قال لي انا عمك عوض يا بتي، قولت ليهو عمي عوض!!!؟، قال لي ما بتكون متذكراني لانو لمن كنت بجيكم كنتي صغيرة، قولت ليهو اي والله، تاني قال لي اديني سكينة يا بتي عندها معاها موضوع مهم، فتحت الاسبيكر واديتو ليها قولت ليها دا زول اسمو عوض قال دايراك، قالت الوو العوض اخوي اخبارك وصحتك، قال ليها تمام الحمد لله وانتي، قالت ليهو نحمدو والله، بعدها قال ليها اسمعني كويس يا سكينة وافهمي كلامي ما كان عايز اخبي عليك الحاجة دي بس اضطريت والله، امي خافت وقالت ليهو في شنو يا العوض خوفتني، عوض قال ليها يا سكينة الشاذلي بعد هرب جاء قعدت عندي، ومرة ساق دفار عمل حادث وانشل، واسي صحتو اتدهورت شديد، قولت مفروض اكلكم بعد كدة، لانو لو مات ما بقدر اسامح نفسي لو ما وريتكم، انا ما كان عندي احساس، بس امي حنت عليهو وقال يا حليلو الشاذلي حا نجي نسوقو، قال ليها ما تتعبي نفسك انا بجيبو، بس الكلام الناس الطالبنو قروش، امي قالت ليهو انت جيبو وما تاكل هم، حا نحل كل الأمور، قولت لأمي نستقبلو لشنو بعد كل السواهو فينا، وسمية تافقتني الرأي، بس امي وعائشة لا، وتاني امي قالت لينا في النهاية دا ابوكن،يعني نجدعو في الشارع، قولت ليها اي ما جدع خديجة، وكان داير يجدعها تاني لو ما منعتيهو، عائشة قالت لي فاطمة اهدي ما بنقدر نكون زيو، قولت ليها انتي عاطفية بس، امي قالت كلام عائشة ما غلط عشان تقولي عليها عاطفية حا نبقى احسن منو ونستقبلو، دخلت زعلانة واتصلت بمريم بكيت ليها بكاء شديد، قالت لي مالك يا بت،حكيت ليها، قالت لي معقول ابوي بقى كدة، قولت ليها اي بس لمن حكيت لي شعرتي بحزن يا مريم احكي، قالت لي لا حقيقاً ما عندي اي حب اتجاة ابوي، هو سلب مننا حاجات كتيرة بس على قول امي حا نكون احسن منو ونستقبلو، قولت ليها انتي برضك زيهم حا اقفل، قفلت وقولت اتصل بخديجة بس لو رأيها زيهن، فجاءة خطر على بالي المرة وبنتها البتهتم بيها،بالرغم من كل حاجة سوتها ليها ما جدعها، بقيت افكر فيها مدة طويلة وقولت في نفسي اتخذت قراري انا ما بسامحو بس حا أرضى انو يجي يقعد معانا، ولو عايز حاجة بجيبها ليهو، الحياة دايرة كدا، طلعت لأمي، ضميتها وقولت ليها اسفه عشان زعلتك، قالت لي انا متفهماك، قولت ليها انا أقنعت خليهو يجي، قالت لي الحمدلله.
____________________________
بلسان مريم
بعد قفلت مني فاطمة قعدت لانو حسيت نفسي دايخة، رقدت في الكنبة، تاني جات نسيبتي وقالت لي مالك يا مريم، قولت ليها ما حاسة نفسي كويسة يا خالتو، قالت لي اتصل بمنذر يا بتي، قولت ليها ما ضروري رقدت جوة، بعد مدة جاني منذر وقعد فوق راسي، وبقى يتلمس في حرارتي، قولت ليهو الجابك شنو؟، قال لي كيف الجابني شنو؟، انتي عيانة وما اجي، لولا كلمتني امي ما كنتي كلمتني صاح، قولت ليهو انتي مشغول و..، قاطعني وقال ماف شغل أهم منك انتي، بقى يمرر باصابعيهو في شعري، وقال لي حاسة بشنو انتي؟، قولت ليهو شوية دوخة، قالت لي وتاني؟، قولت ليهو حاسة بطني طامة، عاين لي مدة طويلة وقال لازم نفصحك، قولت ليهو ما ضروري قال لي لا ضروري، ساقني لمن وصلنا المستشفى عملنا كم فحص كدة، وتاني رقدتا، هو قال لي دقيقة امش واجيك، مشى وجاء قعد جنبي ومسك يدي وبقى يقول في كلام في سرو، قولت ليهو تقول في شنو؟، قال لي ادعى يا مريم، قولت ليهو مالو في حاجة خطيرة شاكك انها عندي تتدعى،ضحك علي وقال يا مريم انا لمن قولت ليك ما تحضري لي الهنود ديل ما كان عن فراغ، ضحكت عليهو وسكتا، بعد مدة جاء دكتور وجاب الفحوصات ، قال ليهو منذر طمني يا دكتور مجدي، دكتور مجدي قال ليهو اطمن تب يا منذر، شكك طلع في محلو، منذر بكا، وأنا خلاص اعصابي باظت وقولت لمنذر الخلا علي يا منذر، مالي انا؟ وبقيت ببكي، دكتور مجدي ضحك وقال المدام شكلو هرمونات الحمل ماثرة عليها، بس انت مالك، قولت ليهم حمل!!!!، دقيقة منو الحامل كمان؟ مجدي قال لي انتي يا مريم حامل في الأسبوع التاني، وتاني طلع خلاني، انا بكيت في اللحظة دي منذر حضني عليهو وبقى يبكي،زح مني، قولت ليهو يعني انا حا اكون ام وانت اب، قال لي اي يا مريم الحمدلله، قولت ليهو ما قادرة أصدق يا منذر، قال لي لا صدقي حا تجيك طفلة بتشبهك وتقول ليك ماما، وأنا بابا، قولت ليهو انت طوالي عرفت النوع، قال لي اي انا داير طفلة بتشبهك تماماً، قولت ليها إن شاء الله يا حبيبي، ضماني وقال لي انا سعيد عشان انتي تاني ما حا تكوني حزينة، قولت ليها بس انا ما كنت كدة، قال لي انا بعرفك انو بتخبي زعلك، لكن صدقيني انا بشعر بالمك، وبحس بيك، انتي كنتي لمن تشيلي اولاد اخواتي بعرفك انك قدر شنو متشوقة يجيك ولد وبلاحظ لزعلك، بس ما كنت عايز احسسك اني عارف، قولت ليهو عشان كدا طوالي بتطلعني مشوار أو تجيب لي هدية، وأنا أقول مالو منذر دة، قال لي ما هو ضروري عشان اغير مزاجك دا، قولت ليهو منذر انا حقيقاً بشكر ربنا إنك كنت زوجي ورجعت للبكاء، قال لي وانا كمان يا مريم بس لو بكيتي بزعل، قولت ليهو ما بيدي قول الدكتور ديل هرمونات ولازم تستحملني، قال لي مستعد استحملك العمر كلو يا حبيبتي، قولت ليهو بحبك يا منذر، قال لي وانا كمان ممكن بعد كدة نمش عشان امي حا تموت من القلق عليك، قولت ليهو ممكن.
