علاه مفكرهاش هي الستراس فرفشها وهوو كان مقلق...فوتت يدها على وجهها و استغفرت
ميار:ياا ربي تسمحلييي
رجعت خرجت جابت بيجامة و دخلت للدوش...دوشت...اغتسلت و توضاااات و خرجت...لبست لباس الصلاة تاعها و دارت تيليفونها تشوف القبلة...و فرشت سجادتهااا صلات العشاء لي قعد فيها و زادت صلات الفجر و قعدت تدعي ربي يسهلها فزوااجهاا....
حل هو عينيه شافها تصلي...دار يده تحت راسه و قعد يتفرج فيها تفرج بزاف فليوتوب على الصلاة و عرف قاع الاساسيات بصح جرب مرة وحدة برك...للامانة مفهمش الهدف و الغاية منهاا...هو معندهش الوقت ابداا باش يصلي خمس مرات فالنهار (متاكلونيش ني نحكي على عصام 🥲)...تنهد و قعد يقارع فيها تكمل مبغاش يقطعلها شاكانت دير....شوية و شافها دارت عنده و تبسمت معاه بابتسامتها الملاكية
ميار:صبااح الخيير
تبسم لا اراديا:صباح النور
قلعت قشها تاع الصلاة و ناضت معرفتش شا تهدر معاااه و اصلا كانت حاشمة...قعد يتبع فيها بعينيه...جيدت سااش و بدات تنشف في شعره....تقعد من بلاصته و قدم باسها من عنقها و دالها الساش قعد ينشفلها في شعرها و يشوف فيهل من خلال المراياا
عصام:شعرك شبااب مياار
شافت فيه من خلال لمرايا:شكرااا
ضحك بخفة:الربب العاليي علاه راكي تجاوبيني بكلمة راني منعرفش نهدر
ضحكت:حشمانة منك
طلع حاجبه:الووغ لا ميار من بعد قاع شا صرا حشمانة مني ؟!
حكت راسها باحرااج:هههه العرس فات شباب
طلع كتافه:هادي من المسلمااات
ضحكت:زوجي الفيلسووف
عصام:شكون الكاتب تاعك المفضل *طفا الساش و دارلها ظفيرة*
قعدت تشوف فروحها:جاين اوستن
هز راسه بتفهم:روماانس يعنيي
تبسمت:نعشقها و نعشق اسلوبها و كلشيي و نتا
شاف فيها شوية و جاوبها: دوستويفسكي و شكسبير
شافت فيه بحزن:روميو و جولييت
تبسم و قدم باسهااا:انا نروح ندوووش عمريي
تبسمت معاه:صحاا عمريي شوف جبتلك بيجاما كيما تاعي باش نلبسو كيف كيف حطيتهالك فالدوش
زاد باسها بخفة:صحيتيي الزيين
راح هو للدوش و هييي هودت للكوزينة تشوف كاشما طييب...