لمن قال الكلام دا انخلعت وقولت ليهو وقف العربيه فوراً، قال لي خديجة انا قولت ليك حاجة غلط فيها شنو لو قولت ليك عايز اتزوجك، قولت ليهو منتصر انا ما عايزة اسمع كلمة واحدة منك قولت ليك وقف العربية، وقفها، نزلت منها، ومشيت منو، قال لي دقيقة يا خديجة افهم أنك رفضتيني اسي؟ ، التفت عليهو قولت ليهو اي انا ما حا اتزوجك انا ما عايزة اعيش تجربة سيئة تاني، أنت يا منتصر ما بتناسبني انت إنسان عصبي وعلى أقل شي بتجوط، انا ما بقدر اتقيد تاني بزول كعب، قال لي انا ما كعب يا خديجة اديني فرصة بس، قولت ليهو انت قبيل كنت بتجوط فيني يا منتصر، في دق باب بس!!، اتخيل بعد نتزوج البحصل شنو؟، قال لي خديجة انت ما تسرعي،خلينا نخطب، واعرفك وتعرفني وانت قرري، قولت ليهو انا في الفترة دي عرفتك، أنت يا منتصر زي عماد بحب يتسلط علي لانو مفكرني ضعيفة، قال لي خديجة اوعى تقارنيني بزول، انا صاح عاملتك كعب بس بوعدك انو تاني حا اعاملك احسن معامله، قولت ليهو لا يا منتصر انا ما عايزاك ولا عايزة راجل تاني في حياتي الباقيه دي، ولو سمحت تاني ما عايزة اشوف وشك، والا حا اخلي الشغل، قال لي تمام يا خديجة بس اعرفي انو انتي في قلبي، وحا تفضلي فيهو، قولت ليهو انت بتعرفني من متين عشان تقول الكلام دا، قال لي من زمان من زمان بعيد لمن كنتي صغيرة شديد، حالتها نظرة بس كانت كفيله انو تعشعشي في قلبي، و لمن شوفتك اول مرة عرفت انك مألوفة وطلعتي ياهك نفس البت الشفتها قبل11سنه، قولت ليهو كلامك دا انا ما مستفيدة منو حاجة، الأفضل ليك يا منتصر تشوف واحدة بتناسب شخصيتك دي، واحدة زي طبعك دا، بعدها مشيت منو، صاح لي وقال خديجة انا ما بيأس وما بخليك تضيعي مني مره تانيه ، كلامو خلا حاجة في قلبي بتتحرك، ما عارفة، بس كلمتو دي دخلت قلبي جوة، هو داير يتمسك بي، انا ما حصل في زول قال لي الكلام دا، بس في النهايه الكلام وحدو ما بكفي.
رجعت البيت مضطربة جيت لاختي وضميتها وبقيت ابكي، قالت لي خديجة خير مالك؟، قالت ليها زهجانة سااي، قال لي لا دا ما زهج، احكي الحاصل عليك، قولت ليها منتصر...، تاني سكتا، قالت لي منتصر مالو عمل معاك حاجة غلط ولا شنو، طردك، اهانك، مالو معاك الولد دا، والله ما اخليهو، قولت ليها طلب يدي، قالت لي طلب يدك!!!!!،منتصر الواحد دا، كيف الكلام دا هو ظاهر عليهو بكرههك، قولت ليها ما تسأليني ابعرفو الحاصل ليهو شنو، مريم قالت اها انتي قولتي ليهو شنو، قولت ليها ما موافقة، كيف اعيش معاهو وهو كدا، انا كرهت اصلا حاجة اسمها عرس، بس لو أتزوجت منتصر دا ما حا اقدر اعيش معاهو لانو ما الإنسان ألفي بالي أبدا، انا عايزة زول بسيط متواضع، نعيش بهدوء وبمودة بس الزي منتصر دا ما بنفع معاي، قالت لي اي والله أهم شي التواضع، البركة الرفضتو،قولت ليها ما تكلمي فاطمة بالموضوع دا فاهمة، قالت لي تمام، فجاءة كدا اتصلت فاطمة بمريم، قولت ليها أكان ذكرنا شي سمح ما كان جانا، مريم ضحكت وردت ليها، فاطمة سلمت عليها، وبقت تنق وتقول لو خليتي لي خديجة ما أكان احسن، ياحليلي قاعدة براي زي الشيطان، مريم قالت ليها اجي خالتو عواطف ومهند وين كمان، قالت لي مهند نايم، وخالتو عواطف وعم عبدالرحمن مشو الحله عندهم وفاة، مريم قال ليها الاتوفى منو كمان؟، قالت ليها حاجة زينب ام خالتو تقوى، مريم قالت ليها لا حولا ولا قوة الا بالله، لازم امش اعزي بس ما اسي، قالت ليها فاطمة اي ضروري تمش فينا واحدة، تاني فاطمة قالت لينا انا عايزة اوريكن حاجة حا تفرحكن انا قبلوني في جامعة ()، تخدير، بقينا نزغرد في التلفون، مريم دمعت وقالت ليها كيف يا فاطمة الدعمك منو؟ ، فاطمة قالت ليها مهند هو الدعمني وقال حا يقريني، انا فجاءة اتذكرت كلام منتصر عن قرايتي، تاني مريم قالت ليها البركة الربنا اداك الهدي الرضي، البخليك تقري يا اختي، انا مبسوطة وفرحانه ليك، تاني انا قولت ليها بالتلفون، مبروووك يا اختي تستاهلي والله، إن شاءالله من فرح لفرح، فاطمة قالت لي إن شاء الله ديل دعواتكن يا اخواتي، ودعوات امي، تأني قالت لينا بالمناسبه امي دي ليها يومين قاقله تلفونها، مريم قالت ليها الحاصل شنو، انا ما اتصلت ليها، انا زاتي قولت ليهن اني ما اتصلت، فاطمة قالت لينا نسأل منو منها، مريم قالت لينا خالتو نعمات جارتنا بس، فاطمة قالت ليها خلاص لمن تعرفي أخبارها كلميني،قفلت منها، ومريم قالت لي ماشه اخت ليك تتغذي، تلقيك جيعانه لاسي، قولت ليها طيب انا بغير واجيك، غيرت وقعدت في السرير حبة وبقيت اتذكر في كلام منتصر، للان ما زح من بالي وشكلو ما حا يزح بالسهولة دي، لازم ابعد قدر الإمكان عنو.
