قال لي ما اظن بتلقي شغل احسن منو، قولت ليهو بلقى بس اعرف انو ما مهم الشغل يا استاذ المهم عندي الناس الشغاله معاهم، قال لي انت على فكرة بتطاعني فيني، قولت ليهو ما تشيل الأمر شخصي، انا قولت بصيغة عامة، المهم نزلي هنا، قال لي في لفة صاح، قولت ليهو بمشيها برجولي، قال لي طيب على راحتك وفكري في الموضوع كويس انا بديك فرصة، قولت ليهو انا فكرت وما حا اغير قراري فشوف ليك واحدة تانية تذلها وتهينها تمام، اعرف انو الزول مفروض يحترم المهن، اي مهنة كويسة المهم هي حلال بس، قال لي يعني مفكراني ضاحك فيك ولا شنو، قولت ليهو انا ما عايز اتجادل معاك، نزل من العربية واداني قروش وقال لي حق تعبك الليله، قولت ليهو ما عايزة اعتبرو خدمة مجانيه، قال لي انا ما بقبل زول يمن علي عشان كدا شيليهن، قولت ليهو ما عايزاهن ياخ، مسك يدي واداني ليهن، جدعتهن ليهو في وشو وقولت ليهو انت والله يا منتصر وقح وقاحة شديدة عشان كدا إن شاء الله تاني ما اشوف خلقك دي، بعدها فوتا منو ودمعت ما ممكن الحياة دي ماشه معاي بالعكسي كدا، اي زول اقابلو يطلع كعب.
لمن وصلت البيت لقيت مريم َمنتظراني وتنشاف زي الكانت بتبكي سألتها في شنو، قالت لي ماف حاجة، قولت ليها بس ما ظاهر عليك كدا، قالت لي والله كويسه، اها الليله يومك كان كيف؟ ، قولت ليها انا خليت الشغل، قالت لي لشنو!!، كضبت عليها وقولت ليها بعيد وبنطلع متأخرين ما معقول كل يوم يوصلني استاذ منتصر، قالت لي كلامك صاح، احسن زاتو ما بحبك تشتغلي، النقوم اخت ليك اكل، قولت ليها انا جايه معاك دقيقة اغير، قالت لي لا انت ارتاحي وانا بمش اخت ليك، قولت ليها طيب.
______________________
بلسان منتصر
انزعجت شديد من تصرفها، كيف تعاملني كدا كنت طول الطريق ما مركز بسببها، لمن وصلت البيت كنت معصب شديد طلعت غرفتي، لقيت مهند فيها، قال لي منتصر مالك اتاخرت، قولت ليهو كان عندي شغل مهم، قال لي سمعت انو الليله اتعاملت مع خديجة تعامل كعب، قولت ليهو من وين سمعت هي اشتكتني ليك، قال لي لا بس كلمتني فاطمة، قولت ليهو وفاطمة كلمتها هي، معناتو اشتكتني في النهايه، قال لي لا هي كلمت فاطمة عشان ما تفهم غلط وتزعل من ابوي، وفاطمة كلمتني عشان زعلت من كلامك ليها، قولت ليهو اها المختصر عايز شنو، قال لي ما تقسي عليها، أنت ما عارف الظروف المرت بيها، قولت ليهو اي زول شغال يقول لي كدا ظروف شنو عليك الله، قال لي ما بقدر اوريك بس داير اقول ليك ممكن تتساهل معاها حبه، قولت ليهو هي خلت الشغل زاتو، يعني ما محتاج تنصحني اتعامل معاها كيف، عاين لي وقال والله يا منتصر بالغت من اول يوم شردتها، قولت ليهو عاين يا مهند ما تديني محاضرات وامش من هنا لانو زهجان سريع، وثم ثانياً انت مهتم بخديجة دي لشنو، قال لي لأنها اخت فاطمة، قولت ليهو فاطمة دي ياهك الكنت رافضيها وكل يوم تتصل بي عشان امنع ابوي ما يزوجك ليها صاح، اسي الاتغير شنو، قال لي دا ما موضوعنا،تاني قام وقال لي وقت خلت الشغل ما عندي كلام معاك تاني، طلع وخلاني محتار نفسي اعرف ظروف خديجة دي، في سر كبير وراها ولازم اعرفو، مشيت لأبوي قعدت جنبو، قال لي جيت متأخر من اول يوم ليك قولت ليهو ايوا دققت في الملفات القدام، قال لي كويس، قولت ليهو يا ابوي عايزة أسألك سؤال وبتمنى تجاوبو، قال لي اتفضل، قولت ليها خديجة ظروفها شنو ممكن تجاوبني، قال لي ما ضروري تعرف حا تستفيد شنو، قولت ليهو عليك الله يا ابوي كلمني، قال لي انت اهنت البت عارف الحاجة دي، ممكن تعترف بغلطتك قدامي احتمال اكلمك، قولت ليهو طيب انا غلطان وشديد، ممكن تتكلم اسي، عاين لي بنظره تفحصية، شكلو داير يعرفني إذا ندمان ولا لا، تاني سكت مسافة، وقال لي يا ولدي خديجة دي ابوها الشاذلي زوجها لسكير من ٣ شهور، قولت ليهو اها، قال لي ضربها ضرب شديد و طلقها وبعدها وداها لابوها وزاد ليها الضرب، وتاني ابوها طردها وجات قعدت مع اختها مريم، ونسابه مريم عاملوها كعب، عشان كدا كلمت فاطمة تشوف ليها شغل عندي وكدا حا تصرف على نفسها، قولت في نفسي وانا اقول الخدوش دي من وين والدم الفي يدها مصدرو شنو، قولت ليهو يا ابوي انا ما عارف كل دا، واسي هي خلت الشغل من اساسو، قال لي خلتو لشنو؟!، انت عملت ليها حاجة، قولت ليهو ولا شي ما عملتو ليها، قال لي متأكد، قولت ليهو اي، طلعت منو وقولت في نفسي براها خلت الشغل يعني ما تأنب ضميرك ساي وانسى، دخلت جوة وبقيت افكر بيها تاني واقول يعني كبرياءها منعها تشتغل، انا قولت ليها شنو غير تعالي بدري، تعالي بدري دي فيها حاجة، ولا تاني دقي الباب في حاجة، ولا نضفي دي فيها حاجة، يعني مفروض ما تزود المواضيع ما هو شغلها يعني اكضب يعني، ولا غلطان عشان اديتها قروش البت دي عايزة شنو يعني، نوم نوم وما تفكر كتير بيها.
