بلسان عائشة
بقيت بعاين ليهو بصدمة، حسيت راسي حا ينفجر من كلامو القالو، كيف يخيرني الخيارات دي، ما اتوقعت محمود يطلع ندل ويقول لي الكلام دا، قولت ليهو انت يا محمود اناني شديد، أنت زاتك اتزوجت، لشنو عايز تحرمني انا، قال لي لانو بحبك، بحبك يا عائشة، بحبك وما بقدر اشوفك مع غيري، عشان كدا اختاري الخيار الصاح وهو ترجعي لي، قولت ليهو لو اموت ما حا ارجع ليك، بسببك خسرت جنيني،قال لي جنين!!، اي جنين عائشة انتي كنت حامل، دمعت وقولت ليهو اي كنت بس بسببك وبسبب ابوي حرمتو طفل بريء انو يجي للدنيا، خت يدينو في راسو ودمع، اخد مسافة في الحالة دي، تاني رفع راسو وقال انا ما بقدر اسامح نفسي، ما بقدر، زي ما انتي زعلتي عشان خسارة الجنين انا زاتي زعلت لانو من صلبي يا عائشة، قولت ليهو زعلك وندمك ما بفيدوني بعد كدة، انا خسرتو للأبد وللان النار ما قادرة تنطفي جواتي، قال لي عائشة انا اسف، اسف يا عائشة بوعدك لو رجعتي لي حا اعوضك، قولت ليهو ياما قولت لي وعود بس ما حصل وفيت بيهن، لو عايزني اسامحك خليني اعيش حياتي يا محمود، قال لي محمود لا يا عائشة ما بقدر اخليك، قولت ليها محمود افهمني انت بقيت إنسان متزوج وعندك التزامات اتجاة مرتك عشان كدا بعد عني، وركز معاها، انا ما بمش للجحيم بيدي تاني، قال لي بوعدك انو...، قولت ليهو بوعدك بوعدك انا زهجت من الكلمة دي ممكن تطلع برة يا محمود، قال لي عائشة انتي دايرة كدا تمام، انا بخليك تفكري كويس وما حا اضغط عليك،ولوقتها لجين حا تمش معاي، قولت ليهو ما تدخل لجين في مشكلتنا، قال لي لازم لانو بعد بتك عنك حا ينور ليك طريقك، وحا تختاري الخيار الصحيح وانا متأكد، طلع وساق لجين، انا ما غالبني اقلعها بس خوفت عليها تنخلع، دموعي ديل ابن يقيفن، جاتني خديجة وامي مخلوعات وقالن لي مالك؟، حكيت ليهن، قالت لي خديجة محمود الوسخ الكلب، كيف يعمل كدة معاك، وامي قال لي والله ما اسكت عايز يقطع نصيبك، هو قايلك مقطوعة من شجرة عشان يخيرك كدة، البسي يا خديجة توبك دة وورح، قولت ليها ماشة وين، قالت لي امي ماشة عشان اضمن مستقبلك،هي النعمة قايلة نفسها شنو التصبر لي المرة الفقرية دي، خديجة لبست توبها وامو برضو وطلعن، انا ما حاولت امنعهن لأنو انا دايرة زول ياخد لي حقي وقت انا ما قادرة.
______________________
بلسان خديجة
لمن وصلنا بيت ناس محمود لقينا محمود قاعد مع امو َواختو وفي مرة غريبة قولت الا مرتو، ولجين كانت في نصهم، جينا عليهم،النعمة قالت لي امي خير يا سكنية مالك الليله جيتينا، امي قالت ليها انت عارفة يا النعمة لشنو جيتك، كيف محمود ولدك يخير بتي، محمود قال لامي ياخالتو انا اضطريت اسوي كدة، امو قالت ليهو المرة دي بتقول في شنو انا ما فهمت، خيارات شنو، أنت قولت ليك أقلع بتك ما قولت ليك خيرها، مرتو قالت ليه محمود قول اي خيارات؟، قال ليها يا ليلى دا موضوع ما بخصك عشان كدا اسكتي، ليلى قالت ليه ما بسكت انا مرتك ومن حقي اعرف، امي قالت ليها اي من حقك وانا بكلمك هو خيارها بين ترجع ليهو ولا تتزوج وتخلي بتها ليهو ولا ما تتزوج نهاي، مرتو انصدمت وبقت تعاين لمحمود بس وساكتة والنعمة قالت لي محمود كلام سكينة القالتو دة صاح؟، محمود سكت مسافة وقال لامو اي، النعمة قالت ليهو انت مفكر ترجعها بعد كل العملتو فيني دا، قال ليها اي يا امي، انا ما قدرت انساها، انا ما قادر اعيش من دونها يا امي، النعمة قالت ليهو بس يا ولدي كيف اهون عليك كدة، محمود قال ليها ما هونتي علي بس انا ماقدرت أتجاوز عائشة، وحا ارجعها، أنت ما عارفة حجم المعاناه السببتو ليها، انا خسرت جنينها يلي هو ولدي، امو قالت ليهو بصريخ على جثتي يا محمود، انا قولت لمحمود في أحلامك ترجع ليك، قال لي حا ترجع غضباً عن الكل، ليلى قالت ليه لو رجعتها طلقني ومشت لي النعمة ومسكت يدها وبدت تكورك فيها وتقول انت موش قولتي عائشة صفحت وانطوت لي كذبتي علي، حسيت حاجة النعمة خافت منها، شكلو هارشاها هرش صاح، محمود حاول يزح ليلى من امو بهداوة عشان هي حامل، ليلى فاتت دخل جوة وبقت ترمي في الحاجات، انا قولت في نفسي المرة دي ما نصحية والله،النعمة قالت لولدها الحقها تقوم تكسر الشاشة، قال ليها التكسرها انت مزوجاني مرة زيها لشنوو، تاني ميادة قالت لمحمود امي من ما جيتها قبيل مطلقة ضغطها ارتفع وما بتستحمل ما تعمل فيها كدة، سكينة قالت للنعمة البتعملو في الناس، برجع في اولادك يا النعمة، البركة ميادة الاطلقت ومحمود مرتو كعبت معاك، انا قولت لأمي ما تشمتي يا أمي، النعمة قالت لينا ما تتكلمي يا سكينة على الطلاق انتي بناتك التلاته اطلقن، امي قالت ليها مبسوطة أنهن اطلقن لانو الكانن متزوجات منهم ما نافعين، النعمة قالت ليها اوعى تجمعي ابني معاهم، امي قالت ليهو بجمعو وبعدين ولدك اكعب واحد فيهم راجل طرطورة واضينة، محمود قال لي امي انا عاذريك يا خالتو انتي زعلانة مني فطبيعي تقولي الكلام دا، النعمة قالت ليهو محمود انت غبي، محمود قال لأمو يا أمي أفهميني، أنت اكتر واحدة عارفة اني بحب عائشة وانا زمان كنت معصب منها عشان كدا اتزوجت، بس اسي داير ارجعها وعشان ما تعمل مشاكل معاك حا نمش نعيش في بيت برانا، حاجة النعمة وشها لمن انقلب لمن قال ليها الكلام دا، وبقت تصرخ وتكورك، ونحن كنا واقفين نتفرج بس، وبعدها وقعت، محمود وميادة جرو لامهم، محمود رفعها وجرى بيها على العربية ، وانا وامي بقينا واقفين ومتجمدين، قولت لأمي الخلا لو المرة دي ماتت حا نكون نحن السبب، امي قالت لي دي عمايلها نحن ما دخلنا، ميادة جات وقالت لو جات لامي حاجة والله ما بخليكن، امي قالت ليها دي عمايلها،تاني شلنا لجين وفوتنا.
