ولو انك تلاحظ شفت عيني وهي تروي حديث الحب عني .

Part 20

بعد مرور الايام و الاسابيع و الاشهر و لكل كان ينتظر- اليوم الموعود - اليوم لي بتنزف بنت العالي ل منيف بن هاشم قدام الكل ، الكل كان ينتظر زواج ترف على احر من الجمر يبغون يشوفون من اختارت لأن المعروف عن العالي مايعطون بناتهم اي احد و فعلاً يوم تزوجت ما تزوجت الا ولد التاجر هاشم ( منيف ) الكل كان يعرف هاشم بتجارته بالبشوت و كان مشهوره محلاته بالرياض خصيصاً و خارج الرياض
-
كانت شايله الفستان لي صممته بنفسها ل بنتها و عيونها كلها دموع : ترف هاذا فستانك
انبهرت من الفستان : الله ماما مرا حلو احلا من ماتوقعت يجنن و قامت تضم امها و هنا بكت شيخه
ترف : ماما تكفين لا تبكين ما ابي اصيح تكفين
مسحت دموعها : لا لا تبكين اليوم افرحي بس
كان الفستان ناصع البياض كان ماسك من فوق الين خصرها بارز جمال خصرها ،و فيه فتحة V من عند الصدر ، بعدها الخصر فيه نفشه لكن نفشه هاديه مره ،عاري الاكمام ، عليه كريستالات و طرحه حقتها كانت طويله و برضو كلها كريستالات كان يجنن و مافي منه الا واحد لأنه تصميم خاص
-
في الصالون
مها : يمه كيف شكلي
التفتت نجلاء و شافتها كانت تجنن ماشاءالله : ماشاءالله مره حلو طالعه عروس يا امي
ضحكت مها : والله انتي لي طالعه حلوه وشذا يا ام العريس ياحظك يا هاشم بذا الزين
ابتسمت نجلاء : استحي يا بنت
ضحكت مها
جتهم ريم : خالتي كيف مكياجي حلو ؟
نجلاء : وشذا زين يا الريم ياحظك يا عبدالوهاب
مها : الله مره طالعه حلوه ماشاءالله
استحت ريم
مضاوي : يمه وش اسوي بشعري
نجلاء : كيفك
احتارت مضاوي و دقت على ترف
ردت
مضاوي : يا هلا والله بالعروسه و زوجة اخوي
ضحكت ترف : ياهلا ب اخت زوجي هههههههه
ضحكت مضاوي : تروفه اسمعي وش اسوي شعري
فتحو الكام و بدت تشرح مضاوي ل ترف فستانها
ترف : اها اجل ما دام فستانك فيه اكمام طويله ارفعي شعرك على فوق و سويي ميكب سموكي
مضاوي : وش سموكي ؟
ترف : ماعليك قولي للارتست كذا و تسوي لك بيطلع شكلك حلووو ماشاءالله تخيلت شكلك
مضاوي : تمام ، اجل بقفل ماابي اعطلك
ترف : يله باي حبي
و قفلت
-
جت الميكب ارتست لقصر العالي و بدت تسوي لهم كلهم
ماعدا ترف جايبن لها ميكب ارتست لها لحالها بمناسبة انها العروس
الهام : شوفي سوي لي ميكب سموكي
الارتست : ذويقه استاذه الهام
ابتسمت لها الهام و بدت تسوي لها
دقت الهام على رئيسة الخدم مايا
الهام : مايا وصلتو القاعه ؟
مايا : اي استاذه الهام
الهام : اجل حطو التوزيعات لي جات
مايا : امرك استاذه الهام
الهام : يله باي و اي شي يصير دقي علي
مايا : امرك
و قفلت
-
واقف يكلم حقين العشاء
ذياب : اتفقنا خلاص
راعي المطعم : تمام
ذياب : و صلكم المبلغ صح ؟
رد : اي
ذياب : اجل توكلنا على الله
وقفل
منيف : ها وصلهم المبلغ ؟
ذياب : اي وصلهم
عبدالوهاب : منيف بتروحون شهر عسل ؟
هز راسه : اي
حمد : وين بتروحون ؟
منيف : بنروح سيشل بنقعد فيها 10 ايام بعدها بنروح ايطاليا
ذياب : اقعد والله مانت بسهل
منيف ابتسم
هاشم جاء و بيده صناديق
قعد قدام منيف و فتح صندوق الاول و كان طقم الماس يجنن من كارتير
و فتح صندوق ثاني طقم ثاني لكنه ذهب
و طلع الكيس حق [swarovski] و كان خاتم
منيف عرف ان ذا كله ابوه جايبه ل ترف : ماله داعي يا ابوي
ابتسم هاشم : تستاهل الترف
و طلع طقم ثاني من كارتير و مده ل عبدالوهاب : وذا ل ام هاشم
عبدالوهاب : ماتقصر يا ابوي
قام حمد يقهوي ابوه
-
وصلو حريم العالي فندق ريتز كارلتون قبل الكل كانو يبون يتجهزون بعدها ينزلون للقاعة
-
ام بشاير : بشاير بتروحين ؟
هزت راسها : اي العمه الهام عزمتني
ام بشاير : وين بيسوون العرس
بشاير : في فندق ريتز كارلتون في قاعتهم
ام بشاير : والله وسويتيها يا ترف و خذيتي ولد التاجر و سوا لها زوجها بعد في فندق و مو اي فندق بعد
بشاير : الله يهنيها و يرزقنا
ام بشاير : تعالي بس وريني صور الفندق
و راحت توريها صور الفندق
-
في شقه
قاعدين فيها مسعود و عياله
مسعود : الله يبارك لهم يارب والله اني مستانس ل منيف يستاهل
ساميه : اي والله يستاهل منيف رجال و شهم
كان مرزوق يسمعهم وهو صدره يشب نار من لغيره و الحقد و الحسد و كذلك دانه كانت تموت من القهر
انفال : يمه وش لون فستانك ؟
ساميه : ازرق
انفال : وانتي حصوص ؟
حصه : وردي
انفال : وانتي دانه ؟
دانه بخبث : ابيض
شهقت ساميه : لا غيريه ما يصلح يلبس ابيض الا العروسه
دانه : وشذا تفكير القديم عادي البس ابيض
مسعود بعصبيه : بنت استحي على وجهس تقولين ل امك تفكير قديم
خافت و اعتذرت على طول بعدها قامت غرفتها
-
بعد اذان المغرب
وصلو اهل منيف للقاعة عشان يتجهزون فيها
دخلو جناح ترف لي كانو حاجزينه خصيصاً لها و لاغراضها
دخلو عليها بالغرفه
قامت ضمتهم كلهم
كانو حاطين الميكب و مسويين شعورهم لكن لابسين البجامات
ترف : اخخخ الحمدالله انكم جيتو تساعدوني ولا كنت بضيع من دونكم
ريم بمزح : تحت امرك
و ضحكو
ترف : بنات وش رايكم نطلب من ماكدونالدز مااكلت طول اليوم و لا افطرت بس كليت بسكوت و عصير
مضاوي : لا لازم تشبع عروستنا و تعبي بطنها
ضحكت ترف و بدو يقولون لها طلباتهم عشان تطلبها
بعد ٢٣ د
وصل الاكل و بدو يأكلون و يسولفون عن العرس و توتر ترف
-
تحت في القاعة
الخدم منتشرين بالقاعه يرتبون و يجهزون كان يطغى الون الابيض بكل مكان حاطين بالممر لي بتنزف فيه ترف ورود بيضاء و حمراء و شموع و حاطين على الدرج لي بتنزل منه ترف شموع
الهام : مايا جيبو توزيعات دهن العود
مايا : امرك
شيخه تتكلم مع المنسقه : اي و ابي اذا جت تنزل تكون انوار القاعه خافته و نور حق الدرج لي بتنزل منه الوحيد لي ساطع
المنسقه : امرك
مشاعل جايه و بيدها توزيعات لي مسويتها شيخه : شيوخه امسكي هاذي التوزيعات
شيخه ابتسمت لها : الله يسعدك يارب
ابتسمت مشاعل : امين و ياك
نجلاء جت : شيوخه تبيني اساعدك بشي ؟
جتها شيخه و مسكو ايادي بعض : لا ، بس والله اني خايفه و متوتره اكثر من ترف نفسها شايله همها ب حياتها الجديده و كيف بتتعامل مع زوجها كثير اشياء يا اختي
طبطبت عليها : بنتك بالحفظ و الصون و انتي تعرفين منيف من يومه صغيره و بتشوفينها اي وقت تبينها و تشوفين منيف كأنه اب شخصيته شخصية اب يهتم و يتحمل المسؤوليه و يصبر والله مو عشانه ولدي بس والله هو كذا شخصيته كذا و انتي ادرى
ابتسمت لها شيخه : الله يريحك نفس ماريحتيني
ابتسمت لها و رقو مع بعض يتجهزون لأن المعازيم على وصول