كلامو حرقني وحسيت بهاله من النرجسيه فوقو، قولت ليهو كبها سريع كباها وفات، عملت تاني واحدة ونزلت وديتها لصدام، صدام اول شي شماها وقال لي من ريحتها تنشاف كويسه، قولت ليهو تسلم، طلعت منو وقعدت اراجع في السجلات تاني، فجاءة اتصلت مريم وقالت لي بعد سلمت انو ابوي فات، عشان كدا ممكن تجي البيت، قولت ليها غريبه الفوتو شنو، قالت لي سرقو قروشو في السوق أمس، قولت لا حولا ولا قوة الا بالله، دا ظلمو الكتير، ضحكت وقالت لي انا زاتي قولت كدا، قولت ليها حا اقفل وإن شاء الله بعدين اكون عندك.
بعد ساعتين كدا، استاذ صدام قال لي ورح الفطور، قولت ليهو لسه عندي سجلات كتيرة، أنت امش، قال لي خلاص ،منتصر كان واقف مع عدن وبعاين لينا، تاني جو علينا وقال لينا منتصر ما ماشين الفطور؟ ، صدام قال ليهو انا ماش بس خديجة قالت ما ماشه، منتصر قال لي مالك يا خديجة ما عايزة تفطري؟، قولت ليهو لاني مشغوله، قال لي الشغل ملحوق، صدام قال منو البتكلم غريبه يا منتصر تقول كدا، منتصر قال ليهو دا وقت البريك ياخ، صدام بقى بضحك وقال ليهو خليها وورح، وعند برضو قالت اي كلام صدام صاح خليها ياخ نحن عندنا اجتماع بعد ساعة ناسي انت ولا شنو؟، منتصر قال ليهم ورحكم ما تنقو فينا، طلعو، بعد مدة صدام جاء وخت لي سندويتش، شلتو منو وقولت ليهو شكراً، قال لي العفو، صدام مشى بهنا انا بقيت باكل بهنا، منتصر جاني وقال لي شلتيهو منو يا خديجة، انا زمان لشنو رفضتيهو مني، قولت ليهو زمان متين ما متذكرة، قال لي اول يوم جيتي تشتغلي هنا انا بكل حسن نيه جيت لعندك وختتيت ليك الاكل بس رفضتيهو، قولت ليهو ما بتذكر، قال لي شكلو ذاكرتك ضغيفه، قولت ليهو اكتر مما تتخيل زاتو، فات وهو معصب، وأنا قولت في نفسي منتظرني يعني اقول ليهو متذكرة اكيد ما حا اقول ليهو طبعاً، بعد مدة جاتني موظفه وقالت لي بكرة تجيبي رقمك الوطني ومعاهو صورتين وتسلميهن للمدير عشان تتسجلي كموظفه للمصنع، وتستلمي بطاقتك، قولت ليها اي مدير؟، قالت لي عندنا كم واحد، اكيد استاذ منتصر قولت ليها كويس.
________________________
بلسان فاطمة
بعد فطرت مشيت الصالون، قعدت فيهو مهند جاء وقال لي تعملي في شنو، انا امس ما تميت كلامي معاك، والليله الصباح ما اتكلمت معاك لأنك كنتي حابسه المطبخ مع امي، قولت ليهو نحن كلامنا انتهى أمس، قال لي يعني خلاص ما حا يكون في مشاكل بينا، قولت ليهو ايوا، عشان كدا ارتاح ساي واتبسمت، قال لي لا الليله شكلك صحي نسيتي، وباين عليك ما زعلانه، قولت ليهو ازعل لشنو، انا لمن فكرت في كلامك لقيتو كلو صاح، قال لي ايوا دي فطوم البعرفها أخيراً رجع ليك مخك، وكمكافئة ليك حا تمش الليله نسجل ليك في الجامعة، قولت ليهو بفرح عليييك الله، قال لي حصل انا كضبت عليك، قومي البسي، مشيت لبست لي عبايه كحليه، وجيت عليهو، بقى يعاين لي وقال لي معقول ماشه بكل الجمال دا، قولت في نفسي الزول دا لسانو اتعودت على الكلام المعسول من شدة كضبو على البنات اكيد ما قاصد حاجة، قولت ليهو ببرود من ذوقك ممكن نطلع، عاين لي باستغراب وقال لي حاسس كأنو كلامي ما حرك فيك شعرة، قولت ليهو لا بس ما عرفت اقول شنو، بس انا من جوة كنت بقول لانو ما من قلبك.
