انخلعت شديد واتجمدت في مكاني خالتو عواطف صاحت لي وقالت لي تعالي، جيت ابوي بقا يعاين لي ساي، تاني قال ما عايزة تسلمي على ابوك، ختت الكباية ومديت ليهو أطراف أصابعي بس، قال لي عينك بقت كويسه شايف، كلو بفضل عبدالرحمن، قولت ليهو اي. ابوي قال تاني والله السلكة الضربت بيها عينها دي كانت كعبه عديل والبركة الاتعالجت،انا بقيت اعاين ليهو بطرف عيني، قولت في نفسي دا كضاب كضب شديد يعني قال ليهم كدا زمان ولا شنو؟!!! ، يعني هم ما عارفين هو سبب حالة عيني، عم عبدالرحمن قال ليه عدت على خير يا الشاذلي الحمدلله، لمن قال الكلام دا كنت بعاين لعمو عبدالرحمن وعرفت انو ما مصدقو وشكلو عارف هو السبب، بس مجاريهو ساي،بعدها عم عبدالرحمن قال لي امشي جيبي لابوك شاي، مشيت وجيت ختيتو ليهو، ابوي قال لي راجلك وين يا فاطمة، قولت ليهو في الغرفة، قال لي امشي ناديهو اسلم عليهو، قولت في نفسي الله يصبرك بس، جيت ماشه صادفتو هو ومنتصر كانو واقفين وبتكلمو، قولت ليهو ابوي منتظرك امش سلم عليهو، قال لي ابوك!!!، قولت ليها اي، في شي، قال لي لا بس مستغرب، مشيت معاهم ابوي سلم عليهم وقعدنا، وقال لمنتصر الحمدلله على السلامة، تاني ابوي قال لي تعالي اقعدي جنبي، قولت في نفسي دا مالو دا، قولت ليهو انا مرتاحة هنا، ابوي عاين لي بنظرة حارة، وتاني زح نظرو مني وبقى يتونس مع عم عبد الرحمن، بعدها سألني من كم حاجة، بس ما كنت برد لي وبهمشو، ظهر الغضب على وشو، قرب يصرخ فيني بس هدا، تاني بدأ يحكي ليهم عني وكيف كنت شاطرة، وكيف جبت في تامن ٢٧٧ وانو دعمني لحدي اسي ما جابت ٨٦،حسيت في اللحظة دي اني قاعدة في جمعة نفاق، وحسيت نفسي ضاق، استذنت منهم وقولت ليهم شكلو الأزمة قامت علي حا امش اشوف بخاخي على وين، دخلت جوة غرفتنا وبقيت ببكي، ابوي دا قول امي بتلاطف وبتودد مع أي زول بتاع قروش، بس ما للدرجة دي، شاطرتي البحكي ليهم عنها دي، هو كان أكبر المعارضين ليها، هو السبب اني جبت في تالت كدا، هو كان بضربني لمن امش درس العصر، وحتى مرات بمنعني من المدرسة اسبوع اسبوعين عادي، واسي يجي يقول داعمها،مهند جاء لقاني ببكي، قال لي مالك؟!، مضايقة لدرجة البكاء؟! ، ما لقيتي البخاخ ولا شنو، قولت ليهو ما محتاجة بخاخ انا اضايقت ساي واسي الضيق راح، قال لي السبب ابوك ولا شنو، قولت ليهو ما مضطرة اجاوبك صاح، قال لي حتى لو ما جاوبتي، ظاهر انو في مشاكل بينكم، وظاهر انو شخصية قاسيه، قولت ليهو قاسيه دي كلمة شوية عليهو!!!!، هو كرهنا العيشة، قال لي اسي كلامو دا ضايقك لشنو؟، قولت ليهو لانو كلو كضب، انا ما قولت ليك قبل كدا انو لولا المعلمين ما كنت قريت، بصراحة يا مهند اي كلمه قالها ابوي ليكم كضب، تاني سكتا منو وبقيت ببكي بس، قرب مني وقال لي اهدي انا ما عارف ابوك عذبك قدر شنو بس من خلال كلامك شكلو كان معيشكن في جحيم، قولت ليهو جحيم بس، كان معيشنا عيشه اكعب من الجحيم زاتو، بس اسي ما تصدقو كل كلامو كضب تمام، قال لي تمام بس انتي اهدي، فجاءة كدا بديت اتنفس سريع وحسيت نفسي كتم، مهند جاب لي البخاخ، وقال لي زول الأزمة الزعل ما كويس ليهو انتي ما عارفة عشان كدا لو ما حابه تشوفيهو تاني ابقي في الغرفة دي وانا حا امش اقعد معاهو و لو سأل منك حا اقول انك مصدعة قولت ليهو تسلم يا مهند، قال لي دا الواجب.
