لسه صدى كلمه تاني بت!!!، بجيني في اضاني، امي شعورها في الوقت داك اتحول من فرح لتعاسه، الكلمه دي وجعتها اكتر من ألم الولادة زاتو، الدايه قالت لأبوي انو دي قسمتك وانت عارف الزول البربي البنات وبحسن ليهن جزاءهو الجنه، بس ما عبرها وبقى يسب، وينبذ في امي، وطلع وهو غضبان،وجاء باليل سكران نفس كل زهجو فينا انا واخواتي،ومشى لامي قال ليها تاني اوعى تلدي كفايه الفقريات الخمسه ألفي راسي ديل، انا ما عايزك تلدي تاني، بقيتيني ضحكة،الرجال كلهم بقولو لي ابو البنات، انتي عارفه في منطقتنا دي العز ولد لا جاهة بنفع لا حاجة تانيه، الرجوله انك يكون عندك ولد وانتي بقيتي رجولتي معدومة بجيبك لي البلوات ديل يا سكينه..
للان الذكريات دي ما عايزة تخليني حالتها ليها ١٦ سنه، بس زي الحصلت الليله، الكرة الكان من ابوي اتجاهنا، كان كرة ما عادي وللان مستمر حتى بعد زوجنا بالقوة، قطع تفكيري صوت الصادق وهو بصيح لي، جيتو قال لي الجلابيه وين؟، قولت ليهو دقيقة اكويها ليك، قعد يكورك فيني ويقول للان ما كويتيها يا مريم انا ما قولت ليك ماش مشوار مهم، قولت ليهو ٥ دقائق، قال لي انا ما عارف المصبرني عليك شنو مره عاقر ، وكسلانه في شغلك، انا باكل فيك بالمجان، وبدفع فيك مصاريف على الفاضي، قولت ليهو انا شغاله خدامه لاختك تاني داير شنو، قال لي بتردي كمان في وشي انت عايزة تنضربي ولا شنو، سكتا منو شلتا الجلابيه وفوتا، ما ناقصني ضرب منو...
في أثناء ما بكوي في الجلابيه جاني اتصال من عائشه، قولت ليها الأخت مالك ما اتصلتي بي ليك زمن، قالت لي وهي بتبكي يا مريم ابوي ضرب فاطمه في عينها، وقداها ليها، ختيت المكوة وبكيت قولت ليها لشنو!!!، السبب شنو!!، كيف يعمل الشي دا،قالت لي عشان قالت ما دايرة تتزوج مهند، قولت ليها ابوي كيف يديها لمهند وهو سمعتو واطه، قالت لي عشان القروش، قولت ليها ما هو اصلا ابوي طبعو كدا حتى نحن جدعنا للرجال كشا مشى عشان مصالحو، قالت لي اي كلامك صاح ، قولت لي بس كفايه البقت علينا، ما بنسمح ليهو يتمادى اكتر من كدا ، كنت مركزة مع عائشة وما انتبهت للمكوة، شميت ليك ريحة حريق، عرفت انو المكوه شالت جلابيه الصادق، الليله يا مريم!!! ، زحيت المكوة منها سريع وقولت لعائشه خليك في الخط، فصلتها وقولت في نفسي الليله منتظراك محاضرة طويله عريضة، تاني قولت لي عائشه انتي معاي، عائشه قالت اي معاك، قولت ليهاخديجة عارفه بالموضوع لازم نكلمها، قالت لي انت عارفه خديجة راجلها كعب، وما بخليها تتكلم لانو شكاك الا تسرقو منو وتتصل، قولت ليها السكير الكعب، هو عشان بخونها الكلب قايلاها بتكون زيو، قالت لي حا تجي انتي تشوفي وتساعدي فاطمة، قولت ليها اي حتى لو طلقني الصادق حا امش انا لازم أوقف عرس فاطمة، قالت لي نحن ما قولنا كدا في عرس خديجة الحصل شنو في النهايه عرست، قولت ليها انا ما بيائس نهاي وحا اعمل المستحيل عشان أوقف العرس دا، قالت لي احتمال يوقف عشان ابوي ضرب عينها، قولت ليها ديل ما بغيرو رأيهم عشان ما يعملو ليهم سمعة في البلد كعبه، قالت لي بنقدر نقيف في وجة أسرة زي أسرة العليقي، قولت ليها حا نحاول مع ابوي ولا بنصلهم أسرة العليقي، قالت لي بس ابوي مش قال تاني ما تجني بعد العملناه في عرس عائشه، قولت ليها مالي والمالو انا بعمل ألفي راسي بس ، قالت لي طيب تعالي غاشياني وانا حا اكلم محمود ، قولت ليها تمام، وقفلت منها....
