قلوب بينها برزخ

ج٤

 
دخلت عمتي ويا الالم والبكاء 
وهي ادردم  متفاجئه  (هاي حوبتي خلي اروح اخابر على رجلج يجي بشوفج )
بقدر الالم الي حسيت بي تفاحئت من برودها وجحود قلبها وعدم انسانيتها وهي شايفتني متألمه  ومو كادره اتحرك تحسست جانب راسي واني احس بشي يسيل
انتبهت اكو دم باصابعي والم بظهري  شويه واجتني
_ هاي بعدج ما تحركتي
_ حاولت تساعدني عطت صحت ما اكدر اتحرك هنا عرفت ايدي مكسوره
_  لحظات وسمعت صوت عالي وركضه
لحظات وصار ثمين كدامي
_ شبيج ابويه انت
_ راد يرفعني من شفته لا اراديا بديت انوح من الالم وكانه حسيت بالامان
وبس هو الي حيحس بألمي
نبهته ايدي ما اكدر  احركها والم بظهري ونزف راسي
بعد اكثر من نص ساعة من بدا الدكتور يخيط راسي حسيت بألم فضيع
بديت أتألم بصوت مسموع هو جان مفكر دا أتألم من قطب الراس خجلت
أتألم بصوت مسموع جريت ثمين من قميصه وهمست له بألم ودموعي تنزل
بضعف وتعب وحياء
_ثمين دا احس بألم ببطني وظهري شوفلي دكتوره نسائيه
حسيته انهار وهو يحجي ويا لدكتور بين محتاجه دكتوره نسائيه لان حامل وبين ايدي محتاجه تجبير 
مر الوقت الى ان صحيت وهو بجانبي بالغرفه وامي ومي وابويه
جان الالم محتمل بديت اصحى حسيت ثقل براسي تحرك يساعدني  ويسألني
_ابويه انت بيج شي  ديري بالج ايدج مجبريها انتبهي لا تحركيها
_ ثمين عطشانه
_ شربتني مي هي وامي وهو فوگ راسهم
تذكرت الطفل
_ الطفل صار عليه شي
_ ماما حبيبتي هو موجود بس الوكعه اثرت على ثبات الحمل وعندج نزف يعني
الله اذا كاتب يبقى يبقى واذا لا الله يعوضج المهم سلامتج كولي الحمد لله والشكر على كل حال الله دفع البلاء على الي صار
شلون وكعتي فهميني
_ عمه هسه خليها ترتاح بعدين من تكدر تحجي عود تسولفلنا 
_ هنا حسيت بالخوف وارتاحيت ان ثمين  غلق  الموضوع حتى اكدر افكر
شنو احجي وشنو اقرر  للحظه نسيت قلقي على فقدان الطفل والي صارلي من
راس هالسلام ياربي انت دليني شنو احجي وشنو اگول بقيت متمدده واسمعهم
يسولفون بصوت ناصي
بعدها بقى ثمين وامي ويايه كضيتها نايمه من المسكنات  للفجر حسيت بألم
وتقلصات  مؤلمه للحد الي تحس شي دينتزع  من ظهرك وبطنك صحت ثمين
حموت من الالم صحى هو وامي مخضوصين بين ما بدت امي تحاول تهون عليه وبين ما هو طلع يطلب المساعده
حسيت اجهضت بعد الم وبكاء وشعور كأنه
انتزعت  احشاءك 
للظهر بعد ان انتهى الحمل وتمت اجراءات الاجهاض
دخلت الدكتوره تطمئن على حالتي  وهي دتواسيني وتنصحني ان اذا افكر بطفل يفضل  بعد ٦ شهور او سنه مراعاة لعمري هنا سرحت مقهوره على الطفل الي فقدته
عرفت ألم الطلق والولاده شكد صعب وشكد هالطفل لمن ينولد الام تعاني وحالتها تكون بين الحياة والموت بلحظات
فقت من سرحاني لمن سمعت ثمين يسأل الدكتوره  شوكت اكدر اطلع من المستشفى
وهي تجاوبه
_ تكدرون اليوم العصر او باجر انت براحتك هي بس عندها ابره ومغذي شوكت ما تخلصهم تكدر تطلع وعندك رقمي  تجيني بعد اسبوع باذن الله
ان شاء الله
_ امي طلبت منه ان اطلع يمهم حتى يداروني حسيت بي خجل
_ لا عمه اني موجود اداريها 
_ عمه هسه هي مناعتها كلش ضعيفه والتمت عليها لازم اني يمها هي حالها حال النفسه حاليا انت متعرف اداريها اني وخواتها يمها هي هم ترتاح يمنا
انت قريب تحب تبات يمنا كل الهلا ع تروح وباي وقت تمرلها  هم كل الهلا (ببيتكم وله بيت ابوها واحد بيتك وبيتها كلنا اهل )
_ هي شتريد اني حاضر
_ ثموني اروح لبيت اهلي انت هم وراك شغل خو ما تگابلتي وتكعد وثانيا اني ايدي مكسوره لا اكدر اداريك ولا اساعد اهل البيت على الاقل انت خاله تهتم بيك هالفتره بين ما تتحسن حالتي
فهم قصدي ما اريد امه تنزعج وتمنن عليه اذا بقيت يمهم لازم هي تحير بيه وبي بالخصوص من تذكرت حجايتها وموقفها ويايه
حسيت بي مو مرتاح لكن بنفس الوقت ما حب يضغط عليه  بعد ما انتهى العلاج
طلعنا من المستشفى وصلنا لبيت اهلي
نزلت امي وهو التف يسندني حتى يساعدني انزل
_ ترى اني خليتج براحتج بس هن كم يوم واجي عليج ارجعج ويايه 
_ الله كريم
دخلنا لكيت ابويه ناصب سرير بالهول الي
تلگاني قلق وهو ياخذ ايدي من ثمين ويسندني لحد  ما وصلني  للسرير
التموا كلهم داير مدايري حتى يساعدوني اتمدد شفت نظره قهر وقلق بعين ثمين ما عرفت افسرها
بقى بالي يمه برغم تصرف طبيعي ويايه وغطاني وسألني اذا حاسه بتعب او ألم
اول ما جاوبته لا سلامتك
ترخص
_اني لعد اترخص
_دبقى عمة نتعشى سويه
- لا والله اعذريني تعبان ومحتاج اسبح واغير ملابسي ان شاء الله باجر امرلكم
واذا تحتاجوني بس اتصلوا دقايق اني يمكم
يله مع السلامه
_ قلقت اكثر من شفته تعجل بأمره وطلع متضايق حتى بعد ما التفت يسلم عليه
بعدها طلع ابويه يوصله وامي  التهت بالمطبخ بقت يمي مي
الي سألتني
_ بيج شي
_ لا سلامتج بس حسيت ثمين بي شي  ما ادري انقهر لان اجيت يمكم
وما وثقت بي يكدر يداريني
ما اعرف مي هو قبل  ما نطلع من المستشفى طبيعي وراها  انقلب حاله
ما ادري انقهر من كلام امي حسها اقصد عندهم مراح ارتاح وامه مراح ادرايني
خصوصا هي ما اجتي للمستشفى  ويانا بس ثمين وامي  وعمي هي سوت نفسها
هبطت
_ طبعا تهبط على الي صار بيج
_ مي عمتي ممثله لا شفت ولا راح اشوف وحده مثلها ما ادري شلون عندها هيج قلب قوي
تدرين من وكعت واني بهالحال متكسره رد فعلها خلاني اكول هاي طلعت للحديقه  رجعت كعدت
الله يسامحها اول ما دخلت كلتلي هاي حوبتي طلعت بيكم  وراحت اتصلت بثمين يعني ولا كأنه بشر كدامها دينزف ولا فكرت اني مرت ابنها وحامل مثل
بأبنهم
لج جانت تجدح نار علمود اجوي يخطبوج للهيب
_ اختي هاي المره مو صاحيه والله مريضه ومتخاف الله  ذولي ولدها شلون ما طالعين عليها
اخاف لان گلتيله هيج امك حجت انزعج
_ لا ما حجيت لاحد عن كلامها ولا حتى لامي بس انت تدرين وما اريد احد يعرف نهائيا
_ بس هم من طلعوا من عدنا وامي بين ما لبست وطلعت لگت ثمين وعمي تاركيها تالي اجتكم هي ولهيب من الباب عرفوا اخذوج للمستشفى
من وصلوا هي مسولفه لعمي عود انت وياها غسلتوا الكراج وهي ما قبلت تخليج تكملي وتالي انت لحيتي تنزلين الملابس من السطح وشايفتج نازله اول مره ما ادري شنو ماخذه ورجعتي صعدتي وهي بالحديقه شايفتج تأخرتي دخلت للبيت سمعت صوتج ركضت عليج وانت گايلتلها عثرت بسله الملابس وهي باقيه
من الهبطه تگلك متكليلي شصعدج للسطح ومنو عتب عليج تلمين الملابس
تحركت من مكاني باتجاه التلفون
يا نسيت هوبي گلي اتصل عليه من تجيكم ميامي يريد
يحجي وياج
رنيت ٣ مرات وعلقته ثواني  رن التلفًون رفعته
الو
همس سريع بصوت واطي
_ مي مراح اكدر احجي وياج جو البيت عندنا محترگ
مع السلامه
_الو الو
_ ها وين راح
_ لا يمه جماعه بس كال الو وسمعني اكو صوت يمه وغلق الخط
خلي اروح اشوف امي اذا تحتاج مساعده وارجعلج
طلعت من الغرفه ما ردت يبين على وجهي شي وتقلق ميامي  هي من الاصل قلقانه على وضع ثمين دخلت سألت امي شنو اساعدها التهيت وياها
_ ميامي بقيت وحدي افكر بكلام عمتي الي متبليته عليه وهو كذب وبلحظتها قررت لازم احجي الي صار لثمين

مو تكتبولي البارت صغير
هيج حكمل وياكم لان اني كاتبه مسودات واعدل عليها وهذا ياخذ وقت مني
وعندي مدارس فحتى لا اقطع وما اوفي بالوعد كل ما ارتب بارت انزله
وبنفس الوقت ترى ما باقي كثير لنهايه الروايه