أنت ما أريد

21

مرّ يوم الخطوبة بسلام على الجميع وتاني يوم وتين كانت في الجامعة احمد اتصل عليها

- وتيني

- يا عيوني

- خلصتي صح ؟

- يس طالعين انا وسيدرا على البيت

- طيب انا جاي عليك عايز اسوقك مشوار وبعدها نمشي العيادة مرة واحدة

- امممم طيب اوكي ، نتلاقى برا ولا انتظر ؟

- انتظريني انا قربت عليك اصلاً

- طيب اوكي باي

قفلت من احمد وبعدها كلمت سيدرا وطلبت منها تمشي وهي ح تنتظر احمد ، سيدرا ودعتها وبعدها طلعت مشت ووتين اتصلت على امها كلمتها ، وبعدها قعدت انتظرت احمد مرّت اكتر من نص ساعة واحمد م جا بس اتصل عليها فجأة ..

- وتين في حادث في شارع * وقافلين الطريق وجوطة وزحمة وكلام كتير شديد ، شكلي ح اتأخر عليك شوية آسف

- الموضوع ايزي ماف داعي للاسف ، اصلاً انا في الجامعة م في الشارع

- آسف جدجد ، بحاول اطلع من الزحمة دي واشوف طريق تاني

- احمد ياخ م تتأسف مرة تانية وبعدين خليك في مكانك دقايق والشارع ح يفتح ان شاء الله

- المهم بشوف طريقة ، خلي بالك لغاية م احصلك تمام ؟

- طيب حاضر

قفلت من احمد وبقت قاعدة بملل ، قررت تطلع من الجامعة وتمشي الكافيه القريب وفعلاً طلعت ومشت على الكافيه طلبت كباية نسكافيه وبقت قاعدة منتظرة ، فجأة علت نغمة تلفونها وكان رقم غريب ، الرقم ليهو حكاية تلاتة ايام بتصل وهي م بترد وكالعادة م ردت بس رجع يتصل مرة تانية اتأففت بضيق وشالت التلفون وردت

- الو ؟

- اخيـراً

عقدت حواجبها وقالت : منو ؟

ردّ بضحكة هازئة : تؤ تؤ تؤ خمسة سنوات بس ونسيتي صوتي يا قلبـي ؟ محتاج ارجع اذكرك جدجد

قفلت الخط بسرعة وتنفسها ضاق بقت بتشهق وبتحاول تاخد نفس في ناس انتبهوا عليها وجو وبقوا يسألوها بس فجأة اتقدم واحد وقال ليهم : يا جماعة البت دي واضح بتمر بنوبة هلع عليكم الله اتحركوا من هنا وادوها طريقة تتنفس بيها

فعلاً الناس اتفرقت وفي بت كانت ماسكة وتين وبتطلب منها تتنفس بَرّاحة و ببطىء دقايق بسيطة و وتين بدت تستعيد طريقة تنفسها الطبيعية ، جا الويتر ومدّ ليها كاسة موية شالتها وشربتها والبت قالت ليها : حاسّة بتحسُن ؟

وتين هزّت راسها بالايجاب وهي حاسة بأنو الصداع ح يكسر راسها وقفت من الكرسي بس حسّت بانو الدنيا بتدور من حولها حاولت تستند على اي شي بس كل الحاجات كانت بتتحرك في نظرها لحظات وغمضت عيونها للظلام الحاوطها من كل مكان ..