قال لي ما كل البيهتم بيك بحبك اعرفي الكلام دا، كلمتو دي هزتني من جوة، قولت ليهو والدموع في عيني طيب يا مهند طلقني، مهند بقى ساكت بس، وما ردا، قولت ليهو ما تسكت كدا، لو خايف من ردة فعل ابوك انا بتكلم معاهو وبفهمو انو ما قدرنا نتفاهم مع بعض، قال لي فاطمة ما حا تمشي لأبوي ولا حاجة تمي جامعتك وتاني الله كريم، قولت ليهو ما اظن اقدر اعيش معاك بعد كدا، انا حا اعيش في عذاب كل يوم بسببك، لو قعدتا معاك، قال لي فاطمة ما تسوي معاي كدا، ما تخليني احسن بالذنب انا من الاول كلمتك وقولت ليك ما انتي البحلم بيها تكون زوجتي كلمتك ولا ما كلمتك، قولت ليهو اي، قال لي طيب حاباني لشنو؟، ما كنتي تحبيني، قولت ليهو دا قلبي اعمل ليهو شنو، قال لي انا غبي ما كان اعاملك كدا، انا طوالي بنفهم غلط بسبب طبعي دا، قولت ليهو انا الغبيه يا مهند انا الغبيه والله في الموضوع دا كلو، طلقني وخليني ارتاح، جيت ماشه، لحقني، قولت ليهو ما تلحقني تاني فاهم، قال لي فاطمة ما تعملي كدا، ما تضري نفسك، قولت ليهو الدخلك، ركبت منو الحافلة وقولت ما عندو ذنب في انو ما بحبني دا ذنبي انا، ايوا انا العملت في نفسي كدا، لمن وصلت البيت دخلت جوة ولملمت ملابسي، جاني مهند داخل وقال لي جادة يعني!!!؟، قولت ليهو اي انا ما بقدر اعيش معاك في العذاب دا، قال لي اي عذاب؟!!، انا متأكد انك ما بتحبني بس عشان شوفتني اني أمان بالنسبة ليك قولتي بتحبيني، أنتي لسه يا فاطمة صغيرة عشان كدا حبك دا حب طائش وبعد فترة بروح، ولمن تكبري حا تحبي حب حقيقي شخص تاني صدقيني ، عشان كدا اقعدي وفكري في كلامي، ولا قولت ليهو بتقول في شنو شلت الشنطة وطلعت، مشيت لعم عبدالرحمن في الصالون لقيت خالتو عواطف قاعدة معاهو، مهند جاء وراي، عم عبد الرحمن قال لي خير يا بتي ماشه وين كمان، قعدت وقولت ليهو بيتنا، خالتو عواطف قالت لي لشنو؟، قولت ليها لانو حا انفصل من مهند، عم عبدالرحمن عاين لمهند وقال ليهو حيوان!!!، البت دي سويت ليها شنو عشان عايزة تطلق منك اسي ما كنتو عال العال، الحصل شنو؟، انا قولت ليهو مهند ما غلطان انا الدايرة الطلاق ما هو، عم عبدالرحمن قال لي ازعجك بتصرفاتو، ما قادرة تتحمليهو ولا شنو، قولت ليهو أبداً هو كان مهتم بي واي حاجة وما حصل غلط علي، بس ما قادرة استمر انا كنت مجبورة عليهو عشان كدا ما قادرة استمر معاهو افهمني، قال لي يا بتي روقي شويه واهدي كل مشكلة وليها حل، انا مما شوفت في عرس ود كامل صاحبي عرفت انك المناسبه ليهو، شوفتك بتتعاملي كيف مع الناس، والخدمة البتخدميها بكل محبة وبشاشة، طوالي سألت منك وخطبتك من ابوك،انا بعتبرك بتي، قولت ليهو وانت ابوي يا عم عبدالرحمن بس صدقني ما قادرة اكمل في الزواج دا والله، خالتو عواطف قالت لي اخدي وقتك وفكري ما تستعجلي، قولت ليها لا، انا عايزة أطلق، و عايزة مهند يطلقني قدامكن هنا، مهند بحلق عيوني وقال لي بطلقك بشرط، ابوهو قال ليهو دا كلام شنو ما تبقى زيها طلاق شنو عليك الله، مهند قال لابوهو فاطمة ما عايزاني انت ما شايف الشي دا الأفضل أطلقها، ابوهو قال ليهو بس يا ولدي، مهند قال لابوهو يا ابوي ما بتقدر تجبر زول يقعد معاك بالغصب، انا قولت لي عم عبدالرحمن كلام مهند صاح الأفضل انو أطلق وافوت، مهند قال لي اي، قولت ليهو شرطتك شنو طيب، قال لي شرطي هو اني حتى بعد طلاقنا اقريك، قولت ليهو لا طبعاً، عم عبدالرحمن قال لي ديل قروشي انا البقريك بيهن ديل ما قروشو هو، ولو معتبراني ابوك وافقي، سكتا مسافه طويله وقولت ليهو حاضر، مهند قال لي طيب وقت قبلتي، انا حا اطلقك، ابوهو قال ليهو ما تطلقها اسي احتمال تغير رأيها، قولت ليهو يا عمي لو معتبرتي بتك خليهو يطلقني، عم عبد الرحمن عاين لي مسافة وقال لي اقعدي مع نفسك شوية احتمال تقتنعي نحن ما دايرين نخسرك، قولت ليها يا عم عبدالرحمن انا حسمت قراري وما اظن ارجع عنو فرجاءاً ما تصعب علي الأمور، انا ما قادرة اتحمل اكتر، مهند قال لي ابوهو خليها يا ابوي براها اختارت كدة، وتاني وجة لي الكلام وقال لي انتي طالق يا فاطمة، بعد قال الكلمة دي، انا قومتا، وودعت عم عبدالرحمن وخالتو عواطف المصدومين، واتجاهلت مهند الواقف جنبهم،فوتا من البيت، مهند لحقني وقال لي ما كنت عايز تصل الأمور للحتة دي، قولت ليهو احسن يا مهند، لو قعدنا الاتنين سوا انا حا اتعلق بيك اكتر من كدة وحا احبك اكتر وانا ما عايزة كدا، انا عايزة انساك، قال لي فطوم انا اسف لو جرحت ليك مشاعرك، قولت ليهو لا انت صريح وما قولت الا في قلبك، على الأقل ما اديتني امال كاذبة، بتمنى تلقى البت البتحبها، قالت لي وانا بتمنى تلقي الزول الصاح البتحبيهو وبحبك، ما رديت عليهو ركبت الحافلة وختيت راسي في رجولي وقعدت ابكي واقول في نفسي الحب من طرف واحد مؤذي ومؤذي شديد، هو بارد وما فارق معاهو شي، بس انا جواتي نار ما عايزة تخمد، انا بتعذب داخلياً، انا حاسة قلبي عايزة ينقطع من الألم، الحب دا وجع قلب بس.
