عاينت ليهو وقولت ليه ما فطرت اي، بس شكراً ما عايزة، قال لي السبب، قولت ليهو لانو ما حاسه نفسي جيعانه، قال لي طيب حا اختو هنا متى ما تجوعي اكلي، عاينت ليه باستغراب وقولت شكراً بس ما عايزة،ولا قال لي بتقولي في شنو، ختاهن وفات جو، قولت دا مالو دا، بعدها جات عدن وقعدت جنبي، قالت لي في ملفات جوة جيبهن لي، قولت في نفسي انا ما عارفة هنا شغاله لمنو، دقيت الباب، منتصر قال اتفضل، دخلت قولت ليهو عدن قالت لي في ملفات جوة، عاين لي وقال دا ما شغلك انت شغلك مختصر على تقديم الخدمات لي و للناس البجوني انا، تاني ما عندك شغله بزول، قولت ليهو والله، يعني اسي امش اقول ليها شنو، قال لي قولي ليها تعالي لي، وخليني افهمها، طلعت، قالت لي وين الملفات؟، قولت ليها الأستاذ قال ليك تعالي لي جوة، عاينت لي بقعر عينها وفاتت، قولت في نفسي ما اظن حا اقدر استحمل.
______________________________
بلسان فاطمة
من خديجة كلمتني عن منتصر بقيت مقلقة، أمس انا قولت لمهند اني ما مطمنة ابدا وخاصة لمن قال لي انو إنسان مزاجي،خديجة ما بتستاهل يحصل معاها كل دا،وأنا بفكر كدا مهند جاني داخل وشايل لي صينيه الاكل، قال لي قبل شويه ما كنتي كويسه، مالك مكشرة كدا، قولت ليهو تعال دقيقة حكيت ليه، قال لي متوقعه منو، منتصر ما بلعب في الشغل ابدا، و هو إنسان صريح لدرجة مستفزة، وشكلو عشان ابوي ما اخد رايو في التوظيف زعل زيادة، عشان كدا نفس كل غضبو فيها، بس انا حا اتكلم معاهو وحا احكي ليهو عن خديجة كيف انظلمت، ولشنو عايزة الشغل دا، قولت ليهو نحن ما دايرين شفقتو ولا مَنّ منو، اوعى تجيب ليهو السيرة دي، انا ما حكيت ليك الكلام دا عشان تتكلم معاهو بس حكيت ليك عشان اوريك كلام اخوك الجارح الوجهو لخديجة، رد لي :إذا انتي ما عايزة اتكلم بمعاناتها تمام، بس حا اتكلم معاهو وحا اقول ليهو ما تعاملها كدا، قولت ليهو لا حا يقول خديجة اشتكت ويعمل مشكله، رد لي :انا قولت ليك قبل كدا انو ما بستحمل دموع المراءة بس ما قولت ليك برضو اني ما بستحمل انو زول يظلمها برضو، قولت ليهو أنت شغال في حقوق المراءة ولا شنو، قال لي تقريباً كدا، ضحكت عليهو وقولت طيب انت ما ملاحظ انو ظالم البنات البتتكلم معاهن ديل، اي واحدة قافلة عليك، قال لي لا ما شايف كدا دا ما اسمو ظلم ياخ، دا تقضيه وقت وانا عارف وهن عارفات الحاجة دي، رديت ليهو انت انسان عولاق بس على فكرة، ما تلعب ببنات الناس يا مهند، قال لي يلا دا موضوع ما بخصك نحن ما قولنا ما ندخل بخصوصيات بعض، يعني لو انتي مثلا اتكلمتي مع كميه من الشباب، ما حا اقول ليك حاجة، بتعرفي لشنو لانو انتي عارفة انو زواجنا دا ما برغبة مننا الاتنين، قولت ليهو انا كم مره وضحت ليك اني ما زيك لكن، قال لي لو ما زي يبقى ما تنتقديني ولا توريني الصاح، لانو انا عارف الصاح، قولت ليهو خلاص ما حا اتكلم معاك، قال لي انا طالع اسي غطي علي، قولت ليهو طوالي بس ما تنسى الجامعة، قال لي ما ناسيها انتي جيبي رقمك الوطني، والشهادة، وبمش اسجل ليك في جامعة القريت فيها انا ،قولت ليهو انت قريت اي جامعه، قال لي جامعة ()،قولت ليهو خاصة صاح، قال لي اي،بس انتي عايزة تقري شنو اصلا، قولت ليهو انا عاجبني مجال التخدير شديد، عاين لي وقال بتقدري تمسكي الحقنة وتخدري زول، قولت ليهو مالو مش ما مطعونة بيها انا، ما بخاف منها، قال لي غريب،بس في النهايه دا قرارك، قولت ليهو ومقنتعه بيهو شديد، تاني قال لي بالمناسبه عمرك كم؟، بقيت اعاين فيه بس وقولت ليه داير بيه شنو؟، قال لي عايزة اشوف بتتخرجي متين، قولت ليهو ما بقول ليك، قال لي المرة لشنو بتخاف تقول عمرها، قولت ليهو ما خايفة بس عمري دا شي ما بخصك، مشى فتح الدولاب، وشال رقمي الوطني وقال ايوا، عمرك 18سنه، ومالك ما عايزة تقولي، هدي شافعه، رديت ليهو لانو ما بخصك عمري،ضحك و قال لي يعني لمن تتخرجي عمرك حا يكون 23، قولت ليها اي، قال لي كويس والله كدا حا تجيبي عريس، قولت ليهو شنو!؟، قال لي اكيد ما حا اقعد معاك العمر كلو، بعد تتخرجي انتي زي الشاطرة حا تقولي لأبوي عايزة أطلق، رديت ليهو :اسي لو عايز ممكن اقول، قال لي لا انا قولت ليك اني إنسان عادل حا اخليك تقري عشان ابوك ما يمنعك وبعد تتخرجي اكيد حا تكوني نفسك، وحا تقدري تبعدي من ابوك البظلمك يعني انا حا افتح ليك الطريق عشان تنجحي، عشان كدا ما حا ننهي زواجنا الا بعد تتخرجي، وكدا كدا انا ما مضرر حياتي ماشه وانتي ما شاء الله زولة متفهمة يعني وما حصل قولتي لي احترم زواجنا ولا كدا، قولت ليه دا ما من حقي لاني انا ما معتبراك زوج، عشان كدا ما بمنعك من حاجة انت عايزها، قال لي عشان كدا انت بتعجبيني يا فطوم، قولت ليها وانت كمان بالرغم من انو مرات عندك ثقاله ما عادية بس وقفت جنبي عشان كدا انا ممنونه ليك وحا أفضل ممنونه ليك دايماً، قال لي ما تقولي كدا في النهايه دا النصيب الجمعنا، قولت ليهو اي كلامك صاح ،قولت في نفسي أهم شي القراية عندي وزي ما قال لمن اتخرج حا القى فرصة للحب وللزواج من الراجل البحلم بيهو.
