قولت ليهو انا ما عارفه جن من وين، قال لي خديجة انا ما بنغش ليك فاوعى تكضبي، قولت ليهو يا عماد انا ما دايرة اجيب منك ولد ما عايزة، اداني كف، قولت ليهو انت قولت لي ما تكضبي، ولمن قولت الحقيقة ما استحملت وضربتني!!! ،مسكني من شعري وقال لي انا مالي عيبيني ، قولت ليهو كلك عيوب، قال لي جاحدة نعمة، انتي لاقية راجل زي يكون اب لولدك ،قولت ليهو لو كنت انت ابوهو اخير ما يجي للدنيا دي من أساسها، اداني الكف التاني وبقا يضرب فيني بكل قوته لمن رماني في الأرض قال لي انا عشان عاملتك كويس، وريني حصل سألتك طول ال ٣ شهور دي، قولت ليهو شكلك عشان بتكون سكران ما بتتذكر، قال لي ما هو ابوك قاعد يعمل اكعب من كدة، قولت ليهو عارفة، قال لي وقت عارفة بتعملي كدا لشنو، قولت ليها انا يا عماد بكرهك سااي بكرهك وما بطيقك، ياخ انا بقرف منك لمن تقرب مني،حتى اسمي دا لمن تقولو بحس بالاشمئزاز قال لي لا الليله خطيرة كشفتي اوراقك كلها، قولت ليهو مفروض من زمان اكشفهن اصلا، بس بعد اكتشفت الحبوب ما عندي حاجة ادسها تاني، قال لي كويس يا خديجة وقت بتقرفي مني حا اطلقك واوديك لابوك واحكي ليه بالكلام دا النشوفو بعمل ليك شنو، إن شاء الله يقتلك، انتي طالق يا خديجة طالق، بكيت وقولت ليهو ما خايفه اموت، لو موتا برتاح زاتي، قومني وجراني، قولت ليهو خليني المم ملابسي على الأقل، قال لي ديل اشتريتهن ليك انا ما حا اخليك تشيلي ولا حاجة منهم.
المسافه من القرية الساكنين فيها لقرية ناس ابوي ساعة، كان كل ألفي الحافلة بعاين لي وبصراحة عازراهم لانو مغطية كل وشي، عشان ما يشوفو إثر الضرب، لمن وصلنا نزلني بالقوة، وجراني بقيت بقول ليه ما قادرة امش رجلي بتوجع فيني، قال لي بعد شويه كل جسمك حا يوجعك بس انت اصبري، مش بتكرهيني وما عايزاني حا اوديك لابوك والله براك تجيني جارية، قولت ليهو في أحلامك انا قولت ليك لو اموت ما حا اجيك راجعة فاهم، قال لي حقو اضربك في نص راسك دا وارتكب فيك جريمة وارتاح، بس ما بتستاهلي انسجن فيك، يااخ انا اصلا متزوج لشنو، قولت ليهو اسأل روحك انت بزواج ولا بدونو بتعمل في الحرام، قال لي ما برد ليك لانو بعرف البادبك بعد شويه منو، وقفنا جنب باب البيت، قال لي مالك بقيتي تلجة كدا خوفتي صاح، قولت ليهو افتح الباب، انا ما خايفه، فتحو ودخلنا، عماد بقى يكورك :الشاذلي تعال شوف بتك المحترمة، الليله يا الشاذلي جبتها ليك طلقانه، اطلع لي، ابوي طلع وقال بخلعة:مالك يا عماد مالك وريني الحاصل شنو؟، قال ليهو بتك دي لقيت معاها حبوب منع حمل، وقالت إنها بتكرهني وبتقرف مني، يا الشاذلي انت ما عرفت تربي وعمرك ما حا تكون زول، انا غلطان اني اتزوجت بتك دي، ابوي جاء علي غضبان واداني كف، لكن ما حسيت بيه لانو وشي اتخدر من كترة الضرب،تاني قال لعماد جايبها لي لشنو كنت تقتلها هناك، قال ليه والله انا ما بنسجن بسببها هدي بتك انت حر فيها انا بعد كدا ما بربطني بيها حاجة، واعرف يا الشاذلي انو انت حا تكون منكسر دايماً كدا بسبب بناتك دي، ابوي قال لي عماااد ألزم حدك، أنت قايل نفسك شنو عشان تقول لي كدا، قال ليهو اي زول بقول ليك كدا، انا ما اول واحد، وبعدين قول لخديجة دي اني ما كنت ميت عشان اتزوجها، لولا اصرارك انت، ابوي قال ليه براك وافقت انا كلمتك بس، قال ليه انا حنيت على حالك وانت عارف ما كنت مفكر اعرس اصلا، قال ليه ابوي البشوفك يقول دافع فيها مال قارون انا زوجتك ليها بمال بسيط وشبكه ٢ *٢، قال ليه عماد دا كتير عليها زاتو، ابوي قال ليه والله انت زاتك خايب وعايب، عماد قال ليه الشاذلي اوعى تتكلم معاي كدا، ابوي خاف وقال ليه انت براك بديت، وثم ثانياً مش جبت البت، يلا اطلع من بيتي حالاً، وانا بوعدك بادبها وحا تجيك عشان تعتذر ليك، عماد عاين لي وقال والله يا الشاذلي بتك دي انا ما دايرها، واوعى تدبسني فيها تاني ، قال ليهو الشاذلي حا يقولو شنو الناس، قال ليهو ما عندي شغله بزول دي مشكلتك انت حا يقولو العيب منها اكيد، تاني طلع عماد، ابوي جراني، وفي أثناء ما هو بجر فيني جات امي من برة ومعاها سمية، انخلعت وقالت لي ابوي مالها خديجة، ابوي قال ليها طلقوها يا سكينه طلقوها وجابوها عشان تقعد لي في قلبي، بس من بكرة من بكرة يا سكينة ما حا تقعد في البيت دا موش اطلقت خليها تعرف مكان تمش ليهو،امي قالت ليهو حرام عليك يا الشاذلي البتعمل فيهو دا كلو غلط، وقت أطلقت اكيد عندها سبب، ابوي قال ليها انا شارطهن قولت ليهن انو بعد اتزوجتن ما حا تتطلقن لو شنو داك، مسك اصبعو وضغطني في جبهتي وقال بس شكلو في واحدة غبيه وما فهمتك كلامي، بس انا حا اوريها جراني ودخلني المخزن وقال لأمي لو تموت ما تفتحو ليها الباب فاهمين، امي قالت ليه خليني انضف ليها جرحها بس، قال ليه لا، قفل علي الباب وخلاني في الضلام براي.
