أنت ما أريد

10

الصباح :

وتين صحت من النوم واول حاجة عاينت لتلفونها لقت رساايل من احمد الساعة 2 صباحاً مضمونها " وتيني كيفك ؟ انا تمام الحمد لله بس كنت شوية مشغول آسف عشان م اتصلت عليك " رسالة تانية مكتوب فيها " وبرضو عايز اقول ليك اني ح اسافر خمسة ايام مدني عندي شوية شغل بشرح ليك كل شي لمن نتلاقى ان شاء الله " واحدة تالتة فيها " ح اسافر الصباح ان شاء الله واحتمال الشبكة تكون شوية كعبة ف تلفوني ح يكون مقفول معظم الوقت م تقلقي وانا كل م القى فرصة بتصل عليك ان شاء الله وح اشتاق ليك شديد خلي بالك من نفسك وصحتك وبحبك "

عقدت حواجبها وفي وخزة في قلبها م عجبتها كانت حاسة انو في حاجة ، ردت عليهو برسايل وبعدها وقفت ومشت على الحمام عشان تكمل روتينها الصباحي ..

سيدرا كانت في المطبخ بتجهز لنفسها ولوتين في حاجة خفيفة للصباح ، دقايق ووتين جاتها طالعة جهزت معاها باقي الحاجات وقعدوا في الصفرة ..

وتين : احمد سافر

سيدرا عقدت حواجبها وقالت : وين ؟

- مشى مدني قال عندو شوية شغل

- اهاا يصل بالسلامة ان شاء الله وانتي ليه زعلانة كدا ؟

عقدت حواجبها زيادة وفي لمعة من الدموع في عيونها : م عارفة حاسة انو في حاجة غلط

- بسم الله يابت ماف اي حاجة ان شاء الله ح يكون كويس اكيد

وتين مسحت دموعها اللي بدت تنزل وم ردت عليها ، سيدرا لمن شافت دموعها اتخلعت وجات وقف جمبها وحضنتها عليها وقالت : وتين مالك حبيبتي ؟

وتين اتمسكت فيها وقالت بشهقة : م عارفة يا سيدرا م عارفة قلبي واجعني شديد

سيدرا مسحت على ظهر وتين بخفة وقالت ليها : ماف شي ان شاء الله اذكري ربك بس

بعد شوية وتين هدت ورجعوا يكملوا ترويقتهم ..

سيدرا : ناس ماما قالوا ح يمشوا تركيا ، رايك شنو نمشي ليهم في اجازة الاسبوعين ديل ؟

وتين : م نفسي والله وبعدين هي كلها اسبوعين وح نبدا السمستر الجديد خلينا هنا احسن

- اوكي م مشكلة هنا برضو ممكن نفلها ونستمتع

وتين ابتسمت وقالت ليها : ح نفِل ام امها اكيد ان شاء الله

سيدرا بضحكة ردت : ان شاء الله

•>•>•>•>•>•>•>•>•>•>

عبدالرحمن ختّ تلفونو في التربيزة بعد م قرا رسايل احمد وهو مستغرب شديد ، وقف ونزل تحت طوالي وزي م اتوقع لقا غفران قاعدة تحت ومعاها امو ومرة ابوهو اول م غفران شافتو قالت بشوية فرحة :

- احمد رسل لي يا عبدالرحمن

ابتسم وقال ليها : الحمد لله انو بخير