بعد مهند فات، جاتني مريم بعد مدة وهي شايله لي شوربه، عاينت ليها وقولت شوربه تاني!!!!!، قالت لي مريم متوقعه شنو!، قولت ليها ولا شي جيبيها، ضحكت وقالت مهند تعال داخل زي ما قولت تماماً دايرة تنفجر من الزعل، مهند جاء داخل وجايب لي كل ما لذ وطاب، وقال هاك، قولت لي مريم على فكرة ما اتوقعت انك تتفقي مع مهند علي، قالت لي نفسي اشوف تعابير وشك دي، مهند حكى لينا دراماتك الفي المستشفى كلها، قولت لي مهند ليك يوم اصبر لي، ضحك وقال لي اسي اكلي وخلي نضميك الفارغ دا، تاني جاء عم عبدالرحمن وقال لي كيفك يا بتي، قولت ليهو الحمدلله بدينا نتونس كلنا. قولت لمريم كأنو خالتو عواطف تنادي ليك، قالت لي ما سامعة، مهند قال زاتو ما سمع صوت، قولت ليه انت اطرش يا مهند، غمزت ليهو قولت عشان يفهم، ضحك وقال لمريم امشي احتمال زي ما قالت فطوم انا مرات ما بسمع،مريم قالت: طيب النمش اشوف خالتو عواطف دايرة شنو وقت نادتني، لمن طلعت قولت لعمي عبدالرحمن سمعت انو منتصر جاي بكرة، قال لي اي والله، قولت ليهو يصل بالسلامة إن شاء الله، رد لي آميين، قولت ليهو انا دايرة اطلب منك طلب بس خجلانه، مهند قال لي بطلي مقدمات وكلام كتير يا ابوي فاطمة عايزاك توظف خديجة كسكرتيرة لمنتصر،حدرت في مهند، قال لي عمو عبد الرحمن طلبك رخيص طوالي يا بتي بس هل عندها شهادة؟، قولت ليهو لا بس هي لو اتدربت بتعرف اي حاجة بتتعلق بالشغل إن شاء الله، تاني حكيت ليه كل ظروفها، قال لي لا حولا ولا قوة الا بالله، وقت كدي اعتبريني موافق، طبعاً منتصر زول جاد في شغلو وما بحب التسيب، عشان كدا اختك تلتزم بس، قولت ليهو إن شاء الله، مهند قال ليه حا ينزل شغل طوالي ولا حا ينتظر كم يوم، عم عبد الرحمن قال ليه والله خايف يمش من المطار على المصنع طوالي، ضحكنا على كلامو، وقولت ليهو بحب الشغل منتصر دا شكلو، نفسي اشوفو، مهند عاين لي وقال شوفتيني انا شوفتيهو هو، بشبهني بصورة ما طبيعيه، عم عبدالرحمن قال ليه ما تكضب هو اوسم منك، مهند انحرق وقال ليه من زمان انت منحاز ليه بس البركة في امي البتقيف معاي، ضحكت عليهم، قولت في نفسي علاقتهم حلوة حلوة شديد،بعدها طلعو الاتنين وخلوني عشان اكمل اكلي.
جات مريم وخديجة بعد ربع ساعة وقالن لي بعد كدا نحن ماشين، عاينت لمريم وقولت ليها انتي لو عايزة امشي بس خدوج الليله حا تبيت معاي، مريم قالت لي اجي يا فطوم كيف الكلام دا، خديجة قالت ليها مريم فطوم دي جبتها من وين ، قالت لي دا الحبيب البقول ليها كدا، خديجة ضحكت، قولت ليهن ما تشغلنها لي كتير، مريم قالت لي خلاص سكتنا، بس خديجة حا تمش معاي، كفايه عائشة حا تبيت معاك ما عايزين نتقل على الجماعة، قولت ليها ما اظن عندهم مشكلة، وبعدين خديجة ساكنة معاك هناك، اديني ليها يوم، مريم قالت لي وقت مصرة خلاص بس يا خديجة بكرة تجيني بدري تمام، قالت ليها خديجة إن شاء الله من طلوع الشمس اكون معاك، بعدها جات عائشة شايله لجين قولت ليها جيبي لي السمحة دي، ادتني ليها بقيت العبها، مريم ودعتنا وقالت لي مهند قال بوصلني عشان كدا ما تخافن، قولت ليها كان نفسي اقول ليك ابقي بس عارفاك ما بتوافقي، قالت لي بس ما قولتي لي، قولت ليها مريم بطلي حركاتك دي، ضحكت وقالت لي ما اظن بقدر اخليها، يلا مع السلامة، طلعت وقعدنا اتونسنا، عائشة قالت ماشه انوم لجين، خالتو عواطف ما قصرت ادتنا غرفة، تاني خديجة قالت لي طيب انا انوم وين؟، قولت ليها معاي، قالت لي ومهند لالا، رديت ليها :البيت دا ملان غرف يمش ينوم محل نايم وانت يا عائشة برضك ما حا تمشي كلنا ننوم سواء، قالت لي ولجين، قولت ليها الكنبه ديك عريضة ما بجيها حاجة، نوميها فيها، ونحن التلاته ننوم في نفس السرير، ياخ طولنا من بعض شديد، خلننا ولو ليله نكون سوا، خديجة قالت لينا ناقصنا سمية ومريم بس، قولت ليها اي والله، رسلت لمهند رساله وقولت ليهو اوعى تجي الغرفة بيت محل مبيت، اخواتي نايمات معاي، رسلت لي :دا انتقام عشان ما اديتك الزلابيه موش، ما رديت ليه وقولت في نفسي نص نص عشان انتقم وعشان يفضلن اخواتي جنبي،كنا طول الليل نتونس ونضحك، ، واتذكرنا ذكرياتنا سوا،تاني انا قولت ليهن، افتحن الدولاب بتلقن شوكولاتات، جبتهن في الطريق لي لجين بس شكلو من نصيبنا، خديجة جابتهن، بقينا ناكل وتاني اتصورنا كلنا سوا ورسلناها لمريم، ردت لينا :يخسي عليكن خائنات ومعاهاايموجي(🥺)، ضحكنا عليها، بعدها نومنا.
