عبدالرحمن رجع البيت وسلم على امو وزوجة ابوهو اللي لقاهم في الصالة وقبل يتحرك منهم امو مسكتو من يدو وقالت ليهو :
- حبيبي اقعد معانا شوية
ليلى زوجة ابوهو : اذا تعبان اطلع ارتاح شوية وبعدها تعال لينا
ابتسم ليهم وقال : لالا م تعبان مشتاق لونستكم زاتو
قعد في الكنبة على مناداة الجدة الكبيرة للبت الشغالة ...
ليلى : سيتا جيبي من الحلو الفي التلاجة لعبدالرحمن
سيتا هزت راسها ومشت وبعدها امو قالت ليهو : قهوة ولا شاي ؟
- قهوة
مدت ليهو فنجان القهوة اللي كبتو ليهو وقالت : اتفضل بالعافية عليك
اخدو منها وهمس : الله يعافيك
شرب منو شوية وهو بعاين ليهم وهو بعاينوا لبعض ، ابتسم بخفة عشان هو عارف انهم م قالوا ليهو اقعد من فراغ ، ثواني وسيتا جابت الحلا لعبدالرحمن شال منو ، وبعدها امو قالت ليهو :
- عبدالرحمن
ميل راسو بابتسامة وقال ليها : يا قلب عبدالرحمن
ابتسمت بارتباك لانها عارفة الكلام التالي مستحيل يعجبو : الله يسلمك لي ويسلم قلبك ، عايزة اقول ليك حاجة
- اتفضلي
- بتعرف عبير ؟
اتنهد بخفة عشان فهم الموضوع وقال ليها : عبير منو يا امي ؟
ليلى : عبير بت اماني اختي
- ااااا ، اها مالها ؟
نهى : بت ما شاء الله عليها اتخرجت السنة الفاتت كانت بتدرس اعلام وهي زاتها كان شفتها تشبه المذيعات ما شاء الله
- كويس والله ربنا يحفظها
ليلى : صغيرونة حلات الدنيا عليها عمرها 23 سنة واللون دا ما شاء الله تبارك الله بس اللمبة
ضيق عيونو وهو بعاين ليهم وقال : لكن " لون اللمبة دا" م حلو
رفع اصابعو بعلامة تنصيص على جملة لون اللمبة دا ..
ردت نهى : ليه مالو ؟ والله يا عبدالرحمن سمحة سماحة البت
- امي ! انا اعمل بسماحتها ودراستها وعمرها ولونها شنو ؟
نهى : عاين من الآخر كدا ، انا عبير دي عاجباني وعايزاها ليك
رفع حاجب وقال ليها : انتي بتستشيري فيني ولا بتكلميني ؟
ليلى : لا يا حبيبي اكيد بنستشير فيك الراي الاول والاخير ليك انت ، بس البت م بتترفض الصراحة
- هي البت دي عارفة انكم قاعدين تعرضوها لي حالياً ؟
ردت نهى بصوت شوية واطي : احتمال اكون عرضت ليها الفكرة ومدحتك عندها ؟
أنت تقرأ
أنت ما أريد
Romance❣︎ كيفَ جمَعت كل الاشياء التي اُحبها فيك ؟ كيف جِئْتني هكذا دون مَوعِد ونفَضْت كُل ذلك الغُبار الكثيف عن صدري ؟ كيفَ جعَلت هذا القلبَ بعد حُبك ناصعاً ؟
