بلسان فاطمة
قولت يا ربي الحاصل شنو مع عائشة حا انتظر رسالتها واعرف، حاولت انوم بس ما قدرت،كيف اقدر و مهند دا قال في ضب حايم ، غمضت عيوني، حسيت بزول قعد جنبي، تاني اتكلم وقال البت العنيدة دي، عرفتو انو مهند، كان عايز يشيلني، بس قولت ليهو انا صاحيه ما تتعب نفسك، قال لي طيب قومني ونومي فوق، وأنا بمش اشوف لي حته انوم فيها، قولت ليهو حا تمش وين مثلاً، قال لي انا بعرف امش وين في غرفة اخوي فوق فاضية حا امش انوم فيها، قولت ليهو طيب بس لو عرف زول، لا يا مهند، قال لي ما حا يعرف زول، وبعدين ليله دي بس الحا ابيت فيها، لانو انا طلبت كنبه، ومن بكرة حا انوم فيها وانتي حا اخليك في السرير، عشان كدا بطلي عناد وقومي معاي، عاينت ليهو وقولت ليهو طيب لمن تجي بكرة، اسي خليني انوم هنا، قال لي ما ناقصني امارضك طول الليل، كفايه أمس حميتيني النوم، قولت ليهو هل انا قولت ليك ارعاني ما انت براك عملتها، قال لي انا جنتل مان اعمل شنو عاد، قولت ليهو طيب من الليله خلي جنتلتك دي عليك تمام، قال لي انا ما عارف انا اتعاملت مع كل البنات بس بت زيك ما لاقتني ابدا، ما رديت عليهو، قال لي ايوا رجعنا للغتاته وعدم الكلام ، هزيت ليه راسي، قال لي غلطان انا الاتكلمت معاك نومي إن شاء الله تتجمدي من البرد، بعد سكت حاولت انوم بس ما جاني نهاي، صنقرت وبقيت اعاين للتلفون، مهند بقى يعاين لي، انا عرفتو داير يسألني مالك، بس عشان قفلتو قبل شويه ما حا يسأل اكيد، شلت تلفوني وكنت عايزة اطلع برة الغرفة، قال لي مهند انتي بتحبي ولا شنو؟، عاينت ليه ببرود، قال لي الموضوع ايزي قولي اعتبرينا أصحاب، انا ما معتبرك مرتي وصدقيني حا اساعدك لو عايزة تقابليهو، اديتو نظرة حارة وقولت ليه انا ما زيك لكن عشان يكون عندي حبيب، وإذا انت ما معتبرني مرتك ما مشكلة لانو ما مهتمه اصلا ، بس انا ما من النوع دا فاهم ما من المتزوجات البكونن بحبايبهن، هو من غير زواج الحاجة دي حرام، خلي متزوجة، ضحك وقال لي تفكيرك قديم خلاص، أنت عايشة في عالم براك ولا شنو، قولت ليهو شكلو كدا، اسي ممكن تخليني امش، قال لي لا، قولت ليهو ما كان عايزة ازعجك بس براك اخترت الخيار دا، حاولت اتصل بمريم لقيت رقمها مغلق، تاني اتصلت بأمي ردت قعدت اتونس معاها بأعلى حسي عشان ازعجو، بس هو ولا على بالي وبضحك كمان، حسيت حسها غريب سألتها في مشاكل، اول مرة نكرت بس تاني اتكلمت وقالت لي انو خديجة اتطلقت وابوك حابسها جوة، قولت ليها حرام عليهو، عايز يخليها في المخزن لمتين؟ ، قالت لي لبكرة شكلو لانو قال لي بكرة لازم تشوف ليها حته تمش ليها، قولت ليهو حا يطردها يعني!!! ، قالت لي اي، قولت ليها اتكلمي معاهو، قالت لي ابوك ما بسمع كلامي، قولت ليها يا أمي عليك الله اعملي حاجة عشانا ولو مره، سمعت صوت بكاها ، قولت ليها انا ما كنت عايزة ازعلك بس يا أمي انتي عارفة كلامي صاح، قالت لي اي عارفاهو صاح، بس ما باليد حيله. سكتت منها تاني قولت ليها خديجة كويسة حا تموت لو ضربها، قالت لي ابوك جاء حا اقفل، قولت ليها انتظري ما تقفلي يا أمي، قفلت بقيت ببكي ، مهند جاء علي وقال مالك في شنو يا فطوم ما كنتي اسي كويسه حصل شي في بيتكم، سمعت شويه من كلامك، قولت ليهو ممكن تخليني برأي، قال لي طيب هاك اشربي مويه، قولت ليهو ما عايزة، قال لي طيب انا العلي عملتو، رقد في السرير، وبقى كل مره يعاين لي،انا رقدت بعد ما اخدتا بكيتي، رسلت لمريم رساله وكلمتها بكل حاجة، عسى ولعل تلقى حل، مهند جاب الغطاء وغطاني وقال لي فطوم ما بعرف اواسي ولا اقول كلام مشجع بس ما تعملي في روحك كدا، صنقرت وقولت ليهو طيب قاعد هنا لشنو عشان تقول لي كدا بس، مسك يدي وقال لي لا عشان عايزك تشاركيني مشكلتك يا فطوم، قولت ليهو ما عايزة اشغل بالك بحاجة ما بتخصك، قال لي انا نقطة ضعفي دموع النسوان، ابتسمت وقولت ليهو شكلك حا تتعب كتير في حياتك لانو مرات نحن بنبكي بدون سبب، ضحك وقال لي نفسنه جد!!!، تاني سكتنا،وبعدها قولت ليهو ممكن تمش تنوم انا كويسه، قال لي تمام، رجع السرير، قال لي تصبحي على خير، قولت ليهو وانت من اهلو.
