مريم قالت لي مهند دا يناشف زول كويس، قولت ليهو اي والله ما كعب للدرجة دي، ابتسمت وقالت لي وعلى فكرة لايقين كمان على بعض، خجلت وغيرت الموضوع بأني حكيت ليها دراما الفراشة، قعدت تضحك، بعد مدة جو عشان يسوقوني عشان العمليه، مريم قالت لي اقري كتير وما تخافي قولت ليها إن شاء الله، جاء مهند ومعاهو امو وابوهو، قال لي ما تعذبي الدكاترة وخليك زوله هاديه وما تعملي مشاكل، قولت ليهو ما تخاف ما بتحصل مشكله إن شاء الله.
______________________________
بلسان مريم
انتظرنا ٥ ساعات، لمن طلعت، مشينا عليها، دخلوها الغرفة طوالي، ما كانت صاحيه، مهند قال لي اقعدي معاها النمش اتكلم مع الدكتور واعرف العمليه مشت كيف، قولت ليهو تمام. لمن جاء قال لي الدكتور بشرني وقال العمليه نجحت ١٠٠ ٪، قولت ليهو الحمدلله الحمدلله،مشيت اتصل بخديجة وكلمتها، قالت لي الحمدلله يا مريم، تاني لمن دخلت الغرفة لقيت فاطمة صحت و مهند قاعد يصور فيها، قولت ليهو بتعمل في شنو؟، قال لي اسمعيها بتقول في كلام خارج نطاق التغطية، قولت ليهو يعني!!، اسي لزومو شنو التصوير، قال لي عشان اثبت ليها لانو ما بتقتنع، ضحكت وقولت ليهو خلاص وقف، قال لي دقيقة بس، جو ناس امو وابوهو داخلين، مهند طوالي وقف الفيديو، عاينو لفاطمة وقالو لي الحمدلله على سلامتها، قولت ليهم الله يسلمكم.
قعدت مع فاطمة للعصر لمن صحصحت مشيت منها، لمن وصلت البيت لقيت الصادق و تسنيم ماف ولقيت السيدة ميساء شرفت، ومعاها عفاريتها التلاته، مشيت بعليها قالت لي بدون مقدمات قولتي انا ما بكفي عشان امسخ ليهم عشتهم عشان كدا احسن اجيب اختي معاي، قولت ليها الزول بسلم حتن يتكلم وبعدين زي ما عندك حق في البيت دا انا كمان عندي حق، قالت لي حق شنو الصادق دا لو طلقك ما عندك اي حق عندنا، قولت ليها لكن هو ما طلقني، انا زوجتو ومن حقي اجيب اي زول يقعد هنا، قالت لي دي عاله عليهو سااي، قولت ليها اختي ما اول عاله في انت واولادك، انحرقت وقالت دا اخوي ملزم بي، قولت ليها ملزم بيك لو راجلك مات أو مطلقك بس اسي هو قاعد يرسل ليك لكن بتكمليهن في الدهب والعدة ومخليهو الصادق المسكين يتكفل بيك وباولادك عشان كدا ما تتكلمي كتير، قالت لي اسي ما فايقة ليك اصبري لي بس يا مريم بنجمك لسه كلامنا ما انتهى بس النرتاح شويه واجيك، قولت ليها منتظراك، دخلت جوة لقيت خديجة منزعجة، قولت ليها سمعتي صاح، قالت لي اي يا مريم انا ما دايرة اعمل ليك مشاكل، قولت ليها ميساء دي أصلها طبعها كدا ما تشتغلي بيها، قالت لي لا يا اختي كلامها صاح لازم القى شغل إن شاء الله اخدم بالبيوت لازم اصرف على نفسي برأي ، قولت ليها دا كلام شنو دا، ما تقولي كدا، لو عاشرتي ميساء دي كنتي عرفتي أنو أصلها جنها كلام فارغ ما تشتغلي بيها، قالت لي تمام بس لو حصلت معاك مشاكل تانيه، قولت ليها ماف شي بحصل لي، انتي ما عليك، الصادق موافق، مالك ومال ميساء، قالت لي الصادق قال ليك قاعدة لمتين؟، قولت ليها هو اصلا كدا ما بعرف يتكلم، بس بكون ما قاصد الكلام، قالت لي خلاص خلينا نقفل على السيرة دي، قولت في نفسي خديجة مضايقة شديد، الليله الاجي الصادق دا، حا اقول ليه اعمل حد لاختك دي.
