أنت ما أريد

8

احمد رجع البيت متأخر شديد وزي م اتوقع لقى ابوهو قاعد في الصالة ..

قفل الباب الداخلي ومشى على ابوهو وقبل يتكلم ابوهو قال بسخرية : حمد لله على السلامة يا دكتور

احمد رد ببرود : حمد لله على سلامتكم

واتلفت عشان يطلع غرفتو ، اول م اتحرك وقف بسبب يد ابوهو اللي مسكت معصمو ، احمد عاين ليدو وبعدها عاين لابوهو تاني وابوهو قال بحدة : اسمع هنا انا م عايز معاك اي كلام كتير وقلة ادب فارغة

احمد كتف يدينو بعد م سحب معصمو من ابوهو وقال بنفس البرود : ومنو اللي بكتِر كلام اسي ؟

محمد ضغط على يدو بغيظ شديد وقال ليهو : احمد احسن تحترم نفسك وتعدل اسلوبك معاي

احمد سكت وبعدها اتنهد ولفّ عشان يطلع غرفتو واول م وصل السلم وقف بصوت ابوهو وهو بقول ليهو : انا جيت هنا عشان حاجة مُعينة وم ح امشي قبل م احقق الحاجة دي

احمد رد بسخرية : طيب الله يوفقك فيها

طلع السلم ومحمد فِضِل قاعد وهو بغلي من الغيظ بسبب برود احمد ..

احمد دخل غرفتو وقفل الباب وبعدها اتنهد بضيق شديد ، دخل الحمام اخد شاور وبعدها لبس ملابس مريحة ورقد في السرير غمض عيونو وهو مستعد للنوم بس بعدها حسّ بتأنيب الضمير لانو م مشى لامو ، وقف وطلع من غرفتو وبعدها اخد طريقو لشقة امو وابوهو وجنى ..

وصل ودقّ الباب بخفة ثواني والباب فتح وكشَف عن ابوهو اللي اول م شافو قبَل منو وخلا ليهو الباب فاتح ، احمد كشّر وكان داير يرجع بس اول م لفّ وقف بصوت امو وهي بتقول : احمد حبيبي

احمد التفت على امو وابتسم ليها وهي جات وحضنتو وهو بادلها الحضن وقال ليها : حمد لله على السلامة

بعدت منو وقالت ليها : الله يسلمك يا قلبي ، تعال ادخل

احمد كان عايز يرفض بس امو سحبتو من يدو بسرعة ودخلتو وقفلت الباب ، قعد في الصالة متوسطة الحجم وامو مشت على المطبخ الانجليزي اللي فاتح على الصالة وهي بتتكلم معاهو : اها شغلك كيف ؟ واخبارك شنو

- الحمد لله كلو تمام ، انتو كيفكم ؟

- الحمد لله تمام بشوفتك كمان

احمد ابتسم وهي جات طالعة من المطبخ وشايلة كاستين فيهم عصير ادت احمد واحدة واخدت واحدة وبقت تتونس معاهو ، ثواني وجاتهم جنى طالعة من غرفتها ، سلمت على احمد بزعل وقعدت في الكرسي .. احمد ابتسم ومشى عليها وبقا بدغدغ فيها وهو بقول ليها : جنونة المجنونة خلاص معليش

جنى بقت تضحك وقالت ليهو : زح مني وم تتكلم معاي

- افاا ، انا احمد اخوك الحلو الوسيم اللي كل صحباتك بحبوهو