لمن جاء مهند، حاول يتكلم معاي، بس كنت زعلانه شديد وما كان نفسي اتكلم معاهو، قال لي انا علاقتي بفوتت اخواتك شنو؟، عاينت ليهو كنت عايزة ارد ليه بس سكتا، قال لي غتاتيك دي عمرها من بتخليها، فايت ليك البيت زاتو، لبس ولمن جاء طالع قال لي لو ما اتاكدت انك نومتي ما بجي، ولا عبرتو ولا قولت ليهو بتقول في شنو رقدتا وغمضت عيوني منو.
اتقلبت وما جاني نوم، اسي في داعي محمود يقول لعائشة تعالي، ولا مريم لشنو دايرة خديجة، يعني لو خديجة قعدت معاي اسبوع فيها شنو، واسي مهند حركاتو دي لشنو، فوق ما انا زعلانه هو زاتو زعل مني، نومي نومي وما تفكري كتير. في النهايه لمن ما قدرت انوم قولت النصالح مهند عشان يجي يونسني، اتصلت بيه، رد لي بعد تلاته مكالمات، وأول كلمها قالها دايرة شنو، كديستك راحت منك، قولت ليهو اي يا مهند وبصراحة انا زهجانه شديد من القعاد براي دا، عشان كدا تعال ونسني، رد لي:لا زي ما بتشتغلي بمزاجاتك انا زاتي بمزاجي بجيك، وقفل الخط في وشي، قولت في نفسي الثقيل الجاهل، اعمل شنو التلفون وحموني منو، والنوم وطار لي، اتصل بمريم، لكن اقول ليها شنو؟،خلاص النتصل بأمي ومنها اتكلم مع سمسمة، اتصلت بيها، ردت لي، اتونست معاها، كان حسها كويس، بس قالت لي خبر صادم وهو ابوي احتمال يجي الخرطوم، قولت ليها السبب؟، قالت لي جاي لنسيبك عشان يقول ليهو الحمد لله على السلامة ولدو، قولت ليها دا ما سبب ياخ، لا يجي ولا حاجة، ردت لي :انت عارفة ابوك بتاع مظاهر واي زول عندو قروش بعاملو كويس وباحترام، قولت ليها ما لدرجة يجيهو، كان يتصل بيه، قالت لي بري ما بعرف بس هدي انا كلمتك عشان بعدين ما تنصدمي،قولت ليها كان نفسي اتكلم مع سمية بس للأسف نفسي انقفلت، قالت لي سمية زاتها ما فايقة ليك امتحاناتها قربت، قولت ليها سلمي لي عليها تمام، وقولت ليها ما تتعب نفسها وتساهر كتير، رد لي :إن شاء الله وانتي خلي بالك من نفسك، قولت ليها إن شاء الله.
بقيت افكر لو ابوي جاء زي الما قالت أمي هل حا يمش لمريم، ويقعد ينبذ في خديجة، ما بقدر اتخيل البحصل لو جاء.
بعد ساعتين مهند شرف ، عاينت ليهو بحرقة، قال لي ما تعايني لي كدة براك بديتي، قولت ليهو كنت زعلانه وما عايزة اتكلم بس انت ما بتحترم زعل زول، رد لي:دا ما زعل دي نفسنه اسمها، قولت ليهو ما انا اتصلت بيك، عشان اعتذر، قال لي ما اعتذرتي لكن، قولت ليه معقول ما بتذكر قبيل قولت ليك شنو، انا بعتذر اسي، اها في شنو تاني، قال لي المره دي حا اقبلو بس ما عارف تاني لو عملتي لي كدا البحصل شنو، قولت ليهو انا بوعدك اني ما اتجاهلك واتكلم معاك حتى لو زعلانه، قال لي الوعد وعد، قولت ليهو وانا على وعدي، تاني جاء وقعد جنبي وقال لي شوفي الفيديو دا، قولت ليهو انا ممنوعه من التلفون، رد لي :فيديو واحد ما بضرك، قولت ليهو ورح شغلو، الفيديو كان فيهو انا شغاله اهلوس واقول في كلام برة راسي،قولت ليهو بكوراك :مهند دا شنو؟، قال لي انتي شايفة شنو، رديت ليهو:دي انا بس لشنو مصورني، قال لي عشان اوريك ليهو وامسكو ليك ذلة، رديت ليه :انت شافع على فكرة ما بهمني الفيديو كتير، قال لي خلاص وقت ما بهمك، كان عايز يشيل تلفونو كدا، خطفتو سريع ومسحتو، بقيت بضحك، وتاني قولت ليهو شوف ليك وسيلة ذلة تانيه، قال لي على فكرة انا ناسخو في اللابتوب يعني، لانو اتوقعتك بتعمليها، حمرت ليهو وقولت اعترف يا مهند ناسخو كم مرة، قال لي ٣ مرات لا ٤، قولت ليهو ثقيل ودمك بقري بس، قال لي تاني احترميني واتعاملي معاي كويس والا حا أوري الفيديو دا لكل من هب ودب فاهمة، عاينت ليهو وقولت ليهو فاهمة. فجاءة اتذكرت مواعيد القطرة الاداني ليها الدكتور، قولت لمهند القطرة موعدها جاء، رد لي :اي تقريباً، مشى فتشها ما لقاها، قولت ليهو أمس عائشة آخر مرة عملتها لي هي، قال لي اتصلي بيها، رديت ليهو :بتكون وصلت احتمال لسه في الشارع قال لي انت اتصلي وبطلي نظريات، اتصلت قالت لي انو ختتها من لجين في الدولاب عشان انشبكت فيها، قولت ليها خلاص تسلمي، وبعدها قولت ليها قربتي ولا لسه، قالت لي ربع ساعة واكون جوة الحلة، قولت ليها تصلي بالسلامة، كأنو اتاخرتي صاح؟، قالت لي الحافلة اتعطلت بينا في الطريق، رديت ليها ايوا عشان كدا، قفلت منها قال لي اها، قولت ليهو في الدولاب مشى جابها وجاء،قال لي القطرة دي ما بتخافي منها، رديت ليهو:لا، ورح اعملها سريع، زحيت النظارة، قال لي أخيراً حبوبة زحت نظراتها، رديت ليهو :كلها كم يوم وما حا البسها تاني، عشان كدا خلي حركاتك الثقيله دي، رد لي :كم يوم بالتحديد، قولت ليهو ١٥ يوم، قال لي حا نشوف، قبل ما يكب القطرة قال لي على فكرة عيونك جميله ولونهن البني زايدهن جمال،خجلت بس ما بينت ليهو وعاينت ليهو نظام ما اتاثرت وقولت ليهو خبراك الليله قولت الكلام دا، رد لي انا بقول الكلام الحاس بيه تمام، قولت ليهو تشكر بس انا عارفة، قالت لي مغرورة، قولت ليهو ممكن تخلينا من دا كلو وتقطر القطرة، قطرها لي القطرة، غمضت عيني، مشى مني، ركب سماعتو وشكلو بتكلم مكالمة ، وانا بصراحة اثر كلمتو علم في قلبي، وبقيت اتبسم براي لشنو ما عارفة.
