أنت ما أريد

41

بعد فترة طويلة جَمعَتهم خلصت على خير من غير م جنّات ومريم ينكدوا على وتين او سيدرا ، وتين واحمد اتحركوا على شقتهم وعبدالرحمن وسيدرا طلعوا شقتهم الموجودة في الطابق الثالث ..

فتح الانوار وعيونها اتوسعت باعجاب وقالت : ما شاء الله حلوة شديد يا عبدالرحمن

ردّ بابتسامة : ذوقك يا حلوة

- م اتوقعت انهم ممكن يظبطوها كدا ما شاء الله

- ارَح ادخلي شوفي الباقي

دخلت على الشقة وكانت نفس م طلبتها بالضبط ، دخلت على غرفتهم وكانت بلون رمادي فاتح ..
- دي بيرفكت ياخ

- تعالي نجرب السرير

عاينت ليهو بصدمة وقالت : عبدالرحمن

- قصدي ننوم ، انتي فهمتي شنو ؟

عاينت لملامحو الماكرة وقالت ليهو : ماشة انوم مع جنى

ضحك وبعدها قال : نشوف كان قدرتي تطلعي برا الغرفة دي

عاينت ليهو ثواني ورجعت خطوة صغيرة لورا قبل تلف وتجري على الباب ، بس هو كان اسرع منها لمن مسكها من خصرها وهي صرخت ..
- ماف طلعة يا سمرائي

- طيب خلاص اوكي .. بس فكني

حسّت بيدو وهي بترتخي من خصرها لحدي م بعّدها كلو كلو ، وهي ابتسمت بشقاوة وتاني مشت على الباب بسرعة وبرضو مسكها والمرة دي رفعها في كتفو وقال : قلت شنو انا ؟

ضحكت وقالت : عبدالرحمن خلاص

رماها على السرير وهي شهقت بصوت عالي وقالت : يا حيوان

عاين ليها بدهشة وقال : مالك ؟

- ليه بتجدعني كدا ؟ اسي لو انا حامل ؟

- كيف كيف ؟

عضت على شفتها عشان تكتم ضحكتها وقالت ليهو : عبدالرحمن زِح مني

قرّب وقال : لو ابيت ؟

- ح اصرّخ الم عليك ناس البيت

- صرخي براحتك حبيبي ، باب الشقة عازِل

- ليه ؟ اسي لو يوم دخل لينا حرامي الناس م تعرفنا ؟

- انا م مالي عينك ولا شنو ؟ وبعدين الحرامي بجي تحت اول ولا فوق اول ؟

ردت بضحكة : م عارفة

- اوكي انا بعرّفك

ضحكت وقالت : والله اصرخ

- صرخي .. بس باسمي

قالت بصدمة : عبدالرحمن !!

- لا م كدا ... اقيفي اسي بوريك ..

•>•>•>•>•>•>•>•>•>•>

- بليز بيبي بليز

- عايزاني ارقص معاك يا وتين ؟

- اي يا احمد عليك الله

- عايزاني ارقص معاك ترند تيك توك ؟

بوَزَت وقالت : انت م بتحبني ؟

ردّ باستنكار : الرقيص بقا مقياس للحب ولا شنو ؟

- احمد بليز ، الناس كلهم عملوهو مع ناسهم الا انا

- وانتي ان شاء الله عايزة تنشري ؟

ردت بابتسامة : ح اختو في حساب الاسبام حق الانستا ، بليز ياخ

- ذكريني الاولاد الفي الاسبام ؟

- انت و وائل و اياد

- احذفي اياد وح اخليك تختيهو

اتأففت وقالت : احمد ياخ

- خلاص خلاص ... دقيقة انتي منو القال ليك انا بعرف ارقص اصلاً ؟

ابتسمت ابتسامة واسعة وقالت : جنى

حرّك راسو بتفهُم وقال : ان شاء الله موتها على يدي

- م كنت عايزني اعرف الحاجات دي عنك ؟

حسّ بالخطر من كلامها وابتسم وقال : لا طبعاً م كدا بس كنت عايز اقولهم ليك انا بطريقتي وكدا

ضحكت على كلامو وقالت : طيب عاين عندك البنطلون الزيتي صح ؟ والتيشيرت الابيض

- اها

- البسهم هم وانا ح البس زيك

اتنهد باستسلام ودخل غرفة الملابس وبعد ثواني طلع وهو لابسهم ، ابتسمت ليهو وبعدها دخلت هي برضو وبعد ثواني طلعت وهي لابسة نفس البنطلون بتاعو تقريباً ومعاهو تيشيرت باكمام كت قصير لنص البطن بس واسع ..

- م ممكن طبعاً

- اها يا احمد

- عايزة ترقصي اوكي وبطنك برا اوكي ، لكن م ح تنزليهو

- احمد احمد ، واي انا قبلت اعرسك ليه ؟

- عشان بتحبيني طبعاً

قلَدتو بغيظ وبعدها قالت : سغيل ياخ

ضحك وقال : ارح يلا ، بس وريني ليهو تاني عشان احفظ الحركات

فتحت تلفونها وقالت : هي ساهلة .. المهم عاين يلا

بعد ثواني وقفت وجمبها وقف احمد وقالت ليهو : يلا ح اشغلها

- طيب

شغّلت الاغنية وبدت ترقص ، بس التفت لاحمد ولقتو بعاين ليها ساي وقّفت الاغنية وقالت ليهو
- احمد م تعاين لَي ، اعمل معاي

- اا ؟

- احمد

رمش وبعدها قال باستدراك : اي اها

- ركّز يا بابا

- طيب ، اها افتحي

شغّلتها مرة تانية وهو بدا معاها بس لمن بدت تحرّك خصرها وقف وبقا بعاين ليها ، لفّت عليهو وقالت
- احمد والله م ممكن

حرّك شعرو بيدو وبعدها قال : ياخ

سكتت ثواني وبعدها قالت : طيب خلاص ح اقيف انا وراك ، م تعاين لَي

- لا خليك في مكانك .. ابدي

بدتها مرة تانية والمرة دي خلّصها معاها للنهاية ، شالت تلفونها بحماس وهي بتعاين للفيد الصوروهو ، احمد قعد في طرف السرير وهو بعاين لحماسها ..

ختت التلفون وقرّبت منو وقعدت في رجلو وبعدها حاوطت عنقو وقالت : حلو شديد انت ، خايفة اخُت الفيد يسحروك لَي

ضحك وقال : طيب م تختيهو

عقدت حواجبها وهي بتعاين ليهو وهو قال : مالِك ؟

- مفروض تقول لَي انتي احلى وكلام زي دا يا بابا

ضحكتو علت مرة تانية وبعدها مدّ يدو وقرص خدها وقال : دي حقيقة مفروغ منها يا برنسيسا

ابتسمت وقالت : عايزة اعضيك

رفع حواجبو باستفهام وقال : اا ؟

ابتسامتها اتوسعت : عايزة اعضيك

- امممم لو م خليتك تعضيني معناها انا م بحبك وم بهتمّ لامرك صح ؟

حركت راسها بالايجاب وقالت : ايوة حبيبي صح

اتنهد وبعدها قرّب خدو منها وقال : براحة بس

ابتسمت ومسكت وجهو وعضّت خدو بقوة وبعدها بعدت ومسحت عليهو بيدها ، احمد عاين ليها ثواني وقال : دوري يلا

- اكيد م ح تعضيني

- منو قال ؟

- احمد

- روح احمد

حاولت تقيف من مكانها بس ثبتها بقوة وقال : تؤ تؤ ماف طريقة يا حلوة ..

•>•>•>•>•>•>•>•>•>•>

...
- خلصتي ؟

- دقيقة

بعد ثواني طلعت ومدّت ليهو عِقد وقالت : لبسني دا

رفع راسو وعاين ليها ، حدّق فيها باعجاب م قدر يخفيهو : ما شاء الله

ابتسمت وغمازاتها بانَت ، وقف من مكانو وشال منها العِقد وهي واجهتو بظهرها قرّب منها وحاوط بيهو رقبتها ولبّسو ليها ، قبل تبعِد مسك خصرها ودفن راسو في رقبتها وهو بستنشق عبيرها وريحة شعرها الحلوة ..

مسكت يدو وقالت : control your self (تحكم في نفسك) بليز م عايزين حاجة ويرد عشان رقبتي ح تكون برا

ضحك وهي حست بالدغدغة بسبب شفاهو اللي كانت بتتحرك في عنقها : غطيها بالفاونديشن

- عبدالرحمن

طبع قبلة رقيقة على عنقها وبعدها بعّد منها وقال : انتهيتي ؟

لفّت عليهو وقالت : ايوة ... ايش رايك ؟

ردّ بابتسامة : بيرفكت والله

ابتسمت ليهو وبعدها وقفت قدام المراية وهي بتتأمَل اللوك اللي اختارتو للعزومة اللي كانوا عاملنها ليلى ونهى على شرفها هي و وتين .. توب ناعم بلون ترابي وفيهو سباركلز رقيقة بنفس اللون ولون ذهبي ولون بني فاتح وصندل عالي بنفس لون التوب ، عملت ميك اب سيمبل بنفس الوان التوب ، شعرها البني الطويل اللي فيهو خصل بلون بني فاتح كان مسدول على طولو بس ماسكة خصلتين من الامام ومرجعاهم على ورا ، اساور ذهبية في يدها اليسار مع دبلة زواجها وفي اليد اليمين " غويشة " كبيرة بخاتمها وحلق كبير في اذنها تبع العقد في عنقها والاسورة الكبيرة في يدها اليمين واخيراً حلق رينق ذهبي رقيق ضاغط على انفها ..

عبدالرحمن : اقيفي ، هل قريتي على نفسك ؟

- لا لسة ، تعال احصنّك واتحصن برضو

وقفت جمبو وبعدها بدت تقرا الاذكار بصوت خفيض عليها وعليهو ، بعد خلصت ابتسمت وقالت : تصدّق كنت بحلم باللحظة دي طول حياتي ، اني احصّن راجلي وكدا

قبّل كف يدها وقال بابتسامة : الحمد لله طيب .. الحمد لله انك حققتيها والحمد لله انو كنت انا

- احم المهم وريني بنات اهلك البحبوك

- بسم الله ، ليه ؟

- ساي بس

- م عارف والله ، م حصل في واحدة قالت لي حاجة

- اوكي خلاص م مشكلة .. انا ح انزل

رد بضحكة : سيدرا عايزة تعملي شنو ؟

عاينت ليهو وردت ببراءة : ولا شي

ضحك تاني وقال : م مشكلة اخدي راحتك والبضربك مرة اضربيهو عشرة

عضت على شفتها وهي بتحاول تكتم ضحكتها بس م قدرت وفلتت منها : واي يا عبدالرحمن والله انت عسل

ابتسم ليها وهي قالت : انا ح انزِل بعد دا

قرّب وحضنها وقال : م تمشي ياخ

ردت بضحكة : بس كدا م صاح

شدّ عليها وقال : م ضروري تمشي

قبل هي ترد قاطعهم صوت الباب اللي ضرَب وبعدها فتح و وصلهم صوت جنى
- الناس منتظرين يا زوجة عمو الجميلة

عبدالرحمن فكاها وهو بتأفف وهي ضحكت وطلعوا لجنى وعبدالرحمن قال : اني اسكن في الشقة دي كان اسوأ قرار اتخذتو

جنى ضحكت وقالت : الناس قاعدة منتظرة
حوّلت بصرها لسيدرا وقالت : صراحة واو بمعنى كلمة واو

عبدالرحمن : قولي ما شاء الله

سيدرا ضحكت وجنى قالت : ما شاء الله م تزعل .. يلا ننزل

سيدرا : يلا

جنى مشت قدامها وهي لوّحت لعبدالرحمن باصابعها وبعدها طلعت ورا جنى ..

سيدرا : وتين لسة م جات صح ؟

جنى : اي ، لكن ناس امك وصلوا

- في ناس كتار ؟

- يعني .. م ضروري تعرفيهم اصلاً ، نانا بتعرفك عليهم لكن

- اوكي خير ..

•>•>•>•>•>•>•>•>•>•>

- خلاص بدينا

- م تقولي لَي بدينا

- احمد ديل جُوا كلهم نسوان فيها شنو لو م لبست طرحة ؟

- انا م عندي مشكلة مع النسوان ، بس من هنا لحدي م تدخلي البسيها

ردت باستعجاب : احمد هي خطوتين من باب الحديقة لباب البيت جوا وزي م انا عارفة صالون الرجال اصلاً م بجاي

عاين ليها ثواني وبعدها قال : ااا اي صاح ، خلاص انزلي ، لا دقيقة لو في واحد منهم طلع ؟

- لا اله الا الله محمد رسول الله ، احمد انت جاي من ياتو قرن ؟

- 21 قبل الميلاد

- واضح صراحة ، المهم انا ح انزل

- اصبري انزل انا اول
نزل من العربية وجا بعند الباب بتاعها و فتحو ليها ومدّ ليها يدو ، مسكت يدو ونزلت وهو اتأملها وبعدها قال بابتسامة اعجاب : والله انا متزوج ملكة جمال

وتين ضحكت على انفصامو اللي اتعودت عليهو وقالت : ثانكيو بيبي

كانت لابسة قفطان مغربي بلون اخضر غامق وفيهو من الذهبي ، ضيق بجُوا ومن برا في زي الكيمون بس مكبوس مع الفستان من جوا ، من الوسط في حزام ذهبي ضاغط على خصرها ، كان طويل باكمام طويلة بس فيهو فتحة في النص من تحت واصلة لحدي نص الساق وكاشفة عن رجلها اللي كانت لابسة فيها صندل عالي بلون ذهبي ، شعرها الاسود كان مموج وعلى طولو وكانت لابسة سلسلة ذهبية باشكال بسيطة محاوطة جبينها وشعرها من ورا وطالعة معاها حلوة شديد ...

- لو في زول عمل ليك اي حركة بس وريني

- ح اقدر ادافع عن نفسي

- م مشكلة انتي دافعي وانا بجي بدافع برضو

ضحكت وقالت : خلاص يلا باي

- باي ، لوف يو

- لوف يو تو بيبي

دخلت على البيت ولحسن حظها اول زول قابلتو غفران اللي سلّمت عليها وبعدها دخّلتها وعرّفتها على النسوان الموجودين ..

بعد م خلّصت سلام قعدت جمب سيدرا وجنى وريان وهي بتتونس معاهم ...

- سيدرا

سيدرا عاينت لعمة عبدالرحمن اللي ندهت عليها وردت ليها بابتسامة : هلا

- اها مافي شي في الطريق ؟

جنى : بسم الله هم متين عرسوا اصلاً ؟

- مرّت عليهم فترة كافية عشان تحمَل فيها

حاولت تحافظ على ابتسامتها وقالت : ربنا لسة م كتب لينا

- سمح سريع سريع جيبوا ليكم شافع العمر بمشي

- الله كريم

حوّلت بصرها لوتين وقالت : وانتي يا مرة احمد ؟

ردت بابتسامة : انا مركبة شريحة

ردت بصدمة : شريحة شنو كمان ؟

قالت بكل بساطة : منع حمل

- ولشنو يعني ؟

- عايزة اقرا

- والعرس ليك شنو وانتي م كملتي قرايتك ؟

ردت بنفس الابتسامة : قسمتي

عاينت ليها من فوق لتحت وبعدها رجعت تتونس مع المرة الجمبها ... جنى همست لوتين
- صحي مركبة شريحة ؟

ردت بنفس الهمس : لا

ريان : اجي وليه قلتي ليها كدا ؟

- احمد قال لي لو في اي زول سألك قولي ليهو مركبة شريحة

- احمد فظيع

جنى : عارف اهلو لسانهم طويل ، م شفتيها سكتت منك طوالي
عاينت لسيدرا وقالت : انتي زاتك قولي كدا

سيدرا ضحكت وبعدها قالت ليها : ان شاء الله ..

•>•>•>•>•>•>•>•>•>•>

...
مرّ الوقت والناس بدت تمشي ، وتين مشت على المغاسل وبعد غسّلت يدها لفّت عشان ترجع بس لقت مريم في وجهها ..

مريم : هاي

- هاي

- كويسة ؟

- الحمد لله تمام

ابتسمت ليها وبعدها اتحركت من جمبها و وتين بقت تعاين ليها بصدمة بس بعدها ضحكت ورجعت مكانها تاني ..

آخر من طلع كان شذى وهند وريان ، فضلت وتين قاعدة ومعاها جنى وسيدرا وغفران وجنات وليلى ونهى ...

جنات عاينت لوتين وقالت ليها : الشريحة لشنو يا عروس ؟

وتين عاينت ليها ثواني وبعدها ردت : الزمن قدامنا الحمد لله

- والله الزمن م معروف ، احسن تجيبوا من اسي

- ان شاء الله

كانت عايزة تتكلم مرة تانية بس قاطعتها جنى اللي قالت لوتين : تعالي معاي المطبخ

وتين وقفت ومشت ومعاها ، ليلى عاينت لجنات وقالت : مالك ومالهم انتي ؟

ردت : كيف يعني مالي ومالهم ؟ دا اخوي ولا م اخوي ؟

- اخوك راجل كبير وعارف نفسو بعمل في شنو ، م تدخلي بين البصلة وقشرتها

- احتمال عاقِر اسي

ردت امها بحدة : برضو م دخلك بيهم فهمتي

سيدرا : عاقر ولا لأ صراحة دا م موضوع بخصّك ، الحاجة دي بينهم هم الاتنين و يجيبوا البيبي بتاعهم متين دي برضو حاجة بتخصهم هم ف ماف داعي انتي تتعبي نفسك وتدخلي

رفعت حاجب وقالت : انتي اسي الدخّلك شنو ؟

غفران : في شنو يا جنات ؟

سيدرا : للاسف طريقة كلامك وتحشرك اجبرتني اتدخل

جنات : عايني م هو انا م اتكلمت معاك ولا جبت سيرتك انتي ، انا بتكلم عن اخوي

- واخوك زي م قالت ماما ليلى عارف نفسو بعمل في شنو ، وعارف التوقيت المناسب اللي عايز يجيب فيهو طفل ف حقيقة ماف داعي تدخلي

- انتـ...

قاطعتها ليلى وقالت : عايني خلاص ، قفلي الموضوع دا

عقدت حواجبها و وقفت من مكانها ومشت منهم ، سيدرا عاينت ليهم وقالت : معليش عشان اتدخلت بس طريقة كلامها بجد نرفزتني

نهى : م قلتي حاجة غلط يا حبيبة ، م تعتذري

غفران : والله انا المفروض اعتذر على كلامها

ردت بابتسامة : ماف داعي يا خالتو ، في النهاية نحن زي الاخوات ولابد من نقاشات زي دي

ليلى : الله يكمِلِك بعقلك يا بتي

سيدرا ابتسمت وصلّحت التوب في راسها كويس وغطت شعرها لمن سمعت صوت طرق على الباب وبعدها صوت احمد وهو بسلّم ..

ليلى : اتفضل حبيبي

دخل وسلّم على الموجودين ، ثواني و وتين وجنى طلعوا من المطبخ وبعدها بدقايق بسيطة عبدالرحمن جا وقعدوا كلهم سوا اتونسوا شوية وبعدها احمد و وتين استأذنوا عشان يرجعوا شقتهم ، وكمان عبدالرحمن وسيدرا طلعوا لشقتهم ..

•>•>•>•>•>•>•>•>•>•>

مرّ شهرين من بعد جوا من شهر العسل ، وسيدرا و وتين نزلوا المستشفى عشان الامتياز ..

سيدرا كانت في المستشفى بس كانت حاسة بتعب ليهو كم يوم ملازمها ، وبسبب الدوخة والغثيان اللي عندها طوالي افترضت انها ممكن تكون حامِل ..

وتين جاتها في الاستراحة وقالت : سيدرا مالك انتي ؟

ردت بارهاق : تعبانة شديد

- حاسة بشنو ؟

- ارهاق و دوخة وبرجّع برضو

وسّعت عيونها وقالت : طيب ممكن تكوني حامل

- انا زاتي افترضت كدا

- قومي اتأكدي طيب ، نحن اصلاً في المستشفى

وقفت من مكانها و وتين مشت معاها للمختبر ، عملت تحليل الدم وطلبوا منها تنتظر ، وتين طلعتها مكتب الدكتورة وقالت ليها : خليك مرتاحة ، انا بجيبها ليك ..

وتين مشت تابعت شغلها بعد كلمت الدكتورة انو سيدرا شوية تعبانة ، وبعد فترة من الزمن مشت المختبر ولقت نتيجة سيدرا جاهزة ، شالتها بسرعة وفتحتها ؛ كتمت صرخة فرح كانت ح تطلع منها لمن لقت النتيجة ايجابية ، بسرعة اتوجهت على المكتب اللي فيهو سيدرا ودخلت ليها ..

سيدرا لمن شافت ملامح وتين المبسوطة الدموع اتكونت في عيونها ، وتين قرّبت منها وحضنتها وهي بتقول بحماس : بوزيتيف يا سيدرا

فوراً دموعها نزلت ، وتين بعدت منها وهي بتضحك مسحت دموع سيدرا وقالت ليها : مبروك يا ماما سيدرا ، الف مبروك يا حبيبي

سيدرا ابتسمت وقالت : الله يبارك فيك عقبالك يا قلبي

وتين ردت بابتسامة : آمين

سيدرا اخدت نفس وبعدها ختت يدها في بطنها وهي بتعاين ليها وقالت : مرحب يا حبيب ماما

وتين مسحت دموع الفرح اللي اتكونت في عيونها وهي بتعاين لسيدرا بابتسامة ، بعدها ختت يدها برضو في بطن سيدرا وقالت : هاي يا قلب خالتو

سيدرا عاينت ليها وقالت : في الكم ؟

- قفلتي التاني يادوب ، حبيبي عمرو 8 اسابيع

سيدرا ابتسمت و وتين قالت ليها : ارح ارجعي البيت

- لسة الدوام

- يابت دوام شنو كمان ؟ قومي خلينا نمشي

ضحكت وقالت ليها : طيب

جات تقيف من الكرسي بس وتين مسكتها بسرعة وهي بتقول : براحة

سيدرا عاينت ليها بدهشة وقالت : يابت قولي بسم الله

- بسم الله ، ارح امسكي يدي وامشي برّاحة

ضحكت عليها ومسكت يدها و وتين بتحذّر فيها انها تمشي ببطء وم تسرِع ، لحدي م نزلوا الباركنج ..

وتين : خلي عربيتك هنا السواق بعدين يجيبها بس اسي انا بوديك البيت

سيدرا : ح اسوق بس م ح اعمل شي تاني

- لالا

- على فكرة لمن جيت بيها الصباح برضو كنت حامل

- م كنتي عارفة ، بس اسي عارفة ، ارح يلا اركبي

سيدرا ضحكت على تصرفاتها وبعدها ركبت معاها ، و وتين وصلتها البيت ..
- عايني اطلعي بالمصعد م تطلعي بالسلم

- حاضر ، اي توصية تاني ؟

- اي ، م تقعدي كتير ولو قعدتي خُتي مخدة ورا ظهرك

- وتاني ؟

- اشربي موية كتير ، وارفعي رجلينك برضو مع مستوي ظهرك

- حاضر

- وتاني م تاكلـ...

- خلاص حبيبتي ارجعي البيت جهزّي الاكل لاحمد

- خليني اتم ليك

- لالا شكراً

- م تقيفي في المطبخ كتير

- حاضر ، يلا باي

ضحكت وقالت : باي

وتين حركت العربية واتوجهت على شقتها وسيدرا دخلت البيت ، لقت ليلى ونهى قاعدين كالعادة ، سلمت عليهم وبعدها استأذنت وطلعت فوق ..

دخلت شقتها وهي في قمة الفرح ، اخدت شاور وبدلت ملابسها وشكرت ربها كتير وبعدها شالت تلفونها ورسلت مسج لعبدالرحمن
" حبيبي "

" عيوني "

" كيف الشغل ؟ "

" ماشي الحمد لله "

" عايزة اقول ليك حاجة ، انت فاضي ؟ "

" افضى لعيونك "

ابتسمت وبعدها رسلت " عبدالرحمن انت عارف انو انت نعمة ربنا اداني ليها ، انا بجد بحبك شديد لابعد درجة ممكن تتخيلها كنت مبسوطة شديد بوجودك جمبي وفي حياتي واسي فرحتي بقت دبل "

قبل يرد رسلت ليهو صورة الفحص ومعاها جُملة
" انا حامل "

اخد ثواني وردّ ليها برسالة صوتية واضح في صوتو الصدمة : سيدرا انتي جادة ؟

ابتسمت وبعدها رسلت مسج " جادة يا قلب سيدرا "

ثواني و وصلتها مسج " يا عِوض عبدالرحمن ويا روحو ويا كل حياتو "
" والله سيدرا حاسي نفسي عايز ابكي "
" انا حتى م عارف اقول ليك شنو او كيف اتصرف "
" م قادر اعبّر "

عيونها اتملت دموع وكتبت ليهو بابتسامة " ربنا يخليك لَي وم يحرمني منك "

" والله طالِع جاييك انتظريني "

" وين لسة باقي على نهاية الدوام "

" حريقة في الدوام والشغل واي شي عايز يمنعني منك حالياً "
" انا مرتي حامل ياخ البقعدني شنو ؟ "
" عايزة حاجة اجيبها ليك يا قلب عبدالرحمن ؟ "

" لا حبيبي سلامتك "

رسّل ليها بعد ثواني " سيدرا عليك الله حامل جد ولا بتهظري ؟ "

رسلت ليهو رسالة صوتية وهي بتضحك : حبيبي والله جادة ، يلا تعال سريع عشان البيبي وام البيبي منتظرك

" ياريت عندي طيارة بدل عربية "
" دقايق واكون معاك "

ختت تلفونها وهي حاسة نفسها عايزة تطير من الحماس ، مشت على المطبخ وبدت تجهّز في الاكل ..

•>•>•>•>•>•>•>•>•>•>

عبدالرحمن دخل البيت بسرعة ولقا امو وليلى قاعدين ..
قال بسرعة : سلام عليكم

نهى : وعليكم السلام ، مالك مبدّر الليلة ؟

م خلاها تكمِل جملتها واتوجه على السلم بسرعة قبل يسمع باقي كلامها ، نهى عاينت لليلى بصدمة وقالت
- مالو ؟

- بري ، ان شاء الله خير

- ان شاء الله

فتح باب الشقة بسرعة وهو بنادي على سيدرا ، طلعت ليهو من المطبخ وهي مبتسمة ابتسامة واسعة ، قرّب منها بسرعة وحضنها بقوة وهي بادلتو الحضن ..

ثواني وبعّد منها بسيط ، ختّ يدو في خدها وقال : والله العظيم انا بحبك ، والله م كلام ساي بحبك جدجد

ردت بابتسامة : وانا كمان بحبك

قبّل جبينها مسافة وهو حاسي بالدموع في عيونو ، بعّد منها وشال بوكيه الورد ومعاهو كيس هدايا ومدّاهم ليها وقال : ربنا يخليك لَي ويحفظك

- ويخليك يارب ..

•>•>•>•>•>•>•>•>•>•>

وتين وصلت شقتهم ، اخدت شاور وبدلت ملابسها ومشت على المطبخ ..

ردت على احمد اللي اتصل عليها ..
- وتيني

- عيوني

- طلعتي ولا لسة ؟

- وصلت عديل كدا

- خلاص انا جاي ، م تعملي حاجة جايب معاي اكل

- م كأنو طلعت بدري ؟

ردّ بضحكة : والله اشتقت ليك بس

ضحكت وهو قال : دقايق واكون معاك

- حاضر منتظراك

قفلت منو ودخلت المطبخ تعمل عصير وحلا مسافة يجي ..

بعد مسافة بسيطة سمعت صوت المصعد وبعدها صوت خطواتو ، قرّب منها وقال
- انا قلت ليك م تعملي شي

- بس عملت عصير

- جبت معاي

ردت بطفولية : حقي احلى

ابتسم وبعدها قرّب وقبّلها وقال : صاح

ابتسمت وشالت منو الحاجات وقالت : امشي بدّل مسافة اجهّز

- طيب

طلع على غرفتهم وهي جهزت الحاجات وبعدها دقايق نزل وقعد معاها ...

بعد فترة خلصوا اكلهم ورتبوا المكان مع بعض ، وبعدها قعدوا قدام التلفزيون مع الحلا والعصير ..

وتين : سيدرا حامل

عاين ليها بدهشة وبعدها قال : ما شاء الله تبارك الله ، ربنا يتم ليها على خير ان شاء الله

ردت بابتسامة : آمين يارب

- وعقبالنا كمان

- آمين برضو ..

•>•>•>•>•>•>•>•>•>•>

مرّ اسبوعين وكل العائلة تقريباً كانوا مبسوطين شديد لعبدالرحمن وسيدرا ، اما فرحة نهى كانت براها ..

وتين واحمد كانوا في المستشفى بسبب الفحص الدوري بتاعها واحمد طلب منها تفحص كل شي للضمان وانو تاني م عندها حاجة ..

كانوا قاعدين منتظرين النتيجة وهم بتونسوا لمن قاطعتهم الممرضة وهي بتديهم ورقة الفحص ، احمد شالها منها وقراها بس فجأة ملامحو بهتت و عقدة اتكونت بين حواجبو وهو بقرا في النتيجة ، وتين استغربت من ردة فعلو ومدت يدها عشان تشيلها بس هو ثبّتها وعاين ليها بابتسامة صغيرة ، عقدت حواجبها وشالت منو الورقة بسرعة وهي بتقرا فيها ..

رفعت راسها بصدمة للممرضة وقالت : بس هنا مكتوب انو انا م بَولِد

الممرضة عاينت ليها وقالت بأسف : ان شاء الله ربنا يصبركم ويرزقكم من عندو

وتين عاينت ليها بعدم تصديق وقالت : كيف يعني ؟ طيب دقيقة احتمال في غلط ..
عاينت للورقة تاني وقالت : بس دا ياهو اسمي
حوّلت بصرها لاحمد وعيونها مليانة دموع وقالت ليهو : احمد

احمد وقف من مكانو وقال للممرضة : شكراً

- العفو

مسك وتين من يدها ومشى بيها وهي بس دموعها كانت نازلة من غير صوت ، ركبت في العربية مع احمد وهو مشى على شقتهم ، لحدي م وصلوا وطلعوا م عملت صوت ..

احمد عاين ليها وقال : وتيني انتي كويسة ؟

عاينت ليهو وقالت بنبرة صوت مبحوحة : احمد ... انا م ممكن اجيب بيبي

قرّب وحضنها وقال : م مشكلة ، بالجد م مشكلة

بكت بصوت وشهقاتها بدت تطلع ، كانت بتبكي بقوة واحمد حاضنها عليهو وبحاول يهديها ..

بعد فترة طويلة شديد سكتت وقعدت في السرير واحمد قعد جمب رجولها في الارض وقال : م تبكي ، كل شي بحصل لخير

ردت والدموع لسة نازلة من عيونها : الحاجة الوحيدة اللي اتمنيتها كل حياتي م ممكن تحصل

مدّ اصابعو ومسح دموعها وقال : كل شي لخير يا روح احمد ، كلو لخير ولحكمة م يعلم بيها الا الله

- بس انت م عندك ذنب تقعد بدون اطفال ...

قاطعها : م عندي مشكلة واسي دا م موضوعنا

حاولت تمسح دموعها وقالت : احمد عرّس واحدة تانية

قاطع كلامها مرة تانية وقال : عليك الله يا وتين م تقولي كدا

ردت وهي لسة بتبكي : بس بالجد انت م عندك ذنب عشان تتحرم من كلمة بابا

- سبق وقلت ليك انتي اهم عندي من الابوة .. اهم بكتير والله وطالما انتي معاي م عايز حاجة تاني صدقيني

م ردت وبكاءها زاد ، قعد جمبها وحضنها مرة تانية وهو بهديها ..

•>•>•>•>•>•>•>•>•>•>

#لها بقية