أنت ما أريد

42

مرّ شهر وتين كانت عايشة فيهو حالة نفسية ، م كلمت زول غير سيدرا اللي اتصدمت وحاولت تصبرها برضو بأي طريقة ..

احمد كان موجوع على حالة وتين اكتر من انو هم م ممكن يكون عندهم طفل ، حالتها كانت بتقطع قلبو من جُوا بس برضو بحاول يتماسَك ويصبرها ...

م كان في زول عارف بالموضوع غيرهم هم الاتنين وسيدرا وعبدالرحمن ..

•>•>•>•>•>•>•>•>•>•>

طلع من الحمام وعاين لوتين اللي كانت متكورة على نفسها بس في انين خافت طالع منها ، قرّب منها وختّ يدو في جبينها بس كان مسخِن ..

- وتين .. وتين اصحي

فتحت عيونها بس رجعت غمضتها بسبب الصداع اللي داهم راسها ، احمد قعد جمبها وقال : حاسة بشنو ؟

ردت بصوت واهِن : تعبانة

- كدي صحصحي معاي

وقفت من السرير بسرعة ومشت على الحمام وبدت ترجّع ، احمد مشى وراها وهو بمسَح على ظهرها ، بعد فترة خلّصت وهي حاسة انو رجلينها م شايلاها من التعب ..

احمد سندها لمن وصلها السرير وهي قالت : بردانة

غطاها وقال : شكلها ملاريا .. قومي خلينا نمشي المستشفى

عقدت حواجبها وقالت : لا م عايزة

- وتين الله يرضى عليك م تعاندي

- بفحص بالICT (فحص الملاريا) اللي في البيت

احمد وقف ومشى جابو ليها وبعدها مسك يدها وهو بطعن اصبعها بالابرة عشان الفحص ..

بعد مسافة بسيطة الفحص اظهَر ليهم خطين بمعنى انو في ملاريا ، احمد قال ليها : خلينا نمشي المستشفى عشان يدوك العلاجات

ردت وهي عايزة تبكي : بكرَه الملاريا

- معليش

- ممكن نجيب العلاج برانا

- بس برضو لازم نمشي عشان م يكون في حاجة غيرها

- زي شنو ؟

- تايفويد او غيرو

ردت بنبرة بكاء : احمد انا بكرَه المرض

- ماف زول بحبو يا وتيني ، لكن كفارة ان شاء الله ، يلا قومي بدلي

وقفت بتعب ولبست عبايتها بس احمد قال : وتين بدلي ملابسك

ردت بتعب : احمد عليك الله خلاص ، م اهو لابسة عباية

- بس م ممكن تكوني لابسة تحت العباية قميص نوم ! معليش حبيبي بدلي

اتأففت وهي حاسة بالدموع في عيونها ، مشت على غرفة الملابس وبعد ثواني جاتو وفتحت عبايتها وقالت : ان شاء الله كدا مبسوط ؟