ما صحيت الا وانا في السرير ومختوته قطعة على راسي وجنبي مهند ، عاينت ليهو قولت ليه الحصل شنو؟، قال لي ما متذكرة، قولت ليهو لا، قال لي انا صحيت ولقيتك واقعة ومغمى عليك، شلتك ختيتك في السرير، وضهري دا لو اتكسر الليله بسببك لأنك تقيله شديد، قولت ليهو معقول!!، حصل كل دا، قال لي اي، قولت ليهو اسفه عشان ازعجتك، عاين لي وقال مفروض تعتذري لضهري صاح برضو، ضحكت ضحكة خفيفة، وقولت ليهو اسفه لضهرك، قال لي قبل اعتذاارك اسي ارتاحي، قولت ليهو لا انا عايزة اصلي اول، قال لي براحتك، مشيت اتوضيت وجيت صليت، تاني قولت في نفسي ارجع السرير ولا حا يكورك فيني، بقيت واقفه ومترددة في النهايه قولت احسن اقعد في الأرض، ما ناقصني اي صراخ، رقدت في الواطة، مهند جاء وقال لي شكلك بتحبي الأرض، ما عاينت ليهو ولا فكرت ارد لاني كنت مصدعة شديد، قال لي قومي منها سريع، قولت ليهو مرتاحة ممكن تخليني، قال لي تمام لو حاباها كدا، بس اعرفي انو في ضب حايم بعليك، انتفضت سريع وقولت وينو وينو!!، كرهي كرة الزاحف الشين دا، بقى يضحك ويقول ما قولتي مرتاحة، اكنتي تقعدي،شلت مخدتي وجيت راجعه للسرير اتغطيت منو عشان ما اشوف وشو، قال لي انا زاتك ما ميت عشان اشوفك عشان كدا افتحي الغطاء دا احسن مما تختنقي، قولت ليهو انا بردانه ما منك متغطية، قال لي طيب ما تقولي كدا، انا زول سلس و متفهم ، خفض درجة المكيف وقال لي طلعي رأسك، ولا اشتغلت بيه الشغله، قال لي انتي غتيته على فكرة، وبقى يطنطن براه، قمت نمت وخليتو كدا.
لمن صحيت لقيتو طلع،عاينت للساعة لقيتها ١١،مشيت استحميت وغيرت، ونزلت، لقيت ناس البيت كلهم يشربو في القهوة، ام مهند قالت لي ادخلي اكلي نحن أكلنا،قمت دخلت واكلت جيت طالعة قعدت معاهم عمو عبد الرحمن قال لي يا بتي الليله حا اكلم مهند حا يسوقك لدكتور عيون عشان يشوف عينك دي ، قولت ليهو شكراً بس ماف داعي، قال لي اعتبريني ابوك يا بتي وما ترفضي، قولت ليهو طيب لو انت مصر.
تاني قال لي بالمناسبه مهند اختفى وين، قولت ليهو ما عارفة لمن صحيت لقيتو ماف، قال لي الولد دا اعمل ليهو شنو ما عايز يبطل همله لشنو، حتى بعد اتزوج،تاني جاء مهند قال ليهو عمو عبدالرحمن كنت وين، قال ليهو مهند ما اشم هواء يعني، تاني عمو عبد الرحمن قال ليهو الله يصبرني عليك ما قولت ليك ما تطلع بدون علمي، مهند عاين ليهو وقال عليك الله قيدني يا ابوي لو بترتاح، ابوي قال ليهو لو بتخلني امك كنت عملتها، مهند كان عايز يرد عليهو بس امو سكتتو. تاني عم عبدالرحمن قال ليهو بدل تعديها فارغة وقله أدب معاي سوق مرتك دي وديها الدكتور، قال ليهو دكتور شنو هدي شديدة الحجر، عمو عبدالرحمن قال ليهو لدكتور عيون جوابك ألفي طرف لسانك دا، قال ليهو أمرك يا ابوي في كلام تاني عايز تقولو، قال ليهو لا،قال لي مهند ورح عشان نجهز، مشيت لبست أقرب عبايه وانتظرت مهند ، بعد انتهى من اللبس قال اسي امرق بيك كيف وريني؟، منظرك يخوف!!! ، قولت ليهو لو بتخجل مني، امش قول لابوك الكلام دا ما تقولو لي انا، قال لي فطوم انت عارفة اني لو بقدر اقول لأبوي كلمة واحدة كنت قولت ليهو اني ما دايرك، قولت ليهو ولا انا ميته فيك عاين، وريتو آثار الضرب وجرحي لنفسي، وقولت ليها دا كلو عشان ما اتزوجك يا مهند بس ما نفع واتزوجتك، بقى يعاين لي باستغراب وقال لي دا منو العمل فيك كدا؟، قولت ليهو ما ضروري تعرف ممكن نمش.
