أنت ما أريد

36

فتحت عيونها وهي عاقدة حواجبها ، عاينت لاحمد اللي كان راقد جمبها ونايم وهي كانت نايمة في يدو زي م واضِح ليها ، مدت اصابعها ورفعت شعرو اللي كان مغطي جبينو ونازِل على عيونو وبعدها رفعت نفسها وطبعت قُبلة في جبينو وفِضلت تعاين ليهو ثواني وهي مبتسمة ، شالت تلفونها وعاينت للساعة واتصدمت لمن لقتها ثلاثة عصر وقفت ودخلت الحمام وبعد دقايق فتحت الباب بسيط وهي بتعاين في انحاء الغرفة واحمد كان لسة نايم ، طلعت وهي لافة المنشفة حولها واتوَجَهت على خِزانة الملابس بخطوات غير مسموعة وبنفس الهدوء الطلعت بيهو شالت ملابس واتوَجَهت على الحمام مرة تانية وبعد ثواني طلعت وقعدت في التسريحة وعملت روتينها من ترطيب وغيرو وبعدها لبست اسدال الصلاة و وقفت صلّت الظهر والعصر واستغفرت ربها على تأخيرها للصلاة ..

بعد خلّصت رجعت ليهو كان لسة نايم ، كان مرهَق شديد لانو عندو تقريباً يومين م نايم وغير كدا هي نامت بعد صلّوا الصبح بس م كانت عارفة احمد نام متين ، قعدت جمبو في السرير ومدت يدها ومررتها على شعرو وبعدها وجهو قرّبت منو وهمست

- بيبي

احمد م اتحرَك وهي همست مرة تانية : بيبي قوم الصلاة

برضو م اداها ردة فِعل ، طرَقَت على جبينو بخفة وقالت : احمد

عفّس وجهو وهو بهمهم بنُعاس ، ابتسمت ونزلت عليهو وباست جبينو وقالت : قوم يلا

فتّح عيونو وعاين ليها وبعدها ابتسم ابتسامة واسعة وعيونو شِبه مغلقة بسبب النعاس

- يا حبيبي قلت ليك م تبتسم كدا

ضحك ضحكة صغيرة وبعدها قال : الساعة كم ؟

- تلاتة ونص

عقد حواجبو وهو بقعد في السرير وقال : تلاتة ونص ؟ مستحيل تكون صباحاً

وسّع عيونو بصدمة وهو بعاين ليها وبعدها قال : تلاتة ونص عصر ؟

اومأت بالايجاب وهي بتعاين ليهو وهو وقف من السرير بسرعة وقال : طيب المنبه ، تلفوني وين ؟

ضرَب على راسو لمن اتذكر انو تلفونو في رحمة الله بسببو ، شدّ على شعرو وبعدها قال : ياربي اكيد اتصلوا علَي كتير

مسكتو من يدو وقالت : اهدا ، في شنو ؟

- الشغل يا وتين

- على فكرة انت م الكوماندو الوحيد وبعدين انت امس قلت لَي انكم خلصتوا

- اي بس برضو مفروض امشي

- م يضر اذا اخدت اليوم راحة واصلاً بعد دا مسؤولية الشرطة م انتو

سكت ثواني وبعدها اتنهد وقال : طيب طيب .. ح امشي عشان ابدّل واصلي

- طيب اوكي

طلَع من غرفتها وهي مشت على تلفونها الرنّ وكانت امها ، اتكلمت معاها مسافة وطمنتها وبعدها قفلت منها وشالت طرحة لبستها مع الفستان المنزلي اللي كانت لابساهو وفتحت باب غرفتها وطلعت في نفس اللحظة اللي فتح فيها احمد باب غرفتو وطلَع برضو وكان لابس ملابس بيت عادية ، ابتسمت ليهو وهو بادلها الابتسامة وبعدها اتوَجَهوا على السلم مع بعض ونزلوا تحت وكان في ليلى ونهى وجنى وسيدرا ومريم وامها فادية ..