كلنا انصدمتا لمن قال الشي دا، امي قالت ليهو يا ولدي انا ما عندي مانع بس انت عارف انو عائشة ببتها، وانت ما حصل اتزوجت، قال لينا فارس بتها على عيني وراسي، حا اعتبرها زي بتي، بس هي توافق، عائشة بكت ودخلت جوة، انا لحقتها وقولت ليها لو عايزة تحرقي محمود وامو وافقي، قالت لي بس ما معقول اعيش معاهو وانا بحب واحد تاني، قولت ليها البتحبيهو دا كمل حياتو مع واحدة غيرك يا عائشة، عائشة قالت لي بس يا اختي، قولت ليها انت كلميهو عديل، وقولي ليهو كل شي حاسة بيه ، ولو رضى تمام، ولا ما رضى خير وبركة، قالت لي حاضر حا امش اتكلم معاهو.
_____________________
بلسان عائشة
طلعت برة بعد الكلام القالتو لي فاطمة، قولت لي فارس ممكن تجي دقيقة؟، قال لي تمام سوقت معاي مريم، قعدنا قولت ليهو فارس انت عايزني لشنو؟، ممكن اسالك من بين كل بنات الحله ليه اخترت واحدة مطلقة، وبي بتها، عاين لمريم وعاين لي وقال ما بقدر اقول ليك، قولت ليهو لشنو ما بتقدر، قال لي دا ما وقتو، قولت ليهو طيب يا فارس، لمن يجي وقتو بس اعرف حتى لو وافقت انا ما حا يكون عندي مشاعر اتجاهك لانو انا بعشق محمود، عاين لي في عيوني وقال ما مهم انا عايزك بكل أحوالك، المهم تكون جنبي واقدر اعوضك على كل حاجة مريت بيها، انا عايز اكون سندك واخوك وابوك،واي حاجة في حياتك، انا عارفك كيف عانيتي مع نسيبتك وراجلك، انا عايز اعوضك بس، كلامو دا دخل جوة قلبي قولت ليهو انا حاسة اني حا اظلمك معاي في العلاقة دي، قال لي ظلمي بكون لمن ترفضيني، مريم قالت لي ياخ وافقي يا عائشة فارس احسن منو في، هو صاح كان بعضيك وبجرك من
شعرك، بس في النهاية كان بجيب ليك الحلاوة عشان يراضيك، فارس بقى يضحك، قولت ليهو تضحك لشنو؟، اتذكرت ايام تعذيبي، قال لي اي والله كانت ايام، عم السكوت لبعض دقائق بعدها، وكسرتو بأني قولت انا موافقة عليك يا فارس بس اهم شي رائي امك لانو هي ما عندها غيرك في الدنيا دي، قال لي امي موافقة عليك يا عائشة، وما عندها مشكلة،قالت ليهو مريم طيب على بركة الله وقت كدا، قال لينا انا حا اكلمكن باليوم الحا اجي اخطبو فيها، مريم قالت ليه نحن في انتظارك، بعد فات بكيت بكاء شديد وقولت ليها ما كنت أوافق يا مريم، قالت لي مريم حا تضيعي عمرك لمحمود النسى انتي شنو بالنسبة ليهو ،و حتى ما حاول يستسفر منك عن سبب المشكلة الحصلت بينك وبين النعمة يا عائشة، قولت ليها انا كل الحاجات ديل عارفاهن، بس بالرغم من دا كلو ، انا بتعذب يا مريم،انا للان ما نسيتو، قالت لي مريم بس محمود ما بستحقك، أنت أدي فارس فرصة، قولت ليها بحاول بس بتي لجين، قالت لي لجين مالها، قولت ليها لو سمع بي دايرة اعرس احتمال يقلع بتي وانا ما بقدر اعيش من غيرها، قالت لي لا ما اظن،عشان كدا ما تشغلي نفسك بالحاجات الفارغة دي، بعدها خديجة جات داخلة ومعاها فاطمة، قالن لي كلمنا فارس وقال موافقة، قولت ليها اي جن علي ضمني وباركن لي، ما كنت مبسوطة بس عملت نفسي مبسوطة، ما اظن حا اكون مرة مناسبه لفارس، ما اظن حا اديهو الحب، بس لشنو مصر على بعد كل شي، حا اعرف في وقت ما ايوا حا اعرف.
