قال لي تعالي اشتغلي مسجلة عندي، قولت ليهو انت جاد، قال لي كل الجدية والله، قولت ليهو لشنو العرض دا اسي، قال لي عشان تنشغلي وتنسي كل مشاكلك، قولت ليهو بفكر واديك رائي.
دخلت جوة قولت لفاطمة دكتور منذر عرض علي اني اشتغل عندو، فاطمة قالت لي بلهفة طوالي وافقي هو انتي لاقية تشتغلي معاه شوفتو زاتها تفرح، قولت ليها كيف؟، قالت لي انتي غبيه وما بتفهمي منذر ما شاء الله خضرة وطول وحواجب غزيرة، وهيبه، عليك الله شوفتو ما حاجة سمحة، قولت ليها يا بت اغتشي،انا ما حصل فكرت في منذر ابدا،قالت لي لأنك كنت متزوجة بس اسي لو فكرتي فيهو ما فيها حاجة، قولت ليها والله يا فاطمة احسن ليك تسكتي، لانو لو جيتك ما بخليك، سكتت مني. مشيت لعائشة وقعدت معاها، قالت لي سرحي لي لجين دي معاك، مسكتها وبقيت اسرح ليها، قولت في نفسي لو كان عندي بت كانت أكبر من لجين بس الحمد لله على كل حال، يا ريت لو بقدر الد يا ريت لو ما كنت كدا.
_______________________________
جانب اخر تماماً:
=آخبار الحلة شنو يا مؤيد
_ اكتر خبر منتشر الايام دي طلاق بنات الشاذلي
= متين الكلام دا حصل!!! ؟
_قبل فترة يا فارس
=عائشة برضو اتطلقت؟
_اي، أنت للان مفكر فيها؟
= ما بكضب عليك، لأنك صاحبي، أنا ما قادر أنساها، انا اغتربت عشان اجي اطلب يدها، بس لقيت محمود سبقني
_ طيب وقت ما نسيتها، تعال يا فارس، خلاص كفايه اغتراب، إن شاء الله المره دي حا تكون من نصيبك
=حا اجي يا مؤيد، حا اجي كلامك صاح، انا الحلة مسخت علي مما اتزوجت عائشة، وما قدرت انزل السودان نهاي، حتى بعد إصرار امي ما قبلت، بس اسي حا اجي
_انا منتظرك يا فارس، و خالتو إنعام منتظراك.
_____________________________
جانب فاطمة
اتصل بي منذر وقال لي اول خطوة نحو النجاح عملتها، قولت ليهو فكرت والله، كدا بتقدر تقنعها، قال لي دعواتك بس ودعمك لي، قولت ليهو إن شاء الله حا ننجح، قفلت منو، جاتني مريم قالت لي تعالي يا فاطمة الفطور جاهز، جيت بعد فطرنا امي جاها اتصال وبقت تزغرد انخلعنا وقولت ليها في شنو يا أمي، قالت لي متذكرات الأراضي زمان حقات ابوي، الجرينا عشان نطلعهن، اختي سعاد قالت لي طلعن، وعن قريب حا يوزعوهن علينا، حمدنا ربنا، وقعدنا، قولت في نفسي الأمور بدت تتصلح، بس ابوي للان ما في عندو خبر، تاني قولت احسن يااخ ابوي غير وجع الراس بجيب شنو لينا، فجاءة كدا جاني اتصال من مهند، قلبي بدأ يدق دق شديد، قولت ليهو عايز شنو يا مهند، قال لي قالو ما جيتي الجامعة، قولت ليهو اي حا استمر في البيت، قال لي بس الدكاترة وال... قاطعتو وقولت ليهو كلمت الدكتور بتاع المادة بظروفي ووافق، قال لي تمام براحتك، قفلت في وشو وقولت غريب الإنسان دا.
