قالت لي اتوتر!!، من شنو مثلاً ،قولت ليها ما عارفة انا سألتك عشان تجاوبيني، ما عشان تردي لي بسؤال يا مريم، مريم ردت لي: طيب يا عائشة انا لا متوترة ولا حاجة عشان كدا اطمني، طلعت برة، ،خديجة قالت لي مريم ما بتتكلم بسهولة وانتن عارفات، فاطمة قالت انا حا اعرف مشكلتها طلعت لحقتها .
____________________________
بلسان مريم
رقدت في سرير في الحوش، جاتني فاطمة قالت لي ممكن ارقد جنبك، قولت ليها لا ما تضايقني يا فاطمة، ولا اشتغلت بي الشغلة رقدت بالغصب، قالت لي مريومة مالك؟، أنتي يا اختي اي مشكلة بتخصنا بنحكيها ليك، طيب لي ما تحكي لينا، نحن حا نسمعك، قولت ليها يا فاطمة انتي فاهمة دا موضوع حتى مع نفسي ما قادرة احكيهو، قالت لي عليك الله ما تدسي الموضوع عني احكي لي، قولت ليها طيب وقت مصرة بس ما تعملي اي ردة فعل، قالت لي بوعدك، قولت ليها الموضوع ليهو علاقة بمنذر، قامت وقالت لي منذر!!!، طلب يدك ولا شنو، احكي يا مريم، قولت ليها لا بس يا فاطمة هو ما زي زمان معاي مما جات الدكتورة الجديدة هو متغير معاي، وأنا مضايقة من التغير دا، تفتكري يا فاطمة مالي انا، فاطمة قالت لي العولاق كيف يعمل كدة معاك، وبالنسبه لضيقك اكيد لانو انتي ما عايزاهو يتقرب لواحدة تانية؟، قولت ليها السبب؟، فاطمة قالت لي دا تسألي منو نفسك لانو انا ما عارفة الشعور الجواتك، قامت وقالت لي حا اخليك مع نفسك شوية.
بقيت افكر منذر بعني لي شنو عشان اتضايق منو كدة،دخلت جوة لقيت عائشة وخديجة نايمات، وفاطمة شغالة بالتلفون، قولت ليها لشنو ما نومتي، قالت لي منتظراك انتي، اسمع إجابتك ، رديت ليها:حالياً ما عندي اي إجابة، قالت لي انا واثقة حا تلقى اجابه.
في الصباح مشيت المستشفى، وقعدت جاء منذر قال لي صباح الخير، قولت ليهو صباح النور، كيف أصبحت؟، قال لي بخير وانتي، قولت ليهو الحمدلله، تاني دخل وما اتكلم معاي بكلمة، بعدها جات دكتورة مرام ودخلت المكتب الهو فيهو، قولت في نفسي متلصقة فيهو لصقة شديدة،لمن جاء وقت الفطور، مشيت افطر وخليتهم، جاني منذر قال لي ليك فترة بتفطري براك مالك، قولت ليهو ما مالي شي بس ما عايزة ازعجكم، قال لي تزعجينا؟!!، ياتو يوم كنتي ازعاج يا مريم، وبعدين منو الجمعتيهو معاي، قولت ليهو ما مهم تعرف، قال لي دسك دا ياهو زاتو البعمل لينا المشاكل يا مريم، لو بتحكي كان الزول عرف مالك بالتحديد، قولت ليهو انا زاتي ما عارفة مالي، ونحن بنتكلم كدا جات الدكتورة قالت ليهو في حالة مستعجلة، ساقتو وفاتت، قولت في نفسي انا وين وهي وين، اول شي هي متعلمة، تاني حاجة انا ما بقدر اجيب اولاد، ما تبقي أنانية يا مريم، ما تحاولي تحسسي منذر انو في أي مشكلة خليهو يعيش حياتو مبسوط، مشيت قعدت في الكرسي وانتظرتو عشان انته الاسامي وادخل العيانين ليهو، جاني واحد قعد جنبي سألني وقال الدكتور مالو اتأخر؟، قولت ليهو في عيان حالتو صعبة مشى يشوفو، بقى يتونس معاي، كنت بختصرو عشان كرهي كره الزول الكلامو كتير، دكتور منذر لمن جاء وشافني، صرخ وقال مريم!!!، تعالي سريع، دخلت جوة قال لي بغضب نحن في شغل يا مريم، قولت ليهو اها؟، قال لي اها شنو، ما تتونسي في خلال الشغل فاهمة، عاينت ليهو وقولت كل الناس بتونسو بس بقت علي انا، قال لي مريم انا كلامي واضح اوعى اشوفك تتونسي مع زول في الشغل، ولا اقول ليك حتى برة الشغل ما تتونسي، قولت ليهو انت ما بتحدد عني، انا إنسانه مستقلة وحا اعمل العايزو، قال لي دكتور منذر لا يا مريم طالما شغالة هنا، انا بحدد ليك تعملي شنو، وحا تعملي وانتي ساكتة، قولت ليهو طيب ولو ما شغالة؟!!، قال لي لو ما شغالة يبقى انتي حرة، عاينت ليهو بجدية وقولت ليهو انا عايزة اخلي الشغل دة طيب، نططت عيونو فيني وقال لي لا، ما بسمح ليك تخلي الشغل، قولت ليهو حا اخليهو عشان كدا بكرة جيب لي واحدة وكلمها بكل شروطك دي، أنت اتغيرت يا دكتور اتغيرت كتير، قال لي ما فاهمك، وضحي اكتر، قولت ليهو ما ضروري أوضح يامنذر، قفلت الباب بقوة وطلعت منو.
