في الصباح جاتني فاطمة وقالت لي انا طالعه مع مهند لرحلة، انتي عندك مخطط لليوم، ولا عايزة تقعدي في البيت، قولت ليها نسيت ما اكلمك، استاذ منتصر قال لي تعالي اشتغلي عندنا، قولت ليها منتصر شخصياً، وانت عايزة تمشي؟، الحمار ما بقع في الغلط مرتين، ضحكت عليها، وقولت المره دي حا اشتغل مع واحد جديد وهو مدير التسويق، ما معاهو انا ما غبيه فاهمه، قالت لي لا كدا طمنتيني اتصلي بمريم وكلميها، قولت ليها تمام،قالت لي ماشه اعمل الشاي انتي اجهزي سريع عشان ما تتاخري، قولت ليها طيب، لبست وطلعت، صادفت منتصر في الطريق، قال لي جهزتي ممكن اوصلك قولت ليهو ماف داعي حا القى مواصلات، قال لي تمام ما حا اجادلك لانو مستعجل اسي، طلع وانا دخلت المطبخ، فاطمة كبت لي شاي، شربتو سريع.
وانا طالعه من البيت صادفت عمو عبدالرحمن، قال لي منتصر كلمني انو حا رجعتي تشتغلي معانا، دا احلى خبر يا بتي، ورح خليني اوصلك معاي، قولت ليهو طيب يا عمي.
________________________________
بلسان فاطمة
كبيت الشاي لخالتو عواطف، وتاني شلت لمهند، ختيتو ليهو جنبو،قال لي وانتي، قولت ليهو سبقتك، مشيت الدولاب قعدت اقلب في الملابس، لحدي ما لقيت فستان و حسيت بيهو مناسب،كان ابيض بورود بنفسجيه التفتا على مهند قولت ليهو رايك شنو في دا، عاين لي وقال البسيهو وبجاوبك، ما بقدر احدد، لبستو وطلعت،بقا يعاين فيني مسافه، قولت ليهو ما عجبك ولا شنو، حاسو ما مناسب، اتكلم ياخ وترتني، قال لي لا بس انا بتامل في جمالو عليك، لايق عليك عديل يا فطوم، قولت ليهو عليك الله، قال لي انا ما بكضب، حلو شديد، خجلت وقولت ليها شكراً على كلامك دا، تاني هو قام ومشى جاب ملابس لبسهن، كان طالع حلو فيهن،قال لي اها طالع كيف، قولت ليهو ما عندك عوجة، قال لي بس!!! ، قولت ليهو اقول شنو يعني، قالت لي اي شي، قولت ليهو دا العندي، لمن تمش هناك خلي معجباتك يشكرنك تمام، صر لي وشو.
لمن وصلنا المكان ونزلنا لقينا ناس خالد واسيل وملاذ كلهم قاعدين، بقو يسلمو عليهو واتجاهلوني تماماً، ما اشتغلت بيهم كتير مشيت قعدت في زوايه براي ، قولت في نفسي ما كان أقبل اجي، من بعيد سامعة صوت ضحكهم وونستهم، ومهند كان مبسوط معاهم شديد، ما اظن حس اني ماف اصلا، بقيت العب بالتلفون، جاتني زول قعد جنبي، قال لي ما شايف انو مبسوطة مالك مبعدة كدا، عاينت ليهو وقولت انت منو؟، قال لي ياسر، قولت ليهو يا ياسر الشله دي كلها ما بتحبني، وأنا جيت هنا بس عشان وعدت زول، قال لي وانا زاتي ما متعود اطلع معاهم مرات بمش الاقيهم مع اخوي، والليله ما كان عندي مراج اجي بس اخوي اصر ، قولت ليهو ايوا، حاولت انسحب منو، قولت ليهو عند اذنك ماشه اتصل باختي ضروري، قال لي ماف مشكله، قولت في نفسي حتى في خلوتك ما بخلوك الناس ديل، مشيت عملت نفسي قاعدة اتصل، تاني بعدت منو، ومشيت قعدت تحت ضل الشجرة كنت ماله شديد، وحاسه بالوحدة، جاني اتصال من مهند، قال لي يا بت انتي وين؟ ، قولت ليهو قاعدة تحت ضل شجرة جايه عليكم، لمن مشيت، ملاذ قالت لي مشيتي وين؟، قولت ليها كنت قاعدة، قالت لي كنتي تخلطي صاح، مهند عاين لي وقال لي ملاذ تخلط في منو كمان؟، ملاذ قالت ليهو ما بعرف التقول ياسر اخو أحمد، مهند قال لي عشان كدا بعدتي مننا ولا شنو، قولت ليهو لا هو جاء سألني لشنو قاعدة براي وانا جاوبتو بس، قال لي اسكتي ما ضروري تبرري، فات مع ملاذ، بعدها جاتني اسيل وقالت لي ورح ولعي معاي النار دي، قولت ليها تمام، مشيت معاها، اسيل قالت لي ماشه اجيب حاجات من العربيه وجايه انتي هبي تمام، بقيت اهب فيها واكح ، جاء طالع لي ياسر من وين ما بعرف، قال لي شكلو الدخان بتعبك، قولت ليهو عندي أزمة، قال لي طيب ما كنتي ترفضي انتي غبيه ولا شنو، زحاني وقال لي انا بهب ليك، قولت ليهو لا ما تتعب نفسك، قال لي ماف اي تعب يا انتي، صاح انتي اسمك منو بالمناسبه، قولت ليهو فاطمة، قال لي تشرفنا، ونحن بنتكلم كدا، جانا مهند، مهند سلم عليهو وقال لياسر طولنا من شوفتك، قال ليهو كان عندي امتحانات، تاني مهند قبل علي وقال لي الدخان دا ما بطايقك بتعملي شنو انتي هنا بالضبط، قال ليهو ياسر اي زول الأزمة مفروض ما يتعرض لدخان، مهند بقى يعاين ليه وقال ليهو من وين بتعرف انو عندها أزمة؟، قال ليهو هي كلمتني، مهند قال ليه لا ما شاء الله شكلو اتونسو كتير شديد، قال ليهو الحقيقة انو لاقيتها قبل شويه بس، كانت قاعدة براها قولت النشوف مالها، مهند قال ليه مرات الزول بحب يختلي مع نفسو ولا شنو يا فاطمة، قولت ليهو ايوا يا مهند بس في النهايه مرات الزول بحتاج زول يتكلم معاهو، قال لي انتي مبعدة مالك وقت عايزة تتكلمي، قولت ليهو لانو حسيت انو ما عندك مكان بينكم، أنت كنت ما مهتم بي ومتجاهلني تماماً، بس انا اقول الكلام دا لمنو، ياسر قال لينا انتو بتعرفو بعض ولا شنو، هو العزمك وبقى ما شغال بيك يعني، مهند قال ليهو اي انا العزمتها في حاجة، قال ليهو لا بس دي ما من المفروض يتجاهلوها، مهند عاين ليهو بزهج وقال ليه وضح اكتر عشان افهم، أنت بتتغزل فيها ولا شنو، قال ليهو اهدى يا مهند انا بقول الحقيقة بت زيها مفروض ما تتجاهل، انا قولت في نفسي ياسر دا برد قلبي بكلامو عشان يعرف مهند، انو انا ما البتجاهلوني، قولت ليهو شكراً يا ياسر على كلامك،مهند ساقني بعيد وقال لي يعني عاجبك كلامو، قولت ليهو هو قال شنو ما نبذني صاح، قال لي بس دا بتغزل فيك، قولت ليها لا دا قال كلام لطيف لي، قال لي ابعدي منو يا فاطمة، قولت ليهو مهند انا ما جيتو هو براهو الجاء، قال لي عشان هو بتاع بنات، يعني ما حباً فيك، قولت ليهو يعني انت قاصد بكلامك دا انو كلامو لي كان مجامله ولا شنو، قال لي اي يعني انتي مصدقة نفسك، زعلتني كلمتو، وقولت ليهو انت حاقر بي شديد على فكرة، ومستصغرني، قولت ليهو الكلام دا وبعدت منو،قولت في نفسي مهند دا قايل نفسو شنو عشان كل مره يقول لي الكلام دا، لشنو شايف انو ما من المستوى المطلوب، وأنو ماف زول بحبني، هو لشنو لئيم كدا، بقيت ببكي، قشيت دموعي وجيت قعدت معاهم، اسيل قالت لي انتي مشيتي وين وخليتي ياسر يهب في النار، قولت ليها براهو طلب مني كدا عشان عندي ازمة، قالت لي كضابه ياسر يساعد واحدة زيك، قولت ليها واحدة زي؟!!!، انا مالي؟، ما زيكم، قالت لي لا انتي نهاي ما زينا ولا بتشبهبنا جيتي من القرى ومتخلفه وبصراحة يعني الشي المكرهني فيك اكتر انك مرت واحد زي مهند، انتي ما حصل عاينتي ليهو وعاينتي لنفسك، أنت وين وهو وين، كلامها وقع زي السهم في قلبي، ما عرفت اقول ليها شنو، زحيت منها بعيد، قولت دا ما بيئتي انا مفروض ما اجي هنا، ديل ناس مؤذيين وانا ما بقدر عليهم، جيت ماشه لاقاني مهند قال لي تعالي، قولت ليهو داير شنو زح من طريقي، قال لي اهدي كنت عايز اعرفك على تيسير، قولت ليهو ما عايزة اتعرف عليها زح كدا، قال لي براحتك انتي براك الأمس قولتي عايزة تتعرفي عليها بس لو ما عايزة ما بجبرك، قولت ليهو ما عايزة، قال لي تمام انا ماش، قولت في نفسي إنسان عديم إحساس ومنطق، قعدت في حته بعيدة شديد المره دي منهم.
