"بعد مرور 5سنوات "
بلسان فاطمة
سبحان الله الأيام مرت بسرعة والليله انا شغاله كمتدربة في مستشفي الخرطوم، بعد إتخرجت، واختي خديجة ماسكة مدير الماليه في مصنع ناس منتصر وجابت ليها بت سمتها منى ، واسي حامل في الشهر ٣ ، وعيوش عايشة احلي مع فارس وعندها احلى توأم في الدنيا مازن ومزن، وامو معتبراها زي بتها، وبالنسبة لمريم كبرت ليونة، واسي حامل يادب، وسمية دخلت طب الخرطوم، وحاليا في السنة التانيه، وابوي طبعا مات قبل سنة يا حليلو ونحن دفعنا ليهو كل ديونو ، عشان ما يتعذب،وقبل وفاتو اهتمينا بيهو شديد ووديناها اخصائين بس كلامهم كلو كان واحد وهو الضربة جات في السلسة الفقرية ومستحيل يمش. كان كل ما الناس يشوفوني مهتمين بيهو ومودينو بقولو ليهو والله يا الشاذلي لو كان عندك اولاد ما بنفعوك زي ما نفعنكن بناتك ديل، حقيقياً البنات نعمة ديل الناس الفاهمين طبعاً، ابوي كان ببكي لمن بسمع الكلام دا منهم وبعتذر لينا وبقول ظلمنا، بس نحن بنقول ليهو مسامحنك، أثناء ما بفكر كدة جاتني زميلتي قالت لي في واحد قال لي نادي لي فاطمة التخدر قلبي، عاينت ليها باستغراب، وقولت ليها دا منو البيشن السخيف دة، قالت لي ابعرفو بس قال لي قولي ليها لو ما جيتي، حا اخليهم يطردوك من الشغل، مشيت ليهو وقولت في نفسي والله اوريهو جايني الساعة ٧ صباحاً ،وكمان بقول انو بطردوني لو ما جات خدرت ليهو قلبو ، دا منو المتخلف دة.
لمن شوفتو كان مديني ضهرو بس حسيت بانو بعرفو وقلبي عمل شح، جيت عليهو وقولت ليها مستشفى التجاني الماحي ما هنا، أنت لو مجنون امش اتجونن هناك، أتلفت علي وحسيت بوخزة في قلبي لمن شوفتو وشعرت بشعور شوق مخلوط بوجع، قال لي فطوم صاح انا مجنون بس مجنون بحبك يا حبيبتي،يلا ورح عشان تخدري قلبي ويبطل شوق وحنين ليك، في اللحظة القال لي فيها الكلام دا حسيت قلبي عايز يطير من محلو ، مسكت دموعي بالغضب وقولت في نفسي ما تهتمي بيهو ، سكت مسافة وبقيت بعاين ليهو وهو بعاين لي، تاني قولت ليهو بجدية اسفة يا استاذ مهند القلب ما بتخدر، كنت دايرة افوت منو، قال لي لا بتخدر لو لقى الزول المشتاق ليهو، انا مشتاق ليك يا فطوم، طول الخمسة سنين دي كان الشوق كاتلني ليك، قولت ليهو ما تكضب يا مهند، قال لي انا ما بكضب يا فاطمة، لمن جرحتك حسيت بفقدك وحسيت انو الدنيا دي مسخت علي، وعرفت اني بحبك بس ما كان عندي جراءة اجي واعتذر، عشان كدا فكرت ابقى إنسان تاني عشانك يا فاطمة، عشان ابني مستقبلي معاك، وعشان تختاريني من بين كل الناس، سافرت واتغربت وانتظرتك تتخرجي وجيتك عشان ابقى ليك الزوج البحبك والبهتم بيك والما بشوف غيرك، قولت ليهو اتاخرت للأسف انا خطبت، قال لي كضابة انا متابع اخبارك، قالو لي كل ما يجيك عريس بترفضي، قولت ليهو دا منو الغبي القال ليك دا، قال لي ديل الناس الساعدتيهم يتمو عرسهم، قولت ليهو اكيد منتصر ومنذر، قال لي ايوا، قولت ليهو طيب انا برفضك ما عايزاك عديل فاهم، قال لي لا ما فاهم، قولت ليهو دي مشكلتك وقت كدا، صاح لي وقال لي حا اصبر عليك واكيد حا تكوني لي من تاني، أتلفت ليهو ومديت ليهو لساني بغيظ وفوتا، قولت في نفسي هو قال لي زمان لمن يبقى عمرك ٢٣ حا تلقي الزوج المناسب واسي جاء عشان يبقى هو،لا مستحيل أقبل بيهو.
