اتفأجات لمن شفتهم، جو علي وسلمو بأطراف أصابعهم، وتاني مشو لمهند، مهند قال ليهم ما كنتو تجو، قالت ليهو ملاذ السهرة ما بتحلا بدونك، ولو ما جيتنا نحن بنجيك، بدون يتونسو ويضحكو بأعلى صوتهم، مهند قال ليهم نحن في مستشفى وطو صوتكم شويه، قال ليه خالد مهند الليله ما شديد،خبراك تنصح فينا، أنت اكتر واحد بحب الازعاج، مره كدا طردونا بسببك متذكر، اسيل قالت ليهو شكلو اتاثر بالممله القاعدة في السرير ديك، انا قولت ليها دي اهانه على فكرة، قالت لي انت معتبراها كدا، مهند قال لي اسيل ما تتكلمي معاها هي عيانه ،حتن سكتت مني وانا قبلت منهم، وقولت في نفسي اخنقيها الاسمها اسيل دي، سمعتهم قالو لمهند امش جيب لينا بارد نشربو، مهند المتخلف مشا وخلاني برأي معاهم، بعد مسافه شميت ريحة سجائر، بديت اكح،واكح، مهند جاء داخل وبدأ يكورك فيهم، قال ليهم اطفو السجائر دي، فاطمة ما بتنفع معاها،وبعدين شيلو باردكم دا واتخارجو خلاص الوقت اتأخر، ملاذ قالت ليهم دا طردنا ورحكم نمش بكرامتنا، فاتو، وأنا خلاص حسيت نفسي كتم،والكحة زادت، مهند فتح الشباك، وجاء علي وقال لي قومي، قومتا، اداني مويه اشرب، قولت ليهو ما شاعرة نفسي كويسه ممكن تجيب لي البخاخ، جابو، بخيت منو، حتن رجعت لحالتي الطبيعيه، مهند قال لي اسف عشان جوك وازعجوك، قولت ليهو ماف مشكله المهم فاتو اسي، رقدتا، وهو فات رقد في سريرو بقيت اتقلب وما قادرة انوم ، مهند قال مالك حاسه بحاجة، قولت ليهو ما عارفة حاسه بقلق ما طبيعي، قال لي في شنو، من شنو مقلقة، قولت ليه ما عارفة، تاني جسمي كلو رجف، مهند جاني وقال لي فاطمة حاسة بشنو، مالك بترجفي، قولت ليهو بردانه يا مهند، انخلع ومسك يدي لقاهن تلج، قال لي ماش انادي الدكتور، قولت ليهو لا خليك معاي، مشى وجاب غطاهو، ودبلو بي، بس لسه البرد ما راح مني، تاني ضماني عليهو، قال لي ما تخافي ما بجيك شي، قولت ليهو بحس مبلوع شكلو دا الموت، قال لي ها الخوافة دي ما تقولي كدا، انتي ما حا يجيك شي، وحا تبقي كويسة وتدخلي الجامعة، وبعدين منو تاني البوجعو لا ما بسمح ليك تموتي، قولت ليهو لو بقدر اضحك كنت ضحكت، قال لي ما ضروري، تاني فكاني منو، وقال لي اثقي بي حا اغيب منك دقائق بس واجي، قولت ليها تمام، بعد مدة جاء مع الدكتور، الدكتور قال للممرضة تسحب لي عينه دم، وأنا اصلا مهبطة وبعد سمعت الكلام دا، هبطت زيادة، قولت ليهو انا بقيت كويسه، قالت لي الممرضة كلك ترتعشي كويسة بوين، مهند قال لي خليهم يشيلو منك دم، قولت ليهو بس انا بخاف، قال لي عايزة تفضلي كدا، رديت ليه : لا، قال لي طيب ابقى شاطرة وخليهم يشيلو منك دم زي البني ادمين الطبيعين، مسك يدي،وقال لي عشان ما تتوتري حا امسكها ليك، طعنوني، عاينت للممرضة بحرقة، الممرضة قالت لي مهند مرتك دي لو لاقتني في مكان واثقة حا تقتلني، ضحك وقال شكلها كدا، الممرضة مشيت وجاب لي كم غطاء وغطتني بيهم مهند كان قاعد جنبي في كرسي وماسك يدي، قولت ليهو شغل لي قرآن لو موتا على الأقل آخر حاجة اسمعها، قال لي حا اشغلو بس ما تقولي كدة تمام، هزيت ليهو راسي، شغلو.
