ولو انك تلاحظ شفت عيني وهي تروي حديث الحب عني .

Part. 9

بعد مرور اسبوع على نفس الروتين مافي احداث جديده ...
-
قاعدين يفطرون
نجلاء بصوت عالي : يا لله يا مها وين الخبز
مها جت بعصبيه : يمه شوفي ولدس اشغلني
هاشم : خلها يا حمد
حمد وهو ميت ضحك : يبا ماسويت لها شي بس هي تدلع
و قعدو يفطرون
هاشم : منيف روح اليوم انت و حمد شيكو على الحلال
منيف اشر على خشمه : على خشمي
ابتسم هاشم: عليه شحم ، اليوم جايين عبدالعزيز و عياله
كلهم استانسوا
عبدالوهاب ب استغراب : كل ذا الوناسة عشان عمي عبدالعزيز بيجي؟
حمد ابتسم : اي والله مستانسين انه بيجي ، عنده ولد اسمه سعود وسيع صدر مثل ابوه
عبدالوهاب: اي اذكر عمي عبدالعزيز وسيع صدر و مزوح و يحب الوناسة و ضحك
ريم بصوت واطي : مضاوي
مضاوي بنفس نبرة صوتها : لبيه ؟
ريم : ترف بنته كم عمرها ؟
مضاوي: 23
ريم : اي يعني كبرنا
مضاوي: اي
انتهو من الفطور
-
في سيارة عبدالعزيز
ليان : سعود كم باقي و نوصل ؟
سعود وهو يضحك : تونا محركين
شيخه : جوعانين ؟
ترف : اي والله ما تغدينا
عبدالعزيز: اجل بنوقف عند ماك نطلب
سيارة عبدالعزيز - جمس يوكن 2021-
ترتيبهم ب سياره كذا 👇🏼
سعود لي يسوق و جمبه عبدالعزيز
بالمرتبه الثانيه ترف و شيخه
و المرتبه الثالثه لانا و ليان
واخر شي حاطين شناط حقت سفر
مرو ماك و كل واحد اخذ طلبه
ترف ارسلت للبنات صورة طريق
مضاوي: مشيتو ؟
ترف : اي
مها : يوه يا الحماس
ترف : حتى انا متحمسه بس امي تقول اول مانروح هناك بنبدا ننظف البيت و انا اكره تنظيف افف
مها : ولا تشيلين هم بجي انظف معاكم
ضحكت ترف : من غير ماتقولين بقولكم تجون تنظفون معاي خواتي انتو على ايش على الفاضي
ضحكت مضاوي: احلا من يقول خواتي والله هههههههه
-
بالديره ...
مها وهي تركض ل امها : يمه يمه ترف تقول مشو
نجلاء ب ابتسامه : الله يجيبهم ب سلامه
ريم وهي تشرب قهوه : امين
-
مسعود : اليوم بيجي عبدالعزيز ؟
هاشم : اي بيجي اليوم ان شاءالله
مسعود: يوه مبطي عنه ، كيف دنيا به ؟
هاشم: بخير الحمدالله
مسعود : بيجي هو وعياله صح ؟
هاشم هز راسه ب ايه
-
بعد المغرب ..
وصلو عبدالعزيز و عياله ، عبدالعزيز و سعود طلعو للقهوه
و خلصو تنظيف البيت ترف و شيخه و راحو بيت هاشم

في القهوه ..
الكل قام يرحب و يهلي ب عبدالعزيز و سعود
هاشم قام يسلم عليه هو و مسعود اخوه و شياب ديره

في بيت هاشم ..
نجلاء استقبلتهم بالبخور : يا هلا والله يا هلا
سلمت عليها ترف و شيخه
جت ريم و سلمت عليهم
نجلاء وهي تناظر ريم : وهاذي زوجة ولدي عبدالوهاب
شيخه ب ابتسامه: اجل هاذي ريم المزيونه
ابتسمت ريم بحيا
دخلو مها و مضاوي لي كانو بالمطبخ و سلمو عليهم
مها وهي حاضنه ترف: وايي تو مانورت ديره
نجلاء ب اعجاب بشكل ترف : انشهد انها توها نورت
ترف كانت لابسه مخور موف و حاطه ميكب محليها فوق حلاوتها و لابسه سلسال عليه اسمها و كان شكلها خ ي ا ل
صبت مضاوي لهم القهوه
جاء حمد و ارسل مها تجيه راحت له
حمد وهو يصفق و يصفر : لله الله وش ذا زين يا مهاوي
ضحكت مها: اوش لا يسمعون بعدين انا طول عمري مزيونه
ضحك حمد : ذي لي مدحنها و صدقت دزي بس
مها : يشينك كمل مدحك طيب لازم تخرب المهم وش تبي؟
حمد لي تذكر : اي صح ابوي ترا عزم كل الديره بمناسبة وصول عمي عبدالعزيز
مها : متى ؟
حمد : بكره ، الحريم هنا بالبيت و الرجال بنسوي لهم خيام برا بلغي امي
مها : طيب
ومشت تقولهم دخلت و قالت ل امها
نجلاء بصوت جهوري: و بكره فيه عزيمه بمناسبة وصولكم تجهزوا
شيخه: ليه الكلافه و انا اختك ؟
نجلاء: ما من كلافه يا وخيتي
ترف وهي تكلم البنات : الحمدالله اني حاسبه حساب ذا العزايم وجايبه ملابس زينه
ريم فهت تناظر شكل ترف لي غصب يشد لواحد يفتن شكلها و جسمها كلها على بعضها تفتن
مها : حتى انا عندي الحمدالله
مضاوي بزعل : يوه انا ما عندي بقول ل حمد نروح سوق بكره قبل العزيمه
ترف : وانتي ريمي
ريم مفهيه تناظرها
هزتها ترف
ريم استوعبت : هلا هلا
ترف : وين رحتي ؟ اقول عندك ملابس لعزيمة بكره
ريم با استغراب: اي عزيمه ؟
ضحكو البنات وبدت ترف تحكي لها عن العزيمه
ريم : اها اي عندي الحمدالله
نجلاء : وين لانا و ليان ؟
ريم : برا يلعبون مع نوني
شيخه بضحك : لو تشوفون حماسهم ان في احد كبرهم يلعبون معه
ضحكت نجلاء: والله حتى نوره متحمسه انه بيجون عندها بنات لأن احنا ما عندنا بنات صغار يلعبون معها مافي الا هاشم و ولد هههههه
مها وهي تحاكي ترف : تروف بكره تعالي نتجهز مع بعض
ترف : لا صعبه في اخوانك و راح يتضايقون انتو تعالو عندي
مضاوي: و سعود ؟
ترف : سعود ماراح يكون بالبيت بيكون مع اخوانك
مها: نشوف نشوف
ترف: وانتي ريومه تعالي معاهم
ريم لي ابتسمت على دلع : ابشري
-
سعود : هههههههه خلاص خلاص يا ذياب بطني عورني من ضحك
التفتو شافو حمد لي طايح يضحك رجعو يضحكون بصوت عالي
هاشم بعصبيه : اقطع و اخس انت وهو اصه اصواتكم عاليه
حمد وهو يحاول يكتم ضحكته : اسفين يبا
ناظر منيف سعود لي كان وجهه احمر من ضحك ور جعو يضحكون
هاشم بعصبيه: وشقول ؟
مشو لعيال على طول
منيف : يا عيال والله اني مشتهي عوار قلب مشينا نروح لمحل العصيرات
الكل : يلا
و راحو يأخذون كلهم عوار قلب و جلسو يشربونه عند عتبة باب بيت عبدالعزيز
حمد : على ذا الجمعه سمعنا يا منيف جديدك
منيف وهو يدخن : ما يحضرني شي الحين
ذياب وهو يدخن : ما هي بصعبه عليك
سعود لي كان وده يسمع قصيد منيف من كثر ما يسمع مدح حمد لقصيد منيف: يله عاد منيف
منيف وهو يناظر ذياب و ذياب يناظر فيه :
انت الصديق إليّ كسبتّه ب دنيايّ
وطلعت به من وحل الأصحاب صافيّ
أرهب بِك الدنيا و أخوف بِك أعداي
وانا عضيدك لا غدا بك الوقت جافيّ .
ذياب لي فز من مكانه و بصوت عالي : احتزام احتزام لعنبو اعدائك
ضحك منيف : تسلم جعلني ما خلا
ضحكو حمد و سعود
عبدالوهاب لي طلع من بيته وشافهم : وش عند الذياب قاعده هنا
منيف : ابد ماعندنا شي تعال اجلس معنا
عبدالوهاب: لا ابوي يبغاني
ذياب : رح دربك خضر
مشى عبدالوهاب
-
مها : اي وبس ذولي عيال عمي مسعود
ترف : ماشاءالله
مضاوي : بنات احس شلت هم بكره تو اسمع امي تقول ل خالتي شيخه ان بيجون ناس كثيرر * تقول خالتي ل شيخه احترام لها
ترف : احس عادي انتو متعوديين و تعرفونهم انا لي ما اعرفهم و اول مره بشوفهم
ريم : يوه الله يعينس على حريم الديره
ترف : ليه ؟
مضاوي : بكره بتجيس اسأله قد شعر راسس يبون يعرفون كل شي حتى بيسئلون عن يوم ولادتس
ضحكت ترف : بالغتو بنات
مها : اي بكره نشوف
ترف : المهم وش راح تلبسون بكره ؟
ريم : انا بلبس فستان لونه اخضر غامق ماسك شوي و فيه كريستالات من فتحة الصدر
ترف : وانتي مهاوي
مها : بلبس فستان لونه وردي غامق يوصل ل تحت ركبه علاق
ترف : و ميمي ؟
مضاوي: ما ادري والله
ريم : وانتي وش راح تلبسين ؟
ترف بضحك : لا خلوها مفاجاة
شهقت مها وقامت تطقها بشويش : بعد ما قلنا تسكتين يا لغشاشه
ضحكت ترف : والله عاد انتو لي قلتو سألتكم وانتو لي تكلمتو
ريم بينها وبين نفسها ( يا حلوس بس وياحلو ضحكتس )
-
بالحوش عند الاطفال ..
دخل منيف الحوش و شافته نوره و ركضت له تضمه
نوره ببراءه : وينك ؟ ما ثفتك
* نوره عندها صعوبه بنطق بعض الاحرف
منيف ب ابتسامه : كنت طالع يا عيون منيف
و التفت يشوف تؤام لي يطالعونه
نوره : ذولي صديقاتي الجدد
منيف : ماشاءالله
و مسك ليان و لانا : شسمك يا حلوه ؟
ليان : انا ليان و ذي اختي لانا
منيف : انتو تؤام ؟
ليان : ايه
منيف وهي يكلم لانا : وانتي يا حلوه شفيك ساكته
لانا لي تستحي بعكس ليان جريئه شوي ليان : لانا تستحي
ضحك منيف : يا حلو المستحيين بس
منيف لي شك انهم بنات عبدالعزيز وحب يتأكد : منهو بناته انتو ؟
ليان : انا بنت عبدالعزيز
منيف : اها ، عرفتيني ؟
ليان : ما اعرفك بس شفتك ذيك المره ببيتنا
ابتسم منيف و دخل يده بجيبه يعطيهم كلهم حلاو و دخل البيت يروح غرفته
ركضت لانا ل ترف و بيدها الحلاو
لانا : ترف الرجال عطاني حلاو
ترف ب استغراب: اي رجال ؟
مها : شكله واحد من اخواني ،دقيقه بسأل نوني و نادتها ، مين لي جاء ؟
نوره : عمو منيف
مضاوي وهي تضحك: تقصد منيف يا حلوك يا لانا
لانا ابتسمت ل مضاوي و قالت ل ترف : ترفي افتحي لي الحلاو
فتحت لها ترف و واحت تركض
ريم : لو اني ما دري انها اختك كان قلت انها بنتك من كثر ماهي متعلقه فيك
ابتسمت ترف : تصدقون من كثر مااحب لانا احس انها بنتي فعلاً يوجعني اي شي يوجعها و يفرحني لي يفرحها
ريم : طيب و ليان ؟
ترف : حتى ليونه بس لانا لأنها قريبه مني اكثر و لأني ربيتها احس كذا ولا كلهم احبهم
مها وهي مبتسمه بحب ل ترف : الله يحفظكم ل بعض
ابتسمت ترف : امين
قطع حديثهم شيخه وهي تقول ل ترف : يلا ترف بنمشي
مها : وين يا خاله لسى بدري
شيخه ب ابتسامه : بدري من عمركم يا عمري عبدالعزيز و سعود رجعو لبيت ف لازم نرجع
مضاوي: طيب خلي ترف شوي و بعدين تجي و انا بوصلها بنفسي
شيخه : لا وين ما استغني عن ترف احتاجها معاي
نجلاء وهي مبتسمه: كلنا ما نستغني عن تروفه
ابتسمت ترف ومشت تسلم عليها
نجلاء وهي حاضنتها : يا حلوك يا ترف ماشاءالله
ترف وهي مبتسمه وسط احضان نجلاء: حلة دنياك
نجلاء ب ضحك : حلوه و لسانها معسول
ضحكت ترف
و مشو يطلعون ركضت لانا ل ترف و همست لها
لانا بزعل : ليه يمدحونك انتي حقتي بس انا
ضحكت ترف وردت بنفس الهمس : ياحلو لي يغارون اموت عليك
لانا ابتسمت وحضنت ترف : وانا اموت فيكك
-
شيخه : والله انبسطت عند نجلاء
عبدالعزيز وهو يناظرها : يا حظهم قعدو معك وسمعو سواليفك
ضحكت شيخه : دايماً تفوز علي بالكلام الحلو و ماتخليني اعرف ارد
عبدالعزيز: لا تقولين شي انا لي بتغزل و امدح
شيخه توردت خدودها و استحت و نزلت وجهها بحيث ينزل شعرها على وجهها و مايشوف حياها
ابتسم عبدالعزيز: حافظك و حافظ حركاتك
شيخه طقته بشويش : خلاص عبدالعزيز
ضحك عبدالعزيز
-

اتمنى انكم مستمتعين ب البارتات و الاحداث 🤍
دعمكم دافع لاستمراري 😌🧡🧡🧡