هزّ راسو بتفهم وبعدها طلع من الغرفة وطلعت معاهو الدكتورة ، اما احمد كان بعاين ليها وفي بالو الف فكرة وفكرة لهَلاك احمد مرتضى ، بعد دقايق طويلة من تأملها لاحظ حركة جفونها المضطربة وفعلاً لحظات بسيطة وفتحت عيونها وفوراً اتملت دموع ، م اتردد في انو يمسكها ويحضنها عليهو وهو بطبطب عليها وبقول ليها في عبارات عسى ولعل تهدئ من روعها ...
بعد مسافة سكتت ، عاينت لاحمد ثواني وبعدها قالت : قال عايز يتكلم معاي
احمد كان مستغرب في انها اتجاوزت بسرعة بس قال ليها : م قال عايز يتكلم في شنو ؟
هزّت راسها بالنفي وهو مرر يدو على شعرها وقال ليها : م تاخدي في بالك انا بتصرف معاهو
- احمد عايزة اسألك وبليز جاوبني بصراحة
عاين ليها باستغراب وقال ليها : قولي
حركت يدينها بتوتر وقالت ليهو : انت .. انت اتواصلت مع احمد مرتضى قبل كدا ؟
سكت وهو م قادر ينفي ليها وفي نفس الوقت م عايز يأكد ليها ، حسّت انها شبه اتوصلت للاجابة بسبب صمتو
- اوعدني انو انت ح تفضل كويس ؟
احمد حرفياً اتصدم في ردة فعلها الهادية بس قدر يتحكَم في تعابير وجهو وقال ليها : ان شاء الله
ابتسمت بفُتور وبعدها سندت راسها على صدرو وغمضت عيونها بتعب ..
•>•>•>•>•>•>•>•>•>•>
وتين وعكس توقع سيدرا و احمد م حصل ليها شي غير الحالة الهستيرية اللي جاتها اول م شافت احمد مرتضى ، حتى انها ابتسمت مع سيدرا وضحكت معاها وحكت لاحمد مواقف مضحكة حصلت ليها مع المرضى وهم الاتنين كانوا في قمة الدهشة والاستغراب وطلعوا باستنتاجين ؛ يا إما وتين اتخطت حاجة اسمها احمد مرتضى نهائياً ، يا إما مشاعرها ماتت وبقا م فارِق معاها شي ..
احمد فضِل معاها لحدي م خلصت دوامها في المستشفى وبعدها رجّعها الشقة ومن مكانو اتحرك مباشرة على بيت احمد مرتضى .. ضرب على الجرس مرتين وثواني والباب فتح ولحُسن حظو كان احمد زاتو ، من غير اي مقدمات نزَل فيهو ضرب بعصبية وكل محاولات هنادي ام احمد مرتضى واستبرَق اختو في انهم يحجزوهم باءت بالفشل ولدهشتهم احمد مرتضى كان مستسلم تماماً لاحمد اللي م خلَا فيهو عظمة سليمة ، في النهاية رفَسو بقوة وبعدها مسكو من فكو وقال بعصبية
- قلت ليك شنو انا ؟ انطُق قلت ليك شنو يا حيوان
ردّ بصعوبة : انا ب .. بَس كنت عايز .. عايز اتكلم
زاد من ضغط اصابعو على فك الآخَر وقال : قلت ليك لو شفت ضلك بس حايم حوالينها م ح اخليك وانت بكل عين قوية بتجيها لحدي عندها ؟
هنادي قاطعتو وهي بتبكي : عليك الله فِكو يا ولدي الله يرضى عليك فِكو اعتبرني امك عليك الله خليهو ولدي واحد م عندي غيرو
أنت تقرأ
أنت ما أريد
Romance❣︎ كيفَ جمَعت كل الاشياء التي اُحبها فيك ؟ كيف جِئْتني هكذا دون مَوعِد ونفَضْت كُل ذلك الغُبار الكثيف عن صدري ؟ كيفَ جعَلت هذا القلبَ بعد حُبك ناصعاً ؟