قولت ليهو انا موافقة عليك يا منذر، وقبل ما تجي تطلب يدي، كلم اهلك انو انا ما بجيب اولاد، قال لي لا يا مريم ما نستعجل احتمال تتعالجي، ولا احتمال قسمتك مع الصادق كدة، احتمال انتي ما عاقر من اساسو، قولت ليهو حاضر لو انت شايف كدة، لكن لو ما اتعالجت أو فشلت كل الطرق انو اجيب اولاد...، قاطعني وقال لي اوعى تفاولي علينا، انتي خليني اعرسك اول، وقولي الدايرة تقوليهو تاني، قولت ليهو لازم نتفاهم اول، قال لي دا زواج يا مريم ما صفقة عشان تقولي لي لو ما اتعالج أو كدة، اوعى تقولي لي الكلام دا تاني، لو عايزة تشارطيني انا ما عايز اعرسك، انا حا اختار اسافر بدلاً من كدة، قلبي وجعني من كلمتو دي، فقولت ليهو انا حا اتزوجك وبدون شروط، ما تهددي تاني يا منذر بسفرك دة، ضحك وقال لي هو انا بقدر اهددك، انتي مرة قوية وقادرة ما شاء الله، وما اظن بتهددي، قولت ليهو منذر انت بتصف فيني بصفات ما حلوة على فكرة، دا اسمو حزم فاهم، قال لي انا ما بفهم بأي حاجة غير طبي دا وحبي ليك، قولت ليهو شكلو حا اعلمك كتير، قال لي وانا مستعد،قفلت منو واتصلت بفاطمة وكلمتها، فرحت لي شديد، وقالت لي لو فاضيه ليك كنت استفسرت اكتر بس عندي محاضرة اسي،مشيت كلمت امي قالت لي يا مريم الفرحة ما سايعاني، الحمدلله لله يا مريم الحمدلله، تاني قالت لي عقبال فاطمة وتلقى العوض على تعبها يا رب قولت ليها آميين، مشيت لخديجة وعائشة لقيتهم الاتنين قاعدات، كلمتهن، فرحت لي فرح وقالن لي يعني دا السبب المخليك متوترة ومسهرك الليالي، قولت ليهن اي، قال لي يخسي عليك كنتي تكلمينا، قولت ليهن ما حابة اقلق بينكن بدون سبب،عاينن لي بجدية وقالن لي ما كلمتي زول نهاي يعني، خوف من نظراتهن وقولت ليهن فاطمة بس، خديجة رمت فيني المخدة، وعائشة قالت انا غايتو متعودة على غتاتك دي عشان كدة ما بستغرب، ضحكت عليها،وطلعت برة، فكرت في منذر وحياتي الحا تكون معاه يا ترى هل انا بقيت أنانية، بسبب القرار الاتخذو دة،بس مع الوقت بعرف.
مرت الايام وفارس كان كل مرة بجي يطمن على عائشة ويتونس معاها، وأنا حسيت انو عائشة بقت تميل ليهو لانو كلامها بقى كلو عنو، وأنا ومنذر خطبنا زمان، وحا نعمل عرسنا مع خديجة يلي فضل ليهو يوم بس، اول مرة انا وهي نحس انو عروسات بالجد، عروسات اختارن أزواجهن براهن، عروسات متزوجات عن قناعة ورضا تام، وأنا بفكر كدا جاتني عائشة متوترة، قولت ليها مالك كمان، قالت لي محمود برة، قولت ليها ويعني، قالت لي فارس قالت لي جاء برضو قال عندو موضوع مهم ، قولت ليها في شنو يعني؟، وبعدين محمود خبارو اتذكر بتو بعد المدة دي كلها، قالت لي ابعرف، هو ليه قريب الشهر ما جاء، انا زاتي مستغربه، قولت ليها مالك ومالو يا عائشة، أنتي اهتمي براجلك بس، قالت لي اتخيلي انو فارس يزعل يا مريم، لو شاف نظرة حبي لمحمود، قولت ليها انتي للان ما نسيتيهو، قالت لي لا، قولت ليها كضابة انت اسي خايفة على زعل فارس ما على زعل محمود يبقى بتحبيهو يا عائشة، عائشة قالت اه انتي ما بتفهمي، صرت لي وشها وطلعت، قولت البت دي غريبة شديد.
