أنت ما أريد

26

- احمد

التفت عليها وقال : هلا

- وين كنت يا ولدي خوفتني عليك

قرب منها وباس راسها وبعدها قال : آسف حقك علَي ، تاني م بكررها

- الله يحفظك ويغطي عليك ان شاء الله ، امشي لامك لانها برضو قلبها مقطوع عليك

- طيب حاضر

قالت بابتسامة دافئة وحنونة : احضر ليك الخير يا حبيبي

مشى على السلم بس وقف وبعدها التفت عليها وقال : ليلو

عاينت ليهو وهو قال : بحبك ياخ

ردت بضحكة : وانا كمان بحبك

طلع السلم وابتسامتو م فارقت وجهو ، مشى على شقة اهلو وطرق على الباب ثواني وجا ابوهو فتح الباب ودخلو

- كويس انت ؟

- اي الحمد لله

مشى على امو اللي كانت في المطبخ

- احمد يا ولدي وين كنت ؟

- آسف ، لكن انا كويس جدجد

- الحمد لله طيب ، اقعد اكل

- اكلت ، ح امشي عشان اجهز للصلاة

- طيب بالعافية

طلع من الشقة واتوَجَه على غرفتو ، دخَل وبعدها قفل الباب طلّع التيشيرت ومشى على الحمام بعد دقايق طلَع وهو بجفف في شعرو ، وقف ثواني وهو بعاين لنفسو في المراية ابتسم لمن اتذكر وتين ، البنت اللي دخلت قلبو حرفياً فجأة ، البنت اللي قِدر يشاركها علاقتو مع ابوهو اللي م حصل اتكلم عنها مع زول غير عبدالرحمن ، البنت اللي خلَت جانبو التاني يطلع ، عزَزَت فيهو غريزة الحماية والغيرة بطريقة مُكثفة جداً ، البنت اللي كل م يلقى نفسو بدا يفقد السيطرة بكلمة منها او حتى لو اسمها نوَر شاشة تلفونو ساي بتغير مزاجو ، بدا يحس بالخوف من طريقة تأثيرها عليهو ؛ الخوف عليها هي ...

•>•>•>•>•>•>•>•>•>•>

- احمد رسل لي قال قربوا

- طيب خلصي سريع يا غبية قاعدة سنة قدام المراية ، بالمناسبة م قلتي لي

- شنو ؟

قالت بغمزة : حصل شنو مع احمد قبيل ؟

بسرعة لون احمر انتشر في وجهها وقالت : م حصل شي

- وشك بقا زي الطماطم شنو م حصل شي دي ؟

- بالجد ، بس كان فطرنا سوا وبعدها حضرنا فيدز واتونسنا لحدي م جا زمن الصلاة ومشى وباقي الdetails (التفاصيل) بعدين

- وايي حماس ياخ ، احمد جريئ شديد وم بخاف من شي

- كل م اقول كلمة يقول لي البينا حلال

- والله عسل شديد حبيبو ياخ

- حصل المهم انا خلصت ، ننزل ؟

- اكيد اصلاً منتظراك بس