- انت قلت لناس البيت شنو ؟
- قلت ليهم صحبي عيان ماشي ازورو وح ابيت معاهو لانو براهو
- يعني تاني ح تقعد في خلقتي كم ؟
رفع حاجب وقال ليهو : بالله انت لاقي ؟
عض على شفتو مسافة وهو مضيق عيونو وبعاين ليهو ، قاطع نظراتو الغريبة عبدالرحمن وهو بقول ليهو : بتعاين لي كدا ليه ؟
- بفكر انو انا لو قتلتك هنا وبعدها طلعت ومشيت مدني زي م قلت لناس البيت ماف زول ح يجيب خبرك الا ريحتك تطلع
عبدالرحمن فرق شفاهو بطريقة بسيطة وهو بعاين ليهو وبعدها زح بصرو منو وقال ليهو : م ح استغرب تفكيرك المختل زيك
احمد اشر على نفسو بصدمة وقال ليهو : انا مختل ؟
- واكبر مختل كمان
احمد وقف وقال ليهو : بقولوا الزول م بصاحب الا الناس البشبهوهو
قبل عبدالرحمن يرد احمد اتوجه على غرفتو بسرعة وهو بضحك ، ثواني وجا طالع وهو شايل تلفونو وعاقد حواجبو ..
- مالك عامل كدا ؟
- جنى متصلة علي كم مرة
- ان شاء الله خير
قبل عبدالرحمن يكمل جملتو تلفون احمد اتصل تاني وكانت جنى برضو ردّ عليها وهو مستغرب بس اتصدم لمن سمع نبرة صوتها الباكية وهي بتنده عليهو
- جنى جنى انتي كويسة ؟ مالك ليه بتبكي ؟
ردت وهي بتشهق : بابا بابا ....
م قدرت تكمل كلامها ودخلت في نوبة بكاء طويلة ، احمد بقا مصدوم وم عارف يعمل شنو قال ليها برعب وجسمو بدا يرجف من الانفعال
- في شنو ابوي كويس ؟ مالكم ياخ اتكلمي
عبدالرحمن وقف بسرعة وهو كمان مصدوم وقال ليهو : في شنو ؟
احمد هزّ راسو بمعنى انو م عارف وهو بنده على جنى اللي حاولت تهدأ وقالت ليهو من بين شهقاتها :
- بابا ضربني كف
احمد سكت وهو بعاين للفراغ ثواني وبعدها قعد في الكنبة بسرعة بعد م ختّ التلفون جمبو وهو بتنفس بطريقة سريعة ، عبدالرحمن شال تلفون احمد وقال :
- جنى في شنو ؟ ابوك مالو ؟
ردت بنبرة باكية : ضربني
عبدالرحمن نزل التلفون وزفر بارتياح وبعدها رفع التلفون تاني وقال ليها بحنية :
- ليه ضربك ؟
- عشان قلت ليهو يتكلم مع احمد ويخليهو يجي راجع .....
قطعت كلامها بسرعة وقالت ليهو بنبرة شبه مصدومة :
ويت أنت عبدالرحمن ؟
أنت تقرأ
أنت ما أريد
Romance❣︎ كيفَ جمَعت كل الاشياء التي اُحبها فيك ؟ كيف جِئْتني هكذا دون مَوعِد ونفَضْت كُل ذلك الغُبار الكثيف عن صدري ؟ كيفَ جعَلت هذا القلبَ بعد حُبك ناصعاً ؟
