دولــوريــس "فـي عـشـقـك سـأفـنـى

مدّ و جزر

❌ممنوع النقل بدون اذن مني❌
➰دولوريس"في عشقكَ سأفنى"➰
📌بقلم:ميلو ✍🏻
🖇الفصل الرابع: مدّ و جزر🖇
#الحلقة_104
عصام فات لول فرااا شوية خدمة كانت عنده مع ليلي...و هي طبعااا بقات تتماطل عليه بلعاني باش ميروحش عند ميااار...
عصام:ليلييي خفيييف عندي صوالح
قلبت داك دوصييي قريب تقطعه بليناغ...خايف على لالة تقارعله...بقات تقرا فيهم
ليلي:كلشي مريقل ايفانتيكوو يقدرو يجيبو السلعة مكانش بروبلام
شد عليها ليدوصيي:مالا نوضيي نروحو
شافت فيه:وين ؟!
عصام:نوصلك فطريقي ليلي هايا
حتى بغات تقوله لااا بصح كان عندها فضوول تشوف وين دايها
ليلي:اوووك
رفدت صاكها و نواظرها و راحت معاه...خرجو مع بعض ركبت معاه و قلع يسوق...كانو بزوج بيهم ساكتين حتى شافته حبس حدا كافيي و نزل شراا قهوة و رجع حطها...بقات تشوف فيها هادي مشي القهوة لي يشربها هو و هو اصلا ميشربش قهوة من غير لكافي شوب تاعه وولا من يد يدير فيها الكونفيونص تسما هذا لست الحسن...ميزت مليح فلابوات باش تقرا اسم المحل
ليلي:صوالحهم شابين
يسوق و يهدر:ميار تبغييهم انا تعرفيني منشربش
سكتت و مردتش...وصلها لبلاصة قريبة لوين كانت رايحة
عصام:ليلي كيما تفاهمنا الاجتماع هاداك تروحي معايا
هزت راسها:اكيييد
تبسم معاها و قارعلها قدما بعدت شوية و راح هو لعند ميار ديراكت....كي وصل عيطلها شوية و خرجو هي و رشا قعد يميز فيهااا...و نزل ملوطوو..قدمت سلمت علييه من و من و كي جات تبعد شدها و طبع بوسة متحوفة في خدها و همسلها
عصام:اشتقت
هي وجهها تلون بالحشومة حدا رشا لي دارت روحها مهبولة و راحت نجري ركبت فلوطو و شافت ميار فعصام
ميار:مراناش وحدنا
عصام:نتي رحتي و خليتيني
ميار:متتعقنش
عقد حوااجبه:انا نتعقن ميار ؟؟
تبسمت ببلاهة :هاياااا عصام
راح حللها لباااب ركبت و راحو....طبعا قدما كان يتوقع يتجرجر معاهم فاقو توقعاااته...مخلاو وين راحو....حتى لي يبيع التوابل و راحو عنده قريب خرج من جلده بصح شاباغي يدير فالاخير هو ميبغيهاش تخرج وحدها و خصه يتحمل مسؤولية حكامه(شوفوووووووو ولدييي كييي دااااير كحلوووووووووو متصيبوش كيفه حتى فالاحلام)...خلاهم في غرضهم دارو و شراااااو كي كملو كان وقت الفطوور...همست رشا لميار
رشا:نروحو نفطرو ؟!
ردتله بنفس الهمس:عصام مياكلش فريسطورون يعني ديجا انجاز لي كلا عندنا
هزت راسها بتفهم و ركبو معاه رجعهم...كي قاراا لوطوو نزلت رشا و جات ميار نازلة بصح شدلها يدها
عصام:قارعيي نتي نحتااجك
راحت رشا سبقتهااا و بقات تشوف فيه ميار
ميار:هايا ندخلو الداخل و نهدرو
نفا براسه:خلينا نروحو غي انا وياااك موعد كي شغل مراناش متزوجين
شافت فيه و تبسمت:كشغل مراناش متزوجين ؟!
هز راسه:وااه
ميار:سووووغ !!
هز راسه:وااه هايا حمبوووك
تبسمت:تمااااام
ضحك من قلبه كي وافقت كي شغل صح مراهمش متزوجيين و يحاول فيها على موعد...قلع لوطوو و راح ديراكسيون للدار لي فوتو فيها ياماتهم لولين.....